Tɛɛnhegɔ 22

1Ho han nyɛ' te ho sɔɔn lɔlega bii a pehego tuune yɛ'a da bahɛ kɔ, pe'e tare lebe ta bo en. 2Ge ho sɔɔn la yire han ka lɛm bii ho pon ka mina duŋa la doma, tare ka kule ho yire ta behera gura te ka doma ta ɛ' na, te ho pe'e bo en. 3Ho han nyɛ te ho sɔɔn boŋa bii a futo bii a lɔgɔseko en bɔregɛ te ho nyɛ, eŋɛ bala mea bo en. 4Ho han nyɛ te ho sɔɔn boŋa bii lɔlega lu gan'an sore zuo, da bahɛ en ge soŋɛ en dooe ka ihege. 5Pɔka da sɛngeta boraan lɔgɔrɔ. Boraa me da sɛngeta pɔgen lɔgɔrɔ. Se'ere n sɔe la Na'ayenɛ ya Yenɛ la ka se'em ete bala. 6Ho han nyɛ niiŋa teko sore nɔgbenɛ, tia zuo bii teŋa, te niiŋyan'aŋa la uma kɔma bii gɛla zuo, da nyɔkɛ niiŋyan'aŋa la ka kɔma la keŋɛ. 7Ho ta'an dekɛ ka kɔma la, ge bahɛ niiŋyan'aŋa la. Bala te sɛla woo wan ana soŋa bɔ'ɔra ya, te ya tara vom woko. 8Ho han mɛ yire paalɛ, tɛnra mɛ gɔhɔwama kae, te se'em da ta zom bini lu na ki te a taala dɔla ho yire la. 9Da borɛ bonbuula buuri boyi' tiihe va'am deyena poan. Ho han eŋɛ bala, sɛla te ba wom sɛla la dela ganleŋɔ bonɔ. 10Da yɔgɛ lɔlega la boŋa kɔɔra. 11Da yɛ' fuseko te ba dekɛ guno mɛŋtɔ la kɔnberɔ guno wogɛ. 12Kpa' ya sanba lamenɛ ya futo zotehe senaahe la zan'an. 13Boraa han di' pɔga baŋɛ ka ge ka le ta pɔta ka, 14ge dɔla fakera ka bo en yu'urɛ be'o yɛta yeti, mam di pɔka ge mam ta yeti n baŋɛ ka la ka pon mina boraahe mɛ, 15pugula la sɔ la ka ma nya wan tare danlehom sebo n pa'alɛ yeti ka daa ka mi' boraa ge ele la na bo keendoma la n zin' nayaŋa nɔɔrɛn la. 16Pugula la sɔ wan yele keendoma la yeti, mam dekɛ n bipugula wa elehe boraa wa, ge nananawa a ka le bɔta ka, 17ge fakɛ ka zuo yeti, ho pɔyɔa la daa pon mina la boraahe, ge bilam te ka dɔgɔreba la nya wan dekɛ fuo la pa'alɛ teŋa la keendoma la. 18Te teŋa la keendoma la wan nyɔkɛ boraa kana wa namehɛ ka soŋa. 19Ba wan le kɛɛ en sanlenpeelega kpila kɔbega, to'e bo pugula sɔ la. Se'ere n sɔe la, boraa wa fakɛ la Israel pɔgɔsa'a kanherɛ zuo. Te pugula la me wan kɔ'ɔn dɛna la a pɔga ge a kan ta'an bahɛ ka, gura a kum. 20Ge boraa la n yele se'em la han dɛna yelemɛŋɛrɛ, te sɛsɛla ka bɔna pa'alɛ te pɔka la daa ka mi' boraahe, 21ba tare ka wa'ana ze'ele ka sɔ zanɔɔren, te teŋa la poan boraahe lobe en la kuga ko. A tom zufagahom toonɛ Israel teŋa wa poan, enŋa n nan boe a sɔ yire ge sagom la. Foe ya be'em la ya poan. 22Boraa han gan'anrɛ la nɛra pɔga te ya nyɛ, ko boraa la la pɔka la zan'an. Foe ya be'em la ya poan. 23Boraa han ta nyɛ pɔgɔsa'a kanherɛ te ba maahom te ka ele nɛra, te a gan'arɛ la ka, 24tare ba yehe teŋa la nayaŋan la na lobe ba kuga ko. Pugula la n wan ki la dela a boe la teŋa poan ge ka kaahɛ te nɛreba wa'ana soŋɛ en. Boraa la me n wan ki la dela a sagom la ayema pɔga n bala. Foe ya be'em la ya poan. 25Ge la han dɛna la sɛnka poan ha te boraa ta nyɛ pugula te ba maahom te ka ele sera te a zɛ ka, ko ya boraa la ma'an. 26Da ko ya pugula la, a ka tom be'em sebo n de a ki. Dena wa ane woo nɛra n pigihe gin' a tadaana ko en la. 27Boraa la nyɛ pugula la la mɔen ha, te pugula wa te ba yeti ba dekɛ ka bo nɛra la kaahɛ, ge nɛra ka boe ya nɔɔrɛ wan soŋɛ en. 28Boraa han gan'anrɛ la pugula n nan ka tare bɔta, te a zɛ ka te la yehe na, 29a yɔ pugula la sɔ sanlenpeelega kpila pihinuu ge a di pugula la. Se'ere n sɔe la, a fakɛ la ka zuo. A me da bahɛ ka gura a kum. 30Nɛra da di a sɔ pɔga, a da sagom a sɔ soŋɔ.

will be added

X\