Pa'ala 10

1Wo zun'kiirehe n bahɛ te kaam somɔ fɛn'ɛra se'em la, bala mea te gɔɔnɛ fiin wa sagona yam, la na'ahegɔ. 2Yamdaana potɛn'ɛra bahere te a tona la som, ge gerego potɛn'ɛra bahere te a tona la be'em. 3Gerego han kena sore zuo, a ka tare yam, ge me wan pa'alɛ nɛreba en gerege se'em. 4Naba sunsunya han nyie la hɔ, da bahɛ ho kpe'eŋo la, baanlam bahere te tuure saalena mɛ. 5Be'em bosebo te mam nyɛ teŋparɛ wa zuo dela, naba n tuure tuure se'a taaba. 6Geto n nyɛte kpɛ'ɛn kanra zo'e zo'e se'em, te bontateba ton bɔna teŋa. 7Mam nyɛ yamehe n ban' yiri, te nabiihe kena teŋa wo yamehe la. 8Hom se'em n tun' boko ta'an ta lu' ko poan. Hom se'em n ban'ɛn dangoone tole, bonsɛla ta'an dum ho. 9Hom se'em n wɔnte kuga, a ta'an pɔgɔlom hɔ. Hom se'em n wɛgere dɔɔrɔ boe la nyɔnpɔnhega poan. 10Lea han gu'ulom ka saahɛ, paŋa n nya tone, ge yam n nyaŋere toonɛ. 11Bonsɛla han dum ba'ahɛ ge te ba nya yoon ka, yooŋɔ la ka tare vɔnrɛ. 12Yamdaana nɔɔrɛ yetɔgom tare la maalegɔ, ge gerego mɛŋa nɔɔrɛ n sagone en 13Gerego han pɔhɛ, a yetɔgom la dela gɔɔnɛ, ta lebege yetɔgɔpɔn'ɔha, nya ta ba'aha la yelese'a n ka tare vɔnrɛ. 14Gerego malom tɔgɔra mɛ. Nɛra ka mi' se'ere n ye' na. Ane n wan ta'an pa'alɛ nɛra sɛla n wan wa'an a pooren na? 15Geto tooma n taregere en, a ka mi' sose'ere n dole yɛ'a teŋkantɛ poan. 16Yele boe teŋsɛka naba n de yameŋa ge dɛna gerego zuo, teŋsɛka nabiihe n ne dita dikanra bolika woo la. 17Popeelom boe la teŋsɛka naba n nyɛ dɔgom somɔ, teŋsɛka nabiihe n dite dia ka dia saŋa te ba nyɛ paŋa ge dagɛ la ba buge. 18Nɛra han tara zenyangerɛ, a bɔ'ɔ yuli mɛ, a wan kelom bobe a nu'uhe, te ko ta vobegɛ. 19De'eŋɔ ete la yelɔ'ɔrɔ zuo, daam bo'ore la vom nyeema, ge ligiri n maale sɛla woo. 20Da zɛrɛgɛ naba ho tɛn'ɛhegɔ poan, bii ho zɛrɛgɛ bondaana ho soŋɔ zuo. Se'ere n sɔe la niiŋa ɛngere wan ko'ohe, bii sɛla n tare kelompagehe keŋɛ ta ko'ohe hom yele se'em la.

will be added

X\