Tɛɛnhegɔ 20

1Ya han ne ta yehe pɛɛntɛɛnrɛ la ya diŋdoma, ta nyɛ ba yiri la i toroto la pɛɛntɛɛnreba n gane ya, da zote ya dabeem la ba. Na'ayenɛ ya Yenɛ la tare ya ze'ele Mizraim yehe na la wan bɔna la ya. 2Ya han ne ta bɔna bini te ya yehe zaberɛ, malemadaana la ne yehe na tɔgɛ bo pɛɛntɛɛnreba la. 3A ne wan yele ba yeti, Kelehe ya Israel nɛreba wa, zina ya yehe la pɛɛnbɔn'en te ya to'ohɛ ya diŋdoma. Da bahɛ ya te ya paleŋa ɛngera bii dabeem tara ya. Da bahɛ ya te giinla kɔ'ɔhɛ bii ya gbe'era ba nɛŋan. 4Na'ayenɛ ya Yenɛ la n de se'em n dole la ya yɛ'a te a zabɛ la diŋdoma la ya zuo ge bo ya nyaŋerɛ. 5Kpɛ'ɛndoma la nya ne wan yele pɛɛntɛɛnreba la yeti, Se'em boe ka'lam mɛ a yire nan ka kɛn' dɛ poan? A lebe kule, ge a ta'an ta ki zaberɛ la poan, te nɛra se'em sɔe kɛn' dɛ poan. 6Se'em borɛ a tiihe va'am nan ka pɔhɛ bo dia? A lebe kule ge a ta'an ta ki zaberɛ la poan te nɛra se'em sɔe bo dita. 7Se'em boe maahena te a di pɔga? A lebe kule ge a ta'an ta ki zaberɛ la poan te nɛra se'em sɔe di ka. 8Kpɛ'ɛndoma la wan nya le yeti, Se'em boe te dabeem tara en bii a paleŋa ɛngera? A lebe kule ge a wan bahɛ te a sɔɔnrɔ la giinla kɔ'ɔhɛ. 9Kpɛ'ɛndoma la han ta tɔgɛ bo nɛreba la ba'ahɛ, ba nya loe nɛŋadoma bo ba. 10Ya han ne keŋɛ te ya zabɛ la teŋsɛka, ne bo ka nɛreba la sunma'ahom yia. 11Ba han sakɛ yu'ɛ ba teŋa la nayahe la bo ya, ya dekɛ nɛreba la zan'an n boe ka poan la pɛnregɛ ba te ba tona toonkpɛ'ɛma bɔ'ɔra ya. 12Ge ba han ka sakɛ te ba eŋɛ sunma'ahom la ya, ge zabera mɛ la ya, ya gilige teŋkaŋa mum gura ka. 13Na'ayenɛ ya Yenɛ la han dekɛ ka eŋɛ ya nu'uhen, ya ko boraahe woo n boe ka poan. 14Han dɛna pɔgɔhe la kɔma la dunhe la sɛla woo n yee ka poan la, tara bama te la dɛna yan fan' sɛla n bala. Tara lɔgɔseto te Na'ayenɛ ya Yenɛ la fan' ya diŋdoma zen'an bo ya la. 15Yan wan eta teŋbibihe se'ehe n zaan la ya ge dagana teŋse'ehe n lɛm se la sɔ'ɔlom la se'em n bala. 16Ge han dɛna teŋkanra la n boe teŋse'ehe te Na'ayenɛ ya Yenɛ la dekera bɔ'ɔra ya te ka dɛna ya sɔ'ɔlom la poan, da bahɛ te bonvɔa buute yee se poan. 17Kɔ'ɔn sagom ya ba zan'an zan'an, Hitidoma la Amoridoma la Kanaandoma la Perizidoma la Hivdoma la Yebusdoma la zan'an, wo Na'ayenɛ ya Yenɛ la n bo ya a nɔɔrɛ se'em la. 18Han dagana bala, ba wan pa'alɛ ya toonfɛn'ɛha se'a te ba kaanbera ba baga la ge tona la, te ya tom be'em bo Na'ayenɛ ya Yenɛ la. 19Ya han ne gan'an pigira teŋa te la yuura zabera la ka te ya nyaŋɛ ka, da ŋmate ya ka tiihe la lea baha. Se'ere n sɔe la, ya ta'an dita se wɔla la. Da ŋma ya se bahɛ. Tiihe n ze' samanɛ zuo dela nɛreba te ya pigira? 20Ya ta'an ŋma tiise'ehe te ya mina te se ka wone la tara tin'ira dɔtɔ, gura te teŋa la n zaberɛ la ya la ta lu.

will be added

X\