Tɛɛnhegɔ 7

1Na'ayenɛ ya Yenɛ la han ta tare ya ta kɛn' teŋhe se'ehe te ya ta to'e se sɔna wa la poan, ge sa'ahɛ Hitidoma la Girgasdoma la Amoridoma la Kanaandoma la Perizidoma la Hivdoma la Yebusdoma la, teŋhe seyopɔe, zo'e ge kpe'em gana ya, 2ge Na'ayenɛ ya Yenɛ la han ta dekɛ ba eŋɛ ya nu'uhen te ya zabɛ nyaŋɛ ba ba'ahɛ, ya kɔ'ɔn sagom ba zan'an zan'ana. Da tare ya sɔnhega soŋa la ba. Da zote ya ba ninbɔn'ɔn. 3Da dite ya ba. Da tare ya ya pɔyɔɔhe ɛleha ba dayɔɔhe, bii ya dita ba pɔyɔɔhe bɔ'ɔra ya dayɔɔhe, 4ge bala wan ta ŋmɛregɛ ya kɔma potɛn'ɛra yehe mam zen'an, te ba ta dɔla yena a se'a, te Na'ayenɛ sunsunyiim taɛ bahɛ ya zuo sagom ya wana kalam. 5Yan wan eŋɛ ba se'em dela, gbirige ya ba bimbina la bahɛ, ge wɔnrɛ ba toolom kuga la, ŋma ba Aserah baga dɔɔrɔ la bahɛ, ge nyɔ' ba baga la la bugum. 6Yamam dela toolom nɛreba bo Na'ayenɛ ya Yenɛ. Na'ayenɛ ya Yenɛ la mɛŋa n gaŋɛ yamam teŋparɛ wa buuri zan'an poan te ya dɛna a sɔ'ɔlom. 7Na'ayenɛ suunre n kɛn' ya te a loe ya, la dagɛ la ya gane la buuri se'a woo n boe la. Yamam n ton pɔ'ɛ buuri la woo poan. 8La dela Na'ayenɛ nɔŋɛ ya mɛ ge tɛnra nɔbiŋere la te a biŋe la ya sɔyaabdoma la pɔtɛ la zuo, te a tare yamam la a paŋa, yɔ to'e yamam ya da'aberɛ teŋa la poan, la Mizraim teŋa naba Faro nu'uhen bahɛ. 9Bala, mini ya te Na'ayenɛ ya Yenɛ la n de Yenɛ. A dela birikinte Yenɛ, te a nɔŋerɛ nɔbiŋere la paara tuunhom tuha tuha se'a woo n nɔŋɛ en ge dɔla a nɔɔrɛ la. 10Ge sɛba woo n yaɛ en la, a ne kɔ'ɔn yɔ ba la ba nɛŋan kalam la sagaŋɔ. A ka go'one ge yɔɔra sɛba n yaɛ en la ba ninin. 11Bala, ma'ɛn ya mɛhe dɔla n nɔɔrɛ la malema la nɔze'elego la woo te n pa'alɛ ya zina dabaherɛ wa. 12Ya han tɛnra nɔze'elego wa ge ma'ɛn ya mɛŋa dɔla de soŋa, Na'ayenɛ ya Yenɛ la wan tɛnra a nɔbiŋere la a zo'ohogɔ la wo a pɔ' la ya sɔyaabdoma se'em la. 13A wan nɔŋɛ ya, ge kan' som bo ya, ge bahɛ te ya wi'ɛ ya kanlɛ poan. A wan kan' som bahɛ ya kɔma dɔgom poan, ya samana zuo dia, ya tiihe wɔŋa, ya nagabibihe, pebibihe, la dunhe se'ehe woo n boe teŋsɛka te a pɔ' la ya sɔyaabdoma te a wan dekɛ bo ya la poan. 14Ya wan nyɛ' kan'somɔ gana nɛresɛba woo n boe teŋparɛ wa zuo. Boraa bii pɔka kan bɔna ya poan dɛna kondɔgɔrɛ, bii duŋa bɔna ya dunhe poan dɛna ɔɔnrɛ. 15Na'ayenɛ wan lɔkɔra ban'ahe woo ya zen'an, a kan dekɛ ban'an kanra se'ehe te ya nyɛ Mizraim teŋa poan la kɛn'ɛhe yamam, ge a wan dekɛ se kɛn'ɛhe nɛra se'em woo n yaɛ ya. 16Kɔ'ɔn sagom ya nɛresɛba woo te Na'ayenɛ ya Yenɛ la bahɛ te ya nyaŋɛ ba la. Da zote ya ba ninbɔn'ɔn, me da kaanbere ya ba baga la. Se'ere n sɔe bala wan dɛna bɛnregɔ bɛnrɛ ya. 17Ya ta'an yɛta ya mɛhe yeti, Teŋa wa kpe'em gaŋɛ to mɛ. Tomam yeti to eŋɛ la wane dige nɛreba wa te ba yehe? 18Da tare ya dabeem la ba. Tɛnre ya soŋa soŋa Na'ayenɛ ya Yenɛ la n daa eŋɛ naba Faro la Mizraim teŋa zan'an se'em la. 19Ya mɛhe nini daa nyɛ namehegɔ kanra se'a la kerehe la nyalema se'a la paŋa sɛka te Na'ayenɛ ya Yenɛ la daa tom fan' ya bahɛ se'em. Na'ayenɛ ya Yenɛ la wan eŋɛ nɛresɛba te dabeem tara ya la ba wa la bala mea. 20Le yɛ'ɛha Na'ayenɛ ya Yenɛ la wan kɛn'ɛhɛ ba dabeem, te nɛresɛba te ya pon ka paɛ ba ko ge te ba zɔ sogɛ la zan'an wan mɛlom. 21Da pabegɛ ya la ba. Na'ayenɛ ya Yenɛ la kanregɛ mɛ ge dɛna dabeem Yenɛ. 22Na'ayenɛ ya Yenɛ la wan digera nɛresɛba woo n boe ya nɛŋan la finfiinhe. A kan bahɛ te ya kɔ'ɔn dige ba zan'an boyena. La han eŋɛ bala, mɔen dunhe wan wi'ɛ kae ya bahɛ teŋasoka. 23Ge Na'ayenɛ ya Yenɛ la wan degeha ya diŋdoma eta ya nu'uhen finfiinhe. A wan dekɛ ba tuunle taaba, te ba tuluge taaba, ta sagom taaba ba'ahɛ. 24A wan dekɛ ba nadoma eŋɛ ya nu'uhen te ya bahɛ te ba yu'ura mɛlom teŋa wa zuo. Nɛra nɛra ka boe wan ta'an zabɛ la ya, ya wan sagom ba. 25Nyɔ' ya ba baga la te ba yagom la bugum ge da fan' ya sanlenpeelega la sanlema la n page ba zuto la tara. Se'ere n sɔe la, ba dela lɔgɔfɛn'ɛha bo Na'ayenɛ ya Yenɛ la. 26Da tara ya lɔgɔfɛn'ɛha kɛn' ya yire poan na, ge sagaŋɔ seko n boe ba zuo la wan sige yamam me zuo. Kɔ'ɔn kihire ya ba la ninmɔ'ɔrɛ. Se'ere n sɔe la, sagaŋɔ n boe lɔgɔtonɔ zuo.

will be added

X\