Pa'ala 1

1Pa'ala la n de naba David dayɔa, dɛna Yerusalem naba la yelehom n wana. 2Pa'ala wa yeti, La dela yoo. Sɛla woo dela yoo. 3Asaala nyɛte la bem a namehegɔ wa woo poan te a namehera wontɛɛŋa wa poan wa? 4Buuri saŋa wan wa'ana tole, te buuri saŋa sɔe, ge teŋparɛ wa gan' la bala yɛ'ɛha. 5Wontɛɛŋa ne nyɛɛn mɛ ta lu, ge ne le kanbelɛ lebe kaŋa n ze'ete zen'an nyɛɛnra na la. 6Sabeeo ne lobe mɛ keŋɛ gɔbega, ŋmɛregɛ lɔbera yɛ'a zuɔ, tuluha ko mɛŋa bala lɛbera na. 7Kolaahe woo zote sigera la ko'kantɛ wa poan, ge bo ka malom peta, kolaahe la n zote sigera zen'an la, se zote sigera la bilam mea saŋa woo. 8Sɛla woo taregere mɛ, te nɛresaala kan nyaŋɛ pa'alɛ. Niho ka tara bo behɛ ba'ahɛ, bii toberɛ wom ba'ahɛ kan le kelehe. 9Sɛla n pon bɔna n wan bɔna, sɛla n pon eŋɛ, n wan eta. Bala yele saanɛ ka boe teŋparɛ wa zuo. 10Sɛla boe teŋparɛ wa zuo te se'em wan yeti, Bahɛ, yelepaalɛ n wana? De pon bɔna mɛ yuuman yuuman ha, te tomam nan ka boe. 11Ba ka tɛnre deemen deemen yɛla, bii se'em tɛnra yelese'a n kene na. Sɛba n boe pooren kena na kan tɛnra ba. 12Mam pa'ala wa zin'ire Israel na'am gɔŋɔ zuo mɛ Yerusalem sɔ'ɔlom wa poan. 13Lo' n potɛn'ɛrɛ te n ɛ la n baŋɛ yelese'a woo n ete teŋparɛ wa zuo. La dela zeero kantɛ te Yenɛ dekɛ ziile asaala teŋparɛ wa zuo te ba namehe ba mɛhe. 14Mam nyɛ yelese'a woo asaala ete teŋparɛ wa zuo mɛ. Behɛ, a woo dela yoo, a dela sabeeo dika. 15Sɛla n ŋmɛlegɛ kan le tɛɛn, sɛla n ka boe ka tare kanlɛ. 16Mam yele n mɛŋa yeti, behɛ, mam de se'em n nyɛ yam gana sɛba woo n diŋɛ mam nɛŋa Yerusalem wa poan la. Mam nyɛ yam la bɔkerɛ zo'e mɛ. 17Te mam lo' n potɛn'ɛrɛ te n bɔkɛ yam la mi'ilom n tare sɛla, la yelese'a n ka tare vɔnrɛ la gɔɔnɛ n tare sɛla, ge mam nyɛ te bala me dela yoo, la dela sabeeo dika. 18Se'ere n sɔe la, yam zo'e zo'e tare la sundaaŋɔ, te bɔkerɛ zo'e zo'e tara sunsagaŋɔ.

will be added

X\