Tɛɛnhegɔ 2

1Te to ŋmɛregɛ lebe pooren, tɔ pɔgɔtia poan sore la n dole yɛ'a Mɔgɔ Mɔlega poan la wo Na'ayenɛ n pa'alɛ mam se'em la. Te to viliŋera kaara Seir zoore la dabeha kekeko. 2Te Na'ayenɛ yele mam yeti, 3ya viliŋom kae zoore wa yuue. Ŋmɛregɛ ya zuɔ. 4Bo' nɛreba wa nɔɔ ana wa. Yele ba yeti, ya boe bini te ya doohe la ya sɔɔnrɔ la n de Esau yaahe kɛn'ɛra Seir teŋa wa poan la tole. Ba wan zɔta dabeem la ya, ge ma'ɛn ya mɛŋa. 5Da nyiihe ya ba sunsunya te ya zabɛ la ba. Mam kan dekɛ ba teŋa la zen'an bo ya. N pon kan bo ya la fiin me te la paɛ na'arɛ tagalegɔ. Mam dekɛ Seir zoore teŋa wa bo la Esau te ka dɛna a sɔ'ɔlom 6Disɛka te ya wan di la ko'om sebo te ya wan nyu' ka poan, da' ya la ya ligiri. 7Na'ayenɛ ya Yenɛ la pon kan' som bahɛ ya tooma poan mɛ te sɛla ka koŋe ya. A behera ya la bala ya kenɛ pɔgɔtia wa poan. Yuuma pihinaahe wa zan'an, Na'ayenɛ ya Yenɛ la boe mɛ la ya te sɛla sɛla ka koŋe ya. 8Te to doohe to sɔɔnrɔ Esau yaahe wa n boe Seir teŋa wa zen'an tole. Bahɛ sɛnka sore la n dole Elat la Ezion Geber poan na la, ge ŋmɛregɛ doohe Moab pɔgɔtia sore la. 9Te Na'ayenɛ yele mam yeti, Da nyɔkɛ ya Moabdoma wa bii ya nyiihe ba sunsunya te ya zabɛ la ba. Mam kan dekɛ ba teŋa la zen'an bo ya. Mam dekɛ Ar teŋa wa bo la Lot la a yaahe te ka dɛna ba sɔ'ɔlom. 10Emdoma n ne kɛn'ɛra bini. Ba dela panhedoma ge me zo'e ba kanlɛ poan, dɛna nɛre dareba wo Anakdoma la. 11Bama la Anakdoma dɛna Arepadoma, ge Moabdoma la n yi'ire ba Emdoma. 12Hordoma n yuun kɛn'ɛre Seir teŋa wa poan te Esau yaahe dige ba teŋa la poan, ko ba wa zan'an ge sɔe teŋa la sɔna, wo Israel n eŋɛ teŋhe se'ehe te Na'ayenɛ dekɛ bo ba te se dɛna ba sɔ'ɔlom la se'em la. 13Te Na'ayenɛ yele mam yeti, Ihege yakɛ Zered Bɔn'ɔn wa. Te to yakɛ Zered Bɔn'ɔn la. 14Yuuma pihitan' la anii n ta tole ge te to ze'ele Kades Barnea teŋa na yakɛ Zered Bɔn'ɔn la. Bala ma'an te boraahe se'ehe n seke pɛɛntɛɛnrɛ saŋkaŋa poan la woo ki ba'ahɛ mɛ to poan wo Na'ayenɛ n pɔ' bo ba se'em la. 15Na'ayenɛ nu'o n zaberɛ la ba, tara tara ta foohe ba zan'an to poan. 16Sɛba n seke pɛɛntɛɛnrɛ saŋkaŋa poan ha la daa kelom gee to poan la zan'an n ta ki ba'ahɛ la, 17te Na'ayenɛ nya yele mam yeti, 18Zina, ya wan doohe la Ar teŋa poan kɛn' Moab teŋa poan tole. 19Ya han ta paɛ Ammondoma teŋa la na, da nyɔkɛ ya ba bii ya nyiihe ba sunsunya te ya zabɛ la ba. Mam kan dekɛ ba teŋa la zen'an bo ya. Mam dekɛ ka bo la Lot yaahe te ka dɛna ba sɔ'ɔlom. 20Kaŋa me dela Arepadoma teŋa te ba daa kɛn'ɛra, te Ammondoma wa yi'ire ba Zamzumdoma. 21Ba dela panhedoma, ge zo'e ba kanlɛ poan, dɛna nɛre dareba wo Anakdoma la. Ge Na'ayenɛ sagom ba Ammondoma la nɛŋan ge te ba sɔe ka sɔna. 22Na'ayenɛ eŋɛ la bala mea bo Esau n kɛn'ɛre Seir teŋa la poan la, sagom Horidoma la ge te ba sɔe ka sɔna la zina wa. 23Ge han dɛna Avidoma sɛba n kɛn'ɛre teŋbibihe n zaan ta paara Gaza la, Kaptordoma n ze'ele Kaptor teŋa yehe na ba'ahɛ bama zan'an ge sɔe ba teŋhe la bɔna. 24Maahom ya nananawa la ya yakɛ Arnon Kolaa la. Behɛ ya, n dekɛ Amori boraa Sihon n de Hesbon naba la la a sɔ'ɔlom la zan'an eŋɛ ya nu'uhen. Pɔhɛ ya faanra ka, ge mɔ'ɛ nini zabɛ la en. 25Zina dabaherɛ wa yɛ'ɛha, n wan pin'ilom bahɛ te teŋa woo zɔta dabeem la ya. Ba wan wona ya yɛla te la tara ba paleŋ'ɛnka. 26To ta bɔna la Kedemot pɔgɔtia la ha te n tom nɛreba Hesbon teŋa naba Sihon zen'an, te ba ta belom en yeti, 27Bahɛ te to doohe ho teŋa la poan tole. To wan dɔla la sɔrɔɔ dɔɔ la zuo ma'an. To kan ŋmɛregɛ lebe zuɔ bii gɔbega. 28Koohe hom koohere ho dia se'em bo to te to da' di, ge koohe hom koohere ho ko'om se'em bo to te to da' nyu'. Hom yeen bo to na'arɛ tagalegɔ zen'an ma'an te to tagalɛ tole, 29wo Esau yaahe la n boe Seir poan la, la Moabdoma n boe Ar teŋa n eŋɛ to se'em te to tara tara na yakɛ Yordan Kolaa wa nya kɛn'ɛra teŋsɛka te Na'ayenɛ to Yenɛ la dekera bɔ'ɔra to wa poan la. 30Te Hesbon naba Sihon zagahɛ to beloŋo la, ka sakɛ te to kan nɛ enŋa teŋa poan tole. Se'ere n sɔe la, Na'ayenɛ ya Yenɛ la n boe en sunkanberɛ te a ta'an dekɛ en eŋɛ ya nu'uhen wo n eŋɛ se'em wa. 31Te Na'ayenɛ yele mam yeti, Behɛ! N pɔhɛ dekɛ Sihon la a teŋa la zan'an bɔ'ɔra ya mɛ n bala. Pɔhɛ ya dige ba ge fan' ba teŋa la sɔna. 32Sihon la a pɛɛntɛɛnreba zan'an n ta to'ohɛ to Yahaz na la, 33te Na'ayenɛ to Yenɛ la dekɛ en eŋɛ to nu'uhen te to aanhom enŋa la a dayɔɔhe la a pɛɛntɛɛnreba la zan'an. 34Bala ma'an te to fan' a teŋhe la zan'an, ko a nɛreba zan'an, boraahe, pɔgɔhe la kɔma zan'an, te nɛrevɔa la ayena me ka gee bini. 35Ge dunhe la lɔgɔseto woo te to fan' la zan'an dela to denɛ. 36Ze'ele Aroer, Arnon Kolaa la giŋgiliŋa la, la teŋhe se'ehe n boe kolaa la zen'an la, tara ta paɛ Gilead teŋa na, teŋa la kayena me ka boe kpe'em bo to. Na'ayenɛ to Yenɛ la dekɛ se zan'an eŋɛ la to nu'uhen. 37Ge doohe la Na'ayenɛ to Yenɛ la n bo a nɔɔrɛ se'em la zuo, ya ka daam Ammondoma la bii ba teŋhe se'ehe n boe Yabok Kolaa la beene bii ba teŋhe se'ehe woo n lɛm teŋhe se'ehe n yage zoore zuo la.

will be added

X\