Tɛɛnhegɔ 16

1Tɛnre ya Abib ŋmarega la, la ya dɛ'ɛna Na'ayenɛ ya Yenɛ la Azootole Daarɛ la. Se'ere n sɔe la Abib ŋmarega wa poan yu'uŋɔ te a yuun tare ya Mizraim teŋa poan yu'uŋɔ yehe na. 2Loe ya duŋa ya piihe bii nii poan keŋɛ zen'an te Na'ayenɛ ya Yenɛ la loe te ka dɛna a bɔŋa zen'an te a yu'urɛ pota bini la, ta kaanbɛ Azootole kaanbegɔ bo Na'ayenɛ ya Yenɛ la. 3Da obere ya nɛnɔ la mi'ihom. Dabeha ayopɔe la kɔ'ɔn obere ya boroboro se'a n ka tare mi'ihom, namehegɔ boroboro la. Se'ere n sɔe la ya yuun ka maahom ya mɛhe n bote se'em ge yehe Mizraim teŋa poan, bala te ya wan tɛnra ya vom poan se'em ma'an te ya yehe Mizraim teŋa poan la. 4Dabeha ayopɔe la poan da bahɛ ya te mi'ihom pota ya lɔgɔrɔ poan bii bɔna ya teŋa la poan. Da bahɛ ya te nɛnɔ seto te ya kaanbɛ dabeha ayopɔe pɔhega daarɛ zanɔɔrɛ la ze'ele yelegɛ beere. 5Da kɔ'ɔn ne paɛ ya teŋsɛka woo teŋa la te Na'ayenɛ ya Yenɛ la dekera bɔ'ɔra ya la poan kaanbera Azootole kaanbegɔ wa, 6han dagana zen'sɛka te a wan loe te ka dɛna a bɔŋa zen'an te a yu'urɛ pota ka poan la ma'an. Bilam te ya wan kaanbɛ Azootole kaanbegɔ wa zanɔɔrɛ, yentule han ta luta. 7Sɛn' ya nɛnɔ la obe to zen'sɛka te Na'ayenɛ ya Yenɛ wan loe la. Bolika te ya lebe ya soga poan. 8Dabeha ayoobe zan'an, ya ɔbera boroboro se'a n ka tare mi'ihom. Te dabeha ayopɔe daarɛ la, lagahɛ taaba wa'ana zin'ire Na'ayenɛ ya Yenɛ la nɛŋan, ge da tom tontonɛ. 9Yan kɔ'ɔn ta pɔhɛ ya dia kɛ'a la, pɔhɛ ya kaanlɛ dabeha ayopɔe ayopɔe sugumnɔɔren boyopɔe bahɛ. 10Ge pɔhɛ Dabeha Ayopɔe De'eŋɔ la. Lagahɛ ya popeelom bo'olom ya lɔgɔrɔ la woo poan na wo Na'ayenɛ ya Yenɛ la en kan' bahɛ ya zuo se'em la. 11Ya bɔna Na'ayenɛ ya Yenɛ la nɛŋan, zen'sɛka te a wan loe te ka dɛna a bɔŋa zen'an te a yu'urɛ pota ka poan la. Te yamam la ya dayɔɔhe la ya pɔyɔɔhe la ya yamehe la ya pɔsɔɔrɔ la Levidoma la n kɛn'ɛre ya teŋhe la poan la saama la keebehe la pɔkɔnpa la woo n lagom bɔna la ya, ya zan'an lagom nyeena. 12Tɛnre ya te ya yuun dela da'aba Mizraim teŋa poan la ma'ɛn ya mɛhe dɔla malema wa soŋa. 13De'ene ya Pagahe Tin'a De'eŋɔ wa dabeha ayopɔe, se'em ma'an te ya tɔ ya dia ba'ahɛ, ge lɛ ya daam ba'ahɛ. 14Tare ya popeelom la de'eŋɔ wa, yamam la ya dayɔɔhe la ya pɔyɔɔhe la ya yamehe la ya pɔsɔɔrɔ la Levidoma la saama la keebehe la pɔkɔnpa woo n kɛn'ɛre ya teŋhe la poan la. 15Dabeha ayopɔe te ya ne wan de'em de'eŋɔ wa bo Na'ayenɛ ya Yenɛ la, zen'sɛka te Na'ayenɛ mɛŋa wan loe la poan. Na'ayenɛ ya Yenɛ la wan kan' bahɛ ya dia kɛ'a, la ya nu'uhe tooma woo zuo, te nyeema gaŋɛ ya. 16Botan' yuunɛ woo poan, te ya boraahe ne wan wa'an Na'ayenɛ ya Yenɛ la nɛŋan na, zen'sɛka te a wan loe la, dɛ'ɛna Boroboro N Ka Tare Mi'ihom De'eŋɔ la Dabeha Ayopɔe De'eŋɔ la Pagahe Tin'a De'eŋɔ. Ge ba da wa'an Na'ayenɛ nɛŋan na la nu'beele. 17Nɛra woo tare a lɔgɔrɔ woo bo'olom wo Na'ayenɛ ya Yenɛ la n kan' bahɛ ya zuo se'em la. 18Loohe ya gankereba la kpɛ'ɛndoma bo buuri woo teŋsɛka woo poan te Na'ayenɛ ya Yenɛ la yeti a dekɛ bo ya la poan, te ba gankera nɛreba la soŋa soŋa. 19Da sogora yelemɛŋɛrɛ bii tara ninkɔɔra. Da tɔ'ɔha mu'ure, ge mu'ure fɔɔre la yamdoma nini, ge tulina nɛre tontɔɔdoma yetɔgom. 20Dole ya yelemɛŋɛrɛ ma'an, te bala te ya wan vɔna, ge sɔna teŋsɛka te Na'ayenɛ ya Yenɛ la dekera bɔ'ɔra ya wa poan. 21Da sɛ' ya Aserah bagarɛ dɔɔrɔ lɛm la daka te ya wan kaanbera Na'ayenɛ ya Yenɛ la. 22Ge da sɛ' ya toolom kuga, yele ana te Na'ayenɛ ya Yenɛ ka bɔta la.

will be added

X\