Tɛɛnhegɔ 23

1Boraa sɛka te ba zan' ka bii fike ka boraanɛ da lagom pa'ahɛ Na'ayenɛ nɛreba la poan. 2Yiyɛa bia bii a yaaŋa, pɔhera yaaŋa kayena ta paara a yaan pia buuri saŋa la woo da lagom pa'ahɛ Na'ayenɛ nɛreba la poan. 3Ammon bii Moab nɛra bii ba yaaŋa sɛka ta paara ba yaan pia buuri saŋa la woo da lagom pa'ahɛ Na'ayenɛ nɛreba la poan. 4Yan daa yehe Mizraim teŋa na la, ba daa ka to'ohɛ ya la dia la ko'om sore la zuo. Ge ba mɛ ta dekɛ Beor n yehe Petor teŋa n boe Aram Naharaim teŋa poan la dayɔa Balaam wa'ana te a pɔ' bahɛ ya zuo. 5Ge bala zan'an, Na'ayenɛ ya Yenɛ daa ka kelehe Balaam, ge tuluge a nɔpɔtɛ la te de dɛna kan'an bɔ'ɔra ya. Se'ere n sɔe Na'ayenɛ ya Yenɛ la n nɔŋɛ ya la. 6Da eere ya sunma'ahom bii sona la ba ya vom woo poan. 7Da tamɛ ya Edom buuri wa bahɛ. Se'ere n sɔe ba dela ya sɔɔnrɔ. Da tamɛ ya Mizraim buuri la bahɛ. Se'ere n sɔe ya tabelɛ dɛna saama ba teŋa la poan. 8Ban dɔgɛ kɔma sɛba la yaan atan' buuri lagom pa'ahɛ Na'ayenɛ nɛreba la poan. 9Ya han ta tiihom pɛɛm bon'en te ya zabɛ la ya diŋdoma, yehe ya mɛŋa sɛla woo n de dɛngerɔ poan. 10Boraa sɛka ya poan han zaanhom gan'arɛ la pɔka, ka yehe tiiheŋɔ la poan lebe kenkɛleŋa ta bɔna. 11Ge yɛ'a zanɔɔrɛ bɔba a pee a mɛŋa, te yenɛ ta lu te a lebe na. 12Maalɛ ya zen'an ya tiiheŋɔ la kenkɛleŋa, kena bilam donbeta ya na'ma. 13Tare ya tun'an lɔkɔ pa'ahɛ ya lɔgɔrɔ la poan, te ho han ta yeti ho dɔnbelɛ ho na'ma, ho dekɛ tun' boko dɔnbelɛ ho na'ma la ba'ahɛ ge lebehe pin'. 14Se'ere n sɔe la Na'ayenɛ ya Yenɛ la eere ya poan la bala ya tiiheŋɔ la poan te a gu' ya ge fan' ya ya diŋdoma la nu'uhen bahɛ. Bahɛ ya te ya tiiheŋɔ zen'an la dɛna toolom zen'an te a da nyɛ denkɔ bini la a zagahɛ ya. 15Da'aberɛ han ze'ele de daana zen'en zɔ wa'an ho zen'an na te ho to'e en bahɛ, da ta'ahɛ dɛ lebe de daana la zen'an. 16Bahɛ ya te de bɔna la ya denɛ bote zen'an, la teŋsɛka poan te de bɔta ya teŋa la poan. Da namehere ya dɛ. 17Israel boraa bii pɔka da kɛn' la baga yire la poan dekɛ a mɛŋa bo yaalegɔ. 18Da to'ohere ya boraa bii pɔka n de yaloma n pɔ' te a yɔ sɛla la kɛn'ɛra Na'ayenɛ ya Yenɛ la yire la poan na. Se'ere n sɔe, Na'ayenɛ ya Yenɛ la ka bote lɔgɔtonɔ. 19Da dɔgelɛ ho sɔɔn te ho peŋɛ en ligiri bii dia bii lɔgɔseko te ho dɔkɛ. 20Ho ta'an dɔgelɛ saana, ge dagɛ ho Israel sɔɔn. Bala te Na'ayenɛ ya Yenɛ la wan kan' bahɛ ya nu'uhe tooma woo poan, teŋsɛka te ya kɛn'ɛra te ya ta sɔe ka sɔna wa poan. 21Ho han pɔ' nɔɔrɛ la Na'ayenɛ ho Yenɛ la te ho wan bo sɛla, da go'om de bɔ'a. Se'ere n sɔe, Na'ayenɛ ho Yenɛ la gure de mɛ te ho wan tara tuure de zuo. 22Ya han ka pɔ' nɔɔrɛ la dagɛ be'em. 23Ho nɔɔrɛ en yelese'ere la, behɛ soŋa tom dɛ wo la han de popeelom bo'olom te ho pɔ' nɔɔrɛ te ho wan bo Na'ayenɛ ho Yenɛ. 24Ho han kɛn' ho tadaana tiihe va'am poan, di hom bote wɔla la se'em. Ge da go'ohe sun' tapɔɔ poan. 25Ho han kɛn' ho tadaana dia va'am poan, kɔ' la nu'uhe. Ge da kɛ la kɛɛrega.

will be added

X\