Tɛɛnhegɔ 15

1Yuuma ayopɔe woo poan dela sama bahega yuunɛ. 2Yan wan eta se'em dela, se'em woo n dekɛ sɛla peŋe a sɔɔn Israel nɛra, a bahɛ bo en. Da le ɛɛra te ho sɔɔn la bii ho Israel tadaana la yɔ. Na'ayenɛ n loe saŋsɛka te ka dɛna sama bahega saŋa la paɛ ya. 3Ho ta'an to'e ho sanɛ saana zen'an saŋkana wa poan, ge ho sɔɔn han tara ho lɔgɔseko ho bahɛ. 4Ge naha pon kan ta boe ya poan. Se'ere n sɔe teŋsɛka te Na'ayenɛ ya Yenɛ la dekera bɔ'ɔra ya te sɔe ka sɔna te ka dɛna ya sɔ'ɔlom la, a wan kan' som bahɛ ya zuo, 5ya han nam Na'ayenɛ ya Yenɛ la soŋa, ge ma'ɛn ya mɛhe dɔla nɔse'a te n bɔ'ɔra ya zina wa. 6Na'ayenɛ ya Yenɛ la wan kan' som bahɛ ya zuo wo enŋa n biŋe a nɔɔrɛ se'em la, te ya tara pɛmɛha teŋhe, ge kan malom peŋɛ sɛla se'em zen'an. Ya wan sɔna teŋhe kekeko behera, ge teŋa kan malom sɔna yamam behera. 7Ya sɔɔn han ta dɛna naha bɔna Na'ayenɛ ya Yenɛ la n dekere teŋsɛka bɔ'ɔra ya wa teŋsɛka poan, da kanbɛ ya sunya bii ya nu'o kpe'em la ya sɔɔn naha wa. 8Ton tɛɛn ya nu'uhe, te la han ne wona en ya soŋɛ en. 9Behɛ ya soŋa te pototɛn'ɛhegɔ kona wa da bɔna ya poan. Yuuma ayopɔe la, sama bahega yuunɛ la han ta pɔnre, da doohe ya bilam bɛ'na la ya sɔɔn n de naha, ka bɔta te ya bo en sɛla. A wan kele bo Na'ayenɛ de zuo, te ya nyɛ tuure de zuo. 10Bo'ore ya en yabe yabe, bo'ore ya ge da gɔngelena, te bala zuo te Na'ayenɛ ya Yenɛ la wan kan' som bahɛ ya tooma woo poan, la sɛla woo te ya nu'uhe wan kalom. 11Nahedoma wan ba'ahom bɔna ya teŋa la poan. Bala te n bɔ'ɔra ya nɔdena wa, te ya tɛɛn ya nu'uhe bɔ'ɔra taromdoma, la nahadoma woo n boe ya teŋa la poan la. 12Ho Hebru tadaana, pɔka bii boraa han dekɛ a mɛŋa koohe bo ho, tom yuuma ayoobe bo ho, yuuma ayopɔe la, bahɛ en te a keŋɛ. 13Ho me han yeti ho bahɛ en, da bahɛ en nu'bɛlombɛa, 14behɛ sɛla ho piihe poan la ho baanren la ho daam paalom poan, la popeelom bo en. Bo en wo Na'ayenɛ ya Yenɛ la en bo hom se'em la. 15Tɛnre ya te ya yuun dela yamehe Mizraim poan te Na'ayenɛ ya Yenɛ la yɔ to'e ya na. Bala te n bɔ'ɔra ya nɔdena zina wa. 16Ge ho yameŋa la mɛŋa han yeti, mam ka bote n bahɛ hɔ, yehe la a nɔŋɛ hom la ho yire nɛreba la mɛ, ge te n boe la ho la, sɛla ka daane en, 17dekɛ kpa'a voŋɛ a toberɛ daanlɛ en, te a kɔ'ɔn dɛna ho yameŋa yɛ'ɛha. Eŋɛ ya pɔsɔɔrɔ me bala. 18Da bahɛ ya te la dɛna daaŋɔ bo ya la ya bahɛ yameŋa. Se'ere n sɔe la, a yuuma ayoobe la te a tom bo ho la gane ligiri tontona tooma sugumnɔɔren boyi'. Te Na'ayenɛ ya Yenɛ la me wan kan' bahɛ ho sɛla woo te ho eta poan. 19Dekɛ ho nii la ya piihe sare sare kɔma n de bondɔɔ woo bo Na'ayenɛ ya Yenɛ la. Da dekɛ ho lɔle sɛka te ho nahɔ dɔgɛ yia la kɔ. Da yehe ho peraa deeŋa lom. 20Yuunɛ woo poan, hom la ho yiredoma ne tare bama wa'an Na'ayenɛ ya Yenɛ la nɛŋan na, zen'sɛka te a wan loe la poan na di. 21Ge duŋa han tara daaŋɔ, ka na'arɛ en kɔ' bii ka fɔ mɛ bii ka tare la ban'an ka iŋan, kaŋa dagɛ ya dekɛ kaanbɛ bo Na'ayenɛ ya Yenɛ la. 22Obe ya kaŋa ya teŋhe la poan ha. Sɛba n malom peere malema la, la sɛba n ka malom la zan'an ta'an naɛ taaba obe ka wo ka dela mɔen yɔka, bii kɔɔn la. 23Ge da di ya ka ziim la. Kɔrɔge ya ziim la bahɛ teŋa wo ko'om la.

will be added

X\