Tɛɛnhegɔ 29

1Yele ana dela nɔbiŋere la yɛla te Na'ayenɛ yele Moses yeti a tɔgɛ pa'alɛ Israeldoma Moab teŋa poan, te a pa'ahɛ nɔbiŋere se'ere te a pon biŋe la ba Horeb Zoore zuo la. 2Te Moses lagahɛ Israel nɛreba la zan'an yele ba yeti, Ya mɛhe nini nyɛ sɛla woo te Na'ayenɛ eŋɛ Mizraim teŋa naba Faro la a kpɛ'ɛndoma la zan'an la teŋa la zan'an. 3Ya mɛhe nini nyɛ magahegɔ kanra se'a la nyalema la kerehe se'a te a dekɛ makɛ ba la zan'an. 4Ge tara tara la zina wa, Na'ayenɛ ka bo ya potɛn'ɛrɛ se'ere n bɔkere yɛla bii nini se'e n nyɛte bii tobɛ se'a n wune. 5Yuun pihinaahe la te mam daa tara ya bɔna mɔɔ la poan la, ya futo ka aanhom bii ya tagara kɔ'. 6Ya ka obere boroboro bii ya nyu' daam n ka kpe'em bii daam sebo n mɔle. Mam eŋɛ wana te ya mina te mam n de Na'ayenɛ ya Yenɛ la. 7Yan daa ta paɛ zen'kana wa poan na la, Hesbon naba Sihon la Basan naba Og yehe mɛ na te ba zabɛ la tɔ te to nyaŋɛ ba 8to'e ba teŋa la bo Areuben la Gad la Manase yizuo koyema la te la dɛna ba sɔ'ɔlom yɛ'ɛha. 9Ma'ɛn ya mɛhe dɔla nɔbiŋere wa yɛla wa soŋa, te bala te ya panrɛ sɛla woo poan te ya eta. 10Ya zan'an ze' la Na'ayenɛ ya Yenɛ la nɛŋan zina wa, ya nɛhedoma la nabiihe la keendoma la kpɛ'ɛndoma la ya Israel nɛreba zan'an, 11la ya kɔma la ya pɔgɔba la saama sɛba n lagom bɔna la ya ya tiiheŋɔ poan ŋmate ya dɔɔrɔ ge ziira ko'om bɔ'ɔra ya. 12Ya ze' ka'lam te ya kɛn' la nɔbiŋere poan la Na'ayenɛ ya Yenɛ la zina, nɔbiŋere se'ere te Na'ayenɛ mɛŋa biŋera la ya la nɔpɔtɛ, 13te la pa'alɛ zina wa te ya dela a nɛreba, te enŋa me ta'an dɛna ya Na'ayenɛ wo n biŋe a nɔɔrɛ la pɔtɛ se'em bo ya sɔdoma Abraham la Isaak la Yakob se'em la. 14Dagɛ te n biŋere nɔbiŋere wa la pɔtɛ wa bɔ'ɔra la yamam ma'an 15n ze' Na'ayenɛ to Yenɛ wa nɛŋan wa ma'an. N biŋere nɔbiŋere wa la yamam la la sɛba n pon nan ka bɔna teŋa wa zuo zina dabaherɛ wa. 16Ya mɛhe mi' tomam n daa boe Mizraim teŋa poan se'em la tomam n doohe teŋse'ehe n boe sore se'ere dɔla yɛ'a ka'lam na wa poan tole se'em. 17Ya nyɛ ba bagayooro la ba baga la n de dɔɔrɔ la kuga la sanlenpeelega la sanlema te ba dekɛ maalɛ a la. 18Behɛ ya soŋa, te boraa bii pɔka bii yizuo bii buuri, da bɔna ya poan zina wa te ba sunya ŋmɛregɛ yehe Na'ayenɛ to Yenɛ la zen'an ta kaanbera teŋhe sena wa baga la. Behɛ ya soŋa te nyɛgerɛ da bɔna ya poan tara yabega kana. 19Nɛre ena daana han wom pɔ sonɛ wa yɛla wa, a wan dekɛ a bo a mɛŋa, yele a suunre poan yeti, n pon eta mam bote se'em, ge kan'an wa wan lagom paɛ mam. Wana wan tare be'em wa'an ya bɔn'ɔrɔ n ma'ɛn la ya samana zuto na. 20Na'ayenɛ kan malom bahɛ a be'em la bo en. Na'ayenɛ sunsunyiim la a sunkerega wan taɛ bahɛ nɛre'ena daana zuo. Woŋerɛ seko woo n golehɛ eŋɛ gɔŋɔ kona wa poan la wan sige a zuo. Te Na'ayenɛ saalom a yu'urɛ teŋparɛ wa zuo bahɛ. 21Na'ayenɛ wan yehe en Israel yizuto wa woo poan ze'ele bo sagaŋɔ, te sagaŋɔ seko woo n golehɛ eŋɛ Pa'alegɔ Gɔŋɔ wa poan wa wan sige a zuo. 22Ya kɔma sɛba n wan wa'an ya booren na la saama sɛba n ze'ele sateŋhe wa'ana wan nyɛ nɔyalegerɛ se'ere n sige ya teŋa la zuo na la ban'ahe se'ehe te Na'ayenɛ dekɛ bahɛ ka zuo la. 23Ya teŋa la zan'an wan dɛna yaarom la bugum kuga. Te sɛla kan borɛ, te sɛla sɛla kan bule yehe ka zuo, tuntuuro kan bɔna ka zuo. Ka wan ana wo Sodom la Gomora teŋhe sagaŋɔ la bii Adma la Zeboiim teŋse'ehe te Na'ayenɛ sagom se la sunsunyiim la. 24Teŋhe woo wan sɔkera yeti, Wane te Na'ayenɛ eŋɛ teŋsena wa bala? Bene n ta'ahɛ Na'ayenɛ sunsun ana wa? 25Te lebehegɔ la wan dɛna la, Nɛrebana wa zagahɛ la nɔbiŋere te Na'ayenɛ ba sɔdoma Yenɛ la biŋe bo ba, saŋsɛka te a tare ba ze'ele Mizraim teŋa yehe na la. 26Ba zagahɛ mɛ ge keŋɛ ta kaanbera baga pɔnta na'ma ba nɛŋan, baga te ba ka mina, te Na'ayenɛ la ka dekɛ a bo ba. 27Bala n sɔe te Na'ayenɛ sunsunyiim taɛ bahɛ teŋkana wa zuo, te a bahɛ te woŋerɛ seko woo n golehɛ eŋɛ ganɛ wa poan la sige ka zuo na wa. 28Sunsunyiim toolɛ poan te Na'ayenɛ ze'ele vɔn' ba ba teŋa la poan, zan'ɛn ba ture teŋhe sese'ehe poan wo la ane se'em wa. 29Sɛla n sogɛ dela Na'ayenɛ to Yenɛ la ma'an denɛ, ge sɛla n nɛɛ pa'alɛ dela tomam la to kɔma yɛ'ɛha te to dɔla pa'alegɔ wa yɛla la zan'an.

will be added

X\