Tɛɛnhegɔ 30

1Kan'an la woŋerɛ yɛla wa te n dekɛ biŋe ya nɛŋan wa han ta sigera ya zuo, te ya tɛn'ɛhɛ a ya sunya poan zen'an woo te Na'ayenɛ ya Yenɛ la wan yeregɛ ya bahɛ teŋhe wa poan te ya ta bɔna la, 2te yamam la ya kɔma han ŋmɛregɛ lebe Na'ayenɛ ya Yenɛ la zen'an na nana en la ya sunya la ya sea zan'an wo mam bo ya nɔɔrɛ zina te ya eta sɛla woo se'em la, 3Na'ayenɛ ya Yenɛ la wan le gu' ya yelesoma la bo ya ge zɔ ya ninbɔn'ɔn ge le lagahɛ ya teŋse'ehe woo poan te a yeregɛ ya bahɛ bini la na. 4Ba daa han pon sa'ɛ ho ta bahɛ la teŋsɛka n ba' zaan teŋparɛ wa zuo, Na'ayenɛ ya Yenɛ la wan tare ya lebe na. 5A wan tare ya lebe teŋsɛka n de ya sɔdoma teŋa la poan na te ya sɔe ka sɔna. A wan bahɛ te ya panrɛ gana ge zo'e kanlɛ poan gana ya sɔdoma saŋa la. 6Na'ayenɛ ya Yenɛ la wan ŋma yamam la ya yaahe sunya te ya nɔŋɛ en la ya sunya la ya sea ge ya vɔna. 7Na'ayenɛ ya Yenɛ la wan dekɛ woŋerɛ ana wa zan'an bahɛ ya diŋdoma sɛba n yaɛ ya ge nameha ya la zuto. 8Ya wan le nana Na'ayenɛ ge dɔla a nɔya la zan'an te n bɔ'ɔra ya zina wa. 9Bala te Na'ayenɛ ya Yenɛ la wan bahɛ te ya panrɛ ya nu'uhe tooma woo poan la puya wɔla poan la ya dunhe kɔma poan la la di sɛka woo te ya bota teŋa la poan. Na'ayenɛ wan le nɔŋɛ ya te a bahɛ te ya panrɛ wo n daa nɔŋɛ ya sɔdoma se'em la, 10ya han nana Na'ayenɛ ya Yenɛ la tara a nɔse'a la a malema se'a woo n golehɛ eŋɛ Pa'alegɔ Gɔŋɔ wa poan la ge ŋmɛregɛ lebe Na'ayenɛ ya Yenɛ la ya suunre la sea zan'an. 11Nananawa nɔse'ere te n bɔ'ɔra ya zina wa ka ba' kpe'em bo ya bii zaan la ya te ya kan paɛ. 12De ka boe saazuo ha, te ya wan soke yeti, ane n wan zom ha ta to'e na mɔɔlɛ bo to te to nam? 13De me ka boe mɔgɔrɛ yakenɛ, te ya wan soke yeti, ane n wan yakɛ ko'om wa ta to'e na mɔɔlɛ bo to te to nam? 14Aai, yelehom la kɔ'ɔn lɛm mɛ la ya, bo boe la ya nɔɔrɛn, la ya sunya poan te ya ta'an nam. 15Behɛ ya, zina dabaherɛ wa, mam dekere la vom la panrega, kum la sagaŋɔ zɛ'ɛta ya nɛŋan. 16Se'ere n sɔe la, mam bo ya nɔɔrɛ zina wa te ya nɔŋɛ Na'ayenɛ ya Yenɛ la ge dɔla a sɔya la zan'an ge tara a nɔɔrɛ la a malema la a nɔze'elego la. Ge bala te ya wan vɔna ge wi'ɛ ge te Na'ayenɛ ya Yenɛ la wan kan' bahɛ ya zuo teŋsɛka poan te ya yɛ'a kɛn'ɛra te ya ta sɔe ka sɔna wa poan. 17Ge ya sunya la han ŋmɛregɛ zen'an kayema ha te ya ka nana te la ve'e ya keŋɛ te ya ta pɔnta na'ma baga nɛŋan kaanbera a, 18n yeti ya zina wa te ya wan nyɛ sagaŋɔ. Ya kan vɔna yuue teŋsɛka te ya yakera Yordan te ya ta sɔe sɔna wa poan. 19Zina dabaherɛ wa mam yi'ire la saazuo la teŋa te ba dɛna n seradoma, mam la yamam teŋasoka, te mam dekɛ la vom la kum, kan'an la woŋerɛ ze'ele ya nɛŋan. Bala, loe ya vom ge bala te yamam la ya kɔma wan vɔna 20ge te ya me nɔŋɛ Na'ayenɛ ya Yenɛ la kɛleha a nɔɔrɛ ge gin' en kaŋkaŋe. Na'ayenɛ de ya vom te a wan bo ya vom yuuma zo'e zo'e teŋsɛka te a pɔ' te a wan dekɛ bo ya sɔdoma Abraham la Isaak la Yakob la poan.

will be added

X\