Tɛɛnhegɔ 21

1Ya han ta nyɛ' te ba kɔrɔgɛ nɛra biŋe samanɛ zuo, teŋsɛka te Na'ayenɛ ya Yenɛ la dekera bɔ'ɔra ya te ka dɛna ya sɔ'ɔlom la poan, te ya ka baŋɛ se'em n ko en, 2ya keendoma la gankereba la yehe ta makɛ kum la n gan' zen'en la keŋɛ teŋse'ehe n lɛm bilam la. 3Ge keendoma la n boe teŋsɛka n ba' lɛm kum la, wan tare nagesa'arɛ n nan ka dekɛ tom toonɛ te yɔgɔhɔga nan ka pagelɛ ka zuo na, 4tare nagesa'arɛ la sige bɔn'ɔn seko te ba nan ka tabelɛ kɔ bii borɛ sɛla ko poan, ge te kolaa zɔta ko poan. Bɔn'ɔn la poan bilam te ba wan kɔ' nagesa'arɛ la nyugela. 5Levi dayɔɔhe n de malemadoma la n wan tole nɛŋa na. Se'ere n sɔe la Na'ayenɛ ya Yenɛ la n loe ba te tona, ba tara Na'ayenɛ yu'urɛ la kan'ara, ge ku'ura yele woo la nɔkpe'enɛ la gbirigere woo. 6Keendoma la woo n boe teŋse'ehe n lɛm kum la nya wan pee ba nu'uhe bahɛ nagesa'arɛ la te ba kɔ' ka nyugela bɔn'ɔn la poan la zuo, 7ge yeti, Tomam nu'o ka ka'ɛ ziim bona wa bii to nini nyɛ bo ka'arɛ. 8Na'ayenɛ, to'e kaanbegɔ wa ho nɛreba Israel sɛba te ho yɔ to'e la nu'uhen ge da bahɛ te ho nɛreba wa tara tuure la nɛra wa ziim wa te to ka mina bo ka'arɛ yele wa. Ziim la kaanbegɔ n wan bala. 9Bala te ya wan foe ya mɛŋa ziim sebo te ya ka mina bo ka'arɛ yele la taalɛ poan, la yamam eŋɛ sɛla n ane soŋa Na'ayenɛ nɛŋan la zuo. 10Ya han keŋɛ pɛɛntɛɛnrɛ te ya zabɛ la ya diŋdoma te Na'ayenɛ ya Yenɛ la dekɛ ba eŋɛ ya nu'uhen, te ya nyɔkɛ ba, 11te ho behɛ ba poan te pɔka boe bini ana soŋa te ho sea kɛn' ka, ho ta'an di ka te ka dɛna ho pɔga. 12Tare ka kule ho yire na, te ka siie ka zuo seele ka nu'ɛɛnhe 13ge yɛɛhɛ a lɔgɔseto te a yɛ ne te ba nyɔkɛ en la. Ka wan bɔna ho yire kele ka sɔ la ka ma ŋmarega mune, ge te ho nya baŋɛ ka dɛna ka sera te enŋa me dɛna ho pɔga. 14Ho han ka le bɔta en, bahɛ en te a keŋɛ enŋa n bote zen'an. Ho da koohe en bii ho eta en wo da'aberɛ. Se'ere n sɔe ho fakɛ en mɛ. 15Nɛra han tara pɔgɔba bayi', nɔŋɛ ayema ge ka nɔŋɛ ayema la, te ba zan'an dɔgɛ bodibinto te bikeema la dagana pɔgɔsɛka to a nɔŋɛ la bia, 16a han ta tɔnta a lɔgɔrɔ la, a da dekɛ keema la tɔntɛ bo bia la se'em ma te a nɔŋɛ la, ge bahɛ a dayɔkeema la te a ka nɔŋɛ a ma la. 17A behɛ nyɛ a pɔga sɛka te a ka nɔŋɛ la bia la te kaŋa n de a dayɔkeema, la a te bo en sɛla woo te a tara la sugumnɔɔren boyi'. Dayɔkaŋa n de ka sɔ la boraanɛ danlehom. Bikeema lɔgɔrɔ dela kaŋa denɛ. 18Nɛra han tara a dayɔa n ganrɛ te ka toba kpa' te ka ka nana ka sɔ la ka ma, te ba han pon dɔnlegera a toberɛ ka ka kelehe ba, 19ka sɔ la ka ma la nyɔkɛ ka na eŋɛ teŋa la keendoma la en zin' nayaŋa nɔɔrɛn la nu'uhen. 20Dɔgɔreba la wan yele keendoma la yeti, To bia wa ganrɛ mɛ, te ka toba kpa'. Ka ka nane tomam. Ka dela yaloma, dɛna bugura. 21Teŋa la poan boraahe lobe bikana taaba la kuga ko. Foe ya be'em la ya poan. Israel zan'an wan wom de yele te dabeem kɛn' ba. 22Nɛra han tom yelebe'o n kanregɛ, te ya lo n yule tia zuo, 23da bahɛ ya te a yula bini yiligɛ beere. Laɛ ya n de daarɛ mea. Se'ere n sɔe la se'em woo te ba yule en tia zuo boe la Yenɛ nɔpɔtɛ poan. Da ganlom ya teŋa la te Na'ayenɛ to Yenɛ la dekera bɔ'ɔra ya te ka dɛna ya sɔ'ɔlom la.

will be added

X\