Tɛɛnhegɔ 19

1Na'ayenɛ ya Yenɛ la han ta sagom teŋhe se'ehe te a yeti a dekɛ bo ya la nɛreba ba'ahɛ, te ya dige ba ge sɔe teŋhe la kɛn'ɛra ba yiya la poan, 2ya yehe teŋhe setan' te se bɔna Na'ayenɛ ya Yenɛ la n bo ya teŋsɛka te ya sɔna la poan teŋasoka. 3Te ya maalɛ sɔya kɛn' se poan. Ya poregɛ teŋa la te Na'ayenɛ ya Yenɛ dekera bɔ'ɔra ya te ka dɛna ya sɔ'ɔlom la sugumnɔɔren botan', te se'em n ka baŋɛ ge ko' nɛra, a wan zɔ keŋɛ bilam. 4Ze'elego seko n boe bo nɛra en ka baŋɛ ge ko nɛra, ge zɔ keŋɛ bini a vom zuo, wo nɛra se'em n ka baŋɛ ge ko nɛra te a ka tara daaŋɔ la en. 5Wo nɛra n doohe a tadaana keŋɛ te ba ŋma dɔɔrɔ, te en ta zɛnkɛ lea la te a ŋmaɛ tia la, te lea la zuo fokɛ ŋmɛ' a tadaana la te a ki. Boraa kaŋa la ta'an zɔ keŋɛ teŋhe sena wa kayema poan a vom zuo. 6Han dagana bala, se'em n lerege wan eŋɛ suunre dige ta nyɔkɛ en, wo teŋa la han zaan, ko en. Ge te a me ka nare ne a ki. Se'ere n sɔe la, a ka tɛn'ɛhɛ be'em a potɛn'ɛren ge eŋɛ a tadaana la bala. 7Wana te en bɔ'ɔra ya nɔɔrɛ te ya yehe teŋhe setan' biŋe bo ya mɛhe la. 8Na'ayenɛ ya Yenɛ la han yalegɛ ya teŋa la wo n biŋe a nɔɔrɛ la ya sɔyaabdoma la pɔtɛ se'em la, ge dekɛ teŋa la zan'an bo ya wo enŋa n biŋe nɔɔrɛ la ba se'em la, 9doohe la yan ma'ɛn ya mɛhe dɔla pa'alegɔ la te n bɔ'ɔra ya zina te ya nɔŋɛ Na'ayenɛ ya Yenɛ la ge dɔla a sɔya la saŋa woo la zuo, ya yehe teŋkanra atan' pa'ahɛ. 10Eŋɛ ya wana te ziim ka'ahegɔ yoo yoo da bɔna teŋa la te Na'ayenɛ ya Yenɛ dekera bɔ'ɔra ya te ka dɛna ya sɔ'ɔlom la poan, ge te la me gu' te ziim ka'ahegɔ taala da dɔla ya. 11Ge nɛra han yaɛ a tadaana, ta sogɛ gura en, lure en ko' ge zɔ keŋɛ teŋhe sena wa kayema poan, 12keendoma n boe a teŋa la poan la tom te ba ta tare en na lebe bo se'em wan n wan lerege la te a ko. 13Da zɔ' ya a ninbɔn'ɔn. Foe ya se'em ka'ahɛ ziim sebo en ka tare taalɛ la Israel teŋa poan bahɛ, te la ana ya soŋa. 14Da vuruge ho taaba beene kugure la te ho yaabdoma sɛ dɛ ho tɔntɛ n de se'em teŋa la te Na'ayenɛ ya Yenɛ la dekera bɔ'ɔra ya te ka dɛna ya sɔ'ɔlom la poan. 15Seradaana ayena da ze'ele tɔgɔ nɛra te ba zuunhe en te a sagom la yele. Yele woo poan, seradoma la dɛna bayi' bii batan'. 16Se'em n yaɛ nɛra han dɛna seradaana, zuunhe nɛra te a sagom la yele, 17bama bayi' la n tare nɔkpe'ene la wa'ana ze'ele Na'ayenɛ nɛŋan, malemadoma la gankereba la n boe saŋkaŋa poan la nɛŋan. 18Gankereba la ihege saazuo ɛ' yele la, te seradaana la han parom mɛ, parom bo a taaba la, 19eŋɛ ya en wo enŋɛ n tɛn'ɛhere ne te a eŋɛ a sɔɔn la se'em la. Foe ya be'em la ya poan. 20Nɛresɛba n yee la woo wan wom te dabeem kɛn' ba, te be'em bona taaba kan tom ya poan. 21Da zote ya ninbɔn'ɔn. Vom teere la vom, niho teere la niho, nyɛnɛ teere la nyɛnɛ, nu'o tɛɛra la nu'o, na'arɛ teere la na'arɛ.

will be added

X\