Tɛɛnhegɔ 17

1Da dekɛ duŋa n de nahɔ bii pehego n pɔgɔlom bii bɛn'ɛnre kaanbɛ bo Na'ayenɛ ya Yenɛ la. Se'ere n sɔe ba dela dɛngerɔ bo en. 2Boraa bii pɔka han bɔna teŋse'ehe te Na'ayenɛ ya Yenɛ la dekera bɔ'ɔra ya la kayema poan, tona be'em Na'ayenɛ ya Yenɛ la nɛŋan, ganlona a nɔbiŋere la, 3ka tona dɔla mam bo ya nɔse'a wa, na'aha baga pɔnta na'ma ba teŋa bii yentule bii ŋmarega bii ŋmarebibihe wa, 4te ya wom, ihege saazuo ɛ' de ninmɔ'ɔrɛ. Te la han dɛna sera, te la nɛɛ na te yelebe'o kona n eŋɛ Israel poan, 5nyɔkɛ ya boraa la bii pɔgɔsɛka n tom be'em bona wa yehe ya teŋa la nayaŋan ta lobe en ko. 6Seradoma bayi' bii batan' n wan bɔna ge te ya nyaŋɛ ko nɛra, ge da ko nɛra seradaana la han dɛna nɛra ayena ma'an. 7Seradoma la n wan pɔhɛ koa la, te nɛra woo nu'uhe nya pa'ahɛ. Foe ya be'em la ya poan. 8Yele han wa'an ya yetɔgom deto la poan na kpe'em gaŋɛ ya, dɛna ziim ka'ahegɔ bii se'em n tare a yele na bii toorɛ, te ya behɛ te ya kan nyaŋɛ, ya tare wa'an zen'an te Na'ayenɛ ya Yenɛ la wan loe la. 9Keŋɛ ya malemadoma la n de Levidoma la yetɔgɔgankera se'em n boe saŋkaŋa poan la zen'an. Soke ya bama te ba pa'alɛ ya yan wan eŋɛ de se'em. 10Ya doohe bama n wan bo ya potɛn'se'ere zen'sɛka te Na'ayenɛ loe la poan la. Da ŋmɛregɛ bama n pa'alɛ ya se'em la poan. 11Eŋɛ ya bama n bama n bo ya nɔze'elego seko la nɔɔrɛ seko la. Da ŋmɛregɛ ya bama n yele ya sɛla la poan lebe zuɔ bii gɔbega. 12Nɛra se'em n eŋɛ suunre la gankera la bii po'ohegɔ nɛŋadaana la n ze' Na'ayenɛ ya Yenɛ la nɛŋan tona la dela ya ko en. Foe ya be'em la ya poan. 13Nɛreba zan'an wan wom, te dabeem wan kɛn' ba te ba kan eta suunre le yɛ'ɛha. 14Ya han ta kɛn' teŋa la te ya Na'ayenɛ ya Yenɛ la dekera bɔ'ɔra ya la ta sɔe ka sɔna, nya zin'ire ka poan ba'ahɛ, ge nya tɛn'ɛhɛ yeti, Bahɛ ya te to loe naba te a beha to wo teŋhe wa n lɛm to wa n tare nadoma se'em la, 15behɛ ya soŋa la ya loe nɛra se'em te Na'ayenɛ ya Yenɛ la mɛŋa loe. A dɛna ya mɛŋa sɔɔn. Da dekɛ ya saana te a sɔna ya beha, se'em n dagɛ ya Israel buuri la poan nɛra. 16Naba la me da vaɛ yiri kekeko bo a mɛŋa, bii a bahɛ te nɛreba la lebe Mizraim teŋa ta ɛ' yiri na pa'ahɛ. Se'ere n sɔe Na'ayenɛ yele ya yeti, da makɛ ya le doohe ya sore wa le lebe. 17A da di pɔgɔba zo'e, ge bala wan bahɛ te a potɛn'ɛrɛ bɔregɛ. A da ba' tara sanlenpeelega la sanlema. 18A han ta di teŋa la na'am zin'ire ba'ahɛ, a to'e pa'alegɔ gɔŋɔ wa malemadoma n de Levidoma la zen'an la a golehɛ a eŋɛ gɔŋɔ poan bo a mɛŋa. 19Gɔŋɔ la bɔna a zen'an te a kaanla kɔ daarɛ woo a vom poan, la a mina n wan na'aha Na'ayenɛ a Yenɛ la se'em, ge ma'ɛn a mɛŋa dɔla pa'alegɔ la malema yɛla la, 20ge da behɛ a mɛŋa te a nyane a sɔɔnrɔ la, la a ŋmɛregɛ pa'alegɔ la poan lebe zuɔ bii gɔbega. Bala te enŋa la a yaahe wan zin'ire Israel na'am gɔŋɔ wa zuo yuue.

will be added

X\