Tɛɛnhegɔ 18

1Malemadoma wa la Levidoma la zan'an ka tare tɔntɛ bii sɔ'ɔlom Israel poan. Ba di' la bo'olom te nɛreba tara bo Na'ayenɛ ge ba tara tɔnte enŋa sɔ'ɔlom. 2Ba kan tara sɔ'ɔlom la ba sɔɔnrɔ la. Na'ayenɛ mɛŋa de ba sɔ'ɔlom wo n pon biŋe ba a nɔɔrɛ se'em la. 3Malemadoma la tɔntɛ n de sɛla nɛresɛba n tare lɔlega bii pehego na te ba kaanbɛ la zen'an dela bɔkɔ la yɛa la pooren lɔgɔrɔ. 4Bo'ore ya ba ya dideena la daam paalom la kaam la ya piihe kɔnberɔ seto te ya pɔhɛ kɛ yia la. 5Se'ere n sɔe la Na'ayenɛ ya Yenɛ la n loe bama la ba yaahe yamam la poan, te ba zɛ'ɛta Na'ayenɛ yu'urɛ la poan tona saŋa woo. 6Levidoma wa poan nɛra han ihege enŋa n kɛn'ɛre teŋsɛka poan Israel teŋa wa poan la a suunre zan'an wa'an zen'an te Na'ayenɛ wan loe la poan na, 7tara Na'ayenɛ la n de a Yenɛ la yu'urɛ tona wo a Levi taaba la n boe Na'ayenɛ nɛŋan bilam tona se'em la, 8a wan diti a Levi taaba dia, ba tɔtɛ la ma'an ma'an la en, ge a yiredoma n koohe lɔgɔrɔ bo en sɛla na la dela a ma'an denɛ. 9Ya han ta kɛn' teŋsɛka te Na'ayenɛ ya Yenɛ la dekera bɔ'ɔra ya wa la poan, da zamehɛ ya la ya tɔgɔha teŋse'ehe n boe bini la toonfɛn'ɛha la. 10Da bahɛ te se'em bɔna ya poan ta dekɛ a dayɔa bii a pɔyɔa kaanbɛ bugum poan bii behega bii tiimtooma bii nyɛta nɛreba yɛla bii tara nini 11bii bahera kuga bii bagabibihedaana bii se'em n tɔgɔre la ke'endoma. 12Se'em woo n ete yele ana dela nɛrebe'o Na'ayenɛ nɛŋan. Yele ana mea zuo te Na'ayenɛ ya Yenɛ la wan dige teŋhe wa woo nɛreba ya nɛŋan. 13Da tare ya ganleŋɔ Na'ayenɛ ya Yenɛ la nɛŋan. 14Teŋhe se'ehe te ya wan dige la nɛreba kelehere la tiimdoma la sɛba n behere. Ge han dɛna yamam, Na'ayenɛ ya Yenɛ la ka sakɛ te ya eta bala. 15Na'ayenɛ ya Yenɛ la wan loe nɔtɔgɔha n ane wo mam la ya mɛŋa Israel sɔɔnrɔ wa poan. Kelehe ya en. 16Ya daa soke Na'ayenɛ ya Yenɛ la Horeb zoore la zuo la daanse'ere la te to daa tiihom te ya yele yeti, Da bahɛ te to le wom Na'ayenɛ to Yenɛ la konkore le yɛ'ɛha bii to le nyɛ bugum kantɛ wa ge to wan ki la. 17Na'ayenɛ yele mam yeti, Ban yele se'em la ane soŋa. 18N wan loe nɔtɔgɔha en ane wo hom la ba sɔɔnrɔ wa poan bo ba. N wan dekɛ n yelehom eŋɛ a nɔɔrɛn, te a yele ba mam bo en nɔse'ere woo. 19Ba han ka kelehe yelehom sebo te mam nɔtɔgɔha wa tɔgɔra mam yu'urɛ poan la, mam mɛŋa wan yi' ba soke. 20Ge nɔtɔgɔha sɛka n ze' mam yu'urɛ la poan tɔgɔra sɛla te mam ka yele en bii a ze' la baga yu'ura poan tɔgɔra dela ya ko en. 21Ya ta'an soke ya mɛhe yeti, to wan eŋɛ la wane baŋɛ yeti Na'ayenɛ ka yele yelehom la? 22Sɛla te nɔtɔgɔha la ze'ele Na'ayenɛ yu'urɛ poan tɔgɛ la han ka eŋɛ bii ka wa'an sera na, Na'ayenɛ ka tɔgɛ. Nɔtɔgɔha enŋa tɛn'ɛhɛ mɛ tɔgɛ. Da zote ya en.

will be added

X\