Pa'ala 12

1Tɛnra ho naana la ho bonbilomen, ge te daaŋɔ dabeha la nyaŋɛ paɛ, yuum se'a te ho wan ta yeti, Mam nya taregɛ mɛ la nyaŋɛ paɛ. 2Tɛnra en ge te wontɛɛŋa, nɛɛhom, ŋmarega, la ŋmarebibihe n ka le ta nɛɛra, te saŋgbana sobege yula la dabeha la paɛ. 3Dabeha se'a poan te sɛba n ze' pigira yiya la ta gbi'ira, te panhedoma ta gon'oha, te nɛɛneba go'e nɛɛŋaɔ ban ka zo'e la zuo, te se'em n veehe takole poan behɛ na kan nyɛta la. 4Dabeha se'a te nayahe se'ehe n yu'urɛ baha sore zuo na la wan yu', te nɛɛŋɔ voole ma'ɛn, te niihe kaahega wan nɛɛ nɛreba, ge te yooma zan'an ma'ɛn la, 5se'em ma'an te nɛreba wan zɔta dabeem la zɔya, te sɔya zuto dɛna nyɔnpɔnhega la. Se'em ma'an te ho zuo pelege, te ho walena wo sonwa'atɛ, te sɛla ka le tara ho kɔnrehe la. Saŋkana te asaala kula a yire, te kaahega to'e sɔya zuto. 6Tɛnra en ge te saanbega nyaŋɛ yehe na, te wampaalɛ wɔnregɛ, te soŋɔ nyɔ'. 7Daanse'ere daarɛ te tentɔnɔ lɛbera teŋa, ton ze'ele zen'an na la, ge te vo'om la lebe Yenɛ zen'an. 8Yoo, yoo. Pa'ala la n yele. Sɛla woo dela yoo. 9Pa'ala la ka dela yamdaana ma'an, ge a bo nɛreba la bɔkerɛ. A pa'ale mɛ, ge ɛ yetɔgɔbiŋire yɛla zo'e biŋe. 10Pa'ala la vɛɛnhe mɛ nyɛ yelese'a n nare. N golehɛ yelese'a la dela yelesoma, la yelemɛŋɛrɛ. 11Yamdaana yetɔgom ane mɛ wo duŋkeendoore la, ban lagahɛ yelese'a tɔgɔra la ane mɛ wo kpa'ahe n kpa' sɛla nyɔkɛ taaba la. A dela yelese'a te duŋkeena kayena bo. 12N bia wa, mina te yelese'ere da pa'ahɛ yele ana wa poan, behɛ ho mɛŋa soŋa. Gɔnɔ kekeko golehegɔ ka tare tɛka, zamehegɔ kekeko bo'ore la taregerɛ. 13Nananawa, ba wom sɛla woo. Yele la ba'ahegɔ dela, zɔta Yenɛ, ge tara a nɔɔrɛ la te a bo la. Asaala woo toonɛ n bala. 14Yenɛ wan gankɛ yele woo, ta ta' la yelese'ere woo n sogɛ tom, dɛna som, bii be'em zan'an.

will be added

X\