Tɛɛnhegɔ 25

1Nɛreba han tara nɔkpe'ene, ba wan tare keŋɛ yetɔgom zen'an la te yelegankereba la ta behɛ yele la, bahɛ boorɔ daana la ge zɛrɛgɛ se'em n tue la. 2Se'em n tue la han dɛna la ya ŋmɛ' en, yelegankera la bahɛ te a gan'arɛ te ba ŋmɛ' en a ninin, a tuure la n de ba ŋmɛ' en kpa'aha sugumnɔɔren se'em, 3ge a da bo en gaŋɛ kpa'aha pihinaahe. Ya han ŋmɛ' en gaŋɛ bala, a wan di vi ya nɛŋan. 4Da lo lɔlega nɔɔrɛ ge tare ka tɔɔra ki. 5Sɔɔnrɔ han lagom bɔna te ba ayema ki ge ka tara bia, a pɔga la da ele yeŋa, se'em n dagɛ a sera la buuri poan. A sera la sɔɔn to'e en di te bɔna la en woo a sɔɔn la. 6Te bodibila sɛka te a dɔgɛ yia la wan dekɛ segɛ a sɔɔn la n ki la, te a yu'urɛ la da saalom Israel poan. 7Ge boraa sɛka han kan di a sɔɔn pɔkɔɔnrɛ, a sɔɔn la pɔga la yehe keendoma la n zin' teŋa la nayaŋa nɔɔrɛn la nɛŋan yele ba yeti, n sera sɔɔn wa ka sakɛ te a tee ze'ele a sɔɔn la na'arɛ te a yu'urɛ pota kelom Israel wa poan. A ka sakɛ te a sɔe a sɔɔn la na'arɛ bɔna la mam. 8Teŋa la keendoma la wan yi boraa la na zin'ire sɔnhɛ la en. Te a han sina ge yeti, n ka bote n di en, 9a sɔɔn pɔga la wan keŋɛ paɛ a nɛŋan keendoma la nɛŋan pirege a tagatɛ deyema, ge tobehɛ nɔtɔɔnrom ma' a nɛŋa ge yele en yeti, ba ne eŋɛ boraa sɛka n kan mɛ ka sɔɔn buuri se'em n bala. 10Boraa kaŋa buuri la zan'an yu'urɛ wan yi'ira A Ka Tare Tagara Yiredoma Israel teŋa la poan. 11Boraahe seyi' han zabera, te ba ayema pɔga wa'ana te a fan' a sera la a tadaana la nu'uhen, han gi la boraa la kayema lama vɛ'ɛra, 12kɔ'ɔn kɛ' ya ka nu'o seko te a dekɛ gin' la fike ge da zɔ ya ninbɔn'ɔn. 13Da tara sɛla n tare magaha lɔgɔrɔ la bayi' ho tapɔɔ poan, te ayema tebegɛ te ayema fakɛ. 14Da tara sɛla te ba tara magaha lɔgɔrɔ la bayi' ho yire, te ayema kanregɛ te ayema pɔ'ɛ. 15Tare sɛla te ba tara magaha lɔgɔrɔ zo'ore bii tebehom la, te ba zona wo lan sontii te ba zona se'em la. Bala te ya wan vɔna yuue teŋsɛka te Na'ayenɛ ya Yenɛ la dekera bɔ'ɔra ya la. 16Na'ayenɛ ya Yenɛ la ka bote nɛra se'em n ete yele ana, se'em n pini. 17Tɛnre ya Amalekdoma n yuun eŋɛ ya se'em sore la zuo, yan yuun yehe Mizraim teŋa yɛ'a na la. 18Ya yuun kene na taregɛ ba'ahɛ la, ba yuun yehe mɛ na ko sɛba n yee pooren la ka zɔ Yenɛ. 19Na'ayenɛ ya Yenɛ la han ta bo ya vo'ohogo ya diŋdoma sɛba n kae ya bahɛ teŋsɛka te a dekera bɔ'ɔra ya ta ka dɛna ya sɔ'ɔlom wa poan, ya kɔ'ɔn saalom Amalekdoma wa teŋparɛ wa zuo zan'an bahɛ. Tɛnre ya yele dena wa.

will be added

X\