Tɛɛnhegɔ 6

1Nɔɔrɛ dena la malema ana la nɔze'elego kona te Na'ayenɛ ya Yenɛ la pa'alɛ mam te n dekɛ pa'alɛ ya, te yan ye' yakera Yordan te ya ta to'e teŋhe se'ehe sɔna wa, ya ta dɔla. 2Bala te ya mɛhe ya kɔma la ya kɔma me kɔma wan zɔta Na'ayenɛ ya Yenɛ la wo yamam mɛŋa n dole malema la, la nɔɔrɛ se'ere te n bo ya wa ya vom poan se'em la. Bala te ya wan di vom woko nyɛlom. 3Kelehe ya soŋa soŋa, Israeldoma wa, ge ma'ɛn ya mɛhe nana, ge bala te sɛla woo wan ana soŋa bɔ'ɔra ya, ge te ya wi'ɛ teŋsɛka n zote la iilom, la seerom la poan, wo Na'ayenɛ n de ya sɔdoma Yenɛ la n pon biŋe a nɔɔrɛ la ya se'em la. 4Kelehe ya soŋa soŋa Israeldoma wa, Na'ayenɛ tomam Yenɛ dela ayena ma'an. 5Nɔŋɛ Na'ayenɛ ho Yenɛ la la ho suunre zan'an la ho sea zan'an la ho paŋa zan'an. 6Nɔya se'a te mam bɔ'ɔra ya zina wa, bɔna ya sunya poan. 7Dekɛ ya a pa'alɛ ya kɔma. Tɔgɔre ya a yɛle yan zin' ya yiya poan bii yan kene sore zuo. Yan ze' bii ya gan' mɛ. 8Lo ya a danlehom pire ya nu'uhen ge pɛ' a sanba lo' tabelɛ ya gbɛ'ɛra, 9ge golehɛ a lamenɛ ya kolehe, la ya nayahe. 10Na'ayenɛ ya Yenɛ la han ta tare ya kɛn' teŋsɛka te a pɔ' te a wan dekɛ bo ya sɔdoma Abraham la Isaak la Yakob la, teŋhe se'ehe e mɛ kɛn'ɛhɛ kɛn'ɛhɛ la yisoma se'a te ya mɛhe ka mɛ la. 11Yikanra se'a n perɛ la lɔgɔsonɔ seto te ya ka wobege murugere ge nyɛ, bulehe se'ehe te ya ka tun', la tiihe wɔla vatɔ, la kaam tia va'am sebo te ya mɛhe ka kɔ, te ya ta dita yan bote se'em la. 12Ya ta behɛ ya mɛhe soŋa la ya da tamɛ ya Na'ayenɛ la n tare ya ze'ele Mizraim teŋa, ya da'aberɛ tooma poan yehe na la. 13Zote ya Na'ayenɛ ya Yenɛ la, ge tona bɔ'ɔra enŋa ma'an, te enŋa ma'an dɛna ya pɔtɛ. 14Da dole ya yena pa'ahɛ. Da dole ya nɛresɛba n kae ya mum wa yena la. 15Na'ayenɛ ya Yenɛ bɔna la ya la dela nyuunre Yenɛ. A sunsunyiim wan taɛ bahɛ ya zuo, di ya kaanbɛ teŋa la poan. 16Da makere ya Na'ayenɛ ya Yenɛ la behera wo yan eŋɛ n se'em Massa teŋa poan la. 17Behɛ ya soŋa dɔla Na'ayenɛ ya Yenɛ la nɔɔrɛ wa, la yɛla la, la malema la te a bo ya la. 18Ete ya sɛla n de ma'an, ge nara ya Na'ayenɛ nɛŋan. Bala te sɛla woo wan ana soŋa bo ya te ya ta ta'an to'e teŋsɛka te ya Na'ayenɛ la pon biŋe nɔɔrɛ la pɔtɛ bo ya sɔyaabdoma, 19sa'ahɛ ya diŋdoma wo n pon yele se'em la. 20Pooren, ya kɔma han ta soke ya yeti, Yɛla la malema la nɔze'elego wa te Na'ayenɛ to Yenɛ la bo te ya dɔla wa vɔnrɛ dela dene? 21Ya yele ba yeti, To yuun dela naba Faro da'aba bɔna Mizraim teŋan. Te Na'ayenɛ fan' wa tɔ la a mɛŋa paŋa yehe Mizraim poan na. 22Tomam mɛhe nini nyɛ Na'ayenɛ n tom nyalema la kerehe la ban'an kanra te se sige Mizraimdoma zuo na, la Faro mɛŋa la a yiredoma zan'an zuo na se'em. 23Ge a tare tomam la baanlam yehe na, tare to wa'ana kɛ'ɛhɛ teŋsɛka te a pɔ' la to sɔyaabdoma te a wan dekɛ bo ba la poan. 24Na'ayenɛ mɛŋa n bo to nɔɔrɛ te to nana malema ana wa zan'an, ge zɔta enŋa Na'ayenɛ to Yenɛ la. Bala te la wan ana to som ge te to tara vom wo lan ane se'em zina wa. 25To han ma'ɛn to mɛŋa soŋa soŋa ge nana sɛla woo te Na'ayenɛ to Yenɛ la bo to nɔɔrɛ la, bala n wan dɛna to tontɔɔ vom.

will be added

X\