Tɛɛnhegɔ 10

1Saŋkaŋa poan te Na'ayenɛ yele mam yeti, Kerehɛ kugulama ayi' n ane wo yia kuga la wa'an n zen'an zoore la zuo na. Maalɛ dɔɔrɔ daka pa'ahɛ na. 2N wan golehɛ yelese'a woo n daa boe yia kuga la te ho wɔnrɛ la tee eŋɛ kugu aŋa poan te ho dekɛ a eŋɛ dɔɔrɔ daka la poan. 3Te n daa dekɛ zaaŋa dɔɔ maalɛ daka la, ge kerehɛ kugulama ayi' te a ana wo yia kuga la, tare zom zoore la zuo. 4Te Na'ayenɛ daa malom golehɛ sɛla te a daa golehɛ la, nɔze'elego pia la te a daa tɔgɔra bɔ'ɔra tɔ bugum la poan na, to lagahegɔ daarɛ zoore la zuo la, tee eŋɛ a zuo dekɛ bo mam. 5Te n daa ze'ele zoore la zuo sige na, dekɛ kuga la eŋɛ dɔɔrɔ daka la te n maalɛ la poan wo Na'ayenɛ n bo mam nɔɔrɛ se'em la, te a bɔna bini la zina wa. 6Israeldoma wa yuun ze'ele la Beerot Bene Yaakan teŋhe la keŋɛ ta paɛ Mosera teŋa. Bilam te Aron ki te ba pin' en bini, te a dayɔa Eleazar tee sɔe a na'arɛ dɛna malemadaana wo a sɔ n yuun de se'em la. 7Te ba ze'ele bilam keŋɛ ta paɛ Gudgoda, tole Yotbata, teŋsɛka kolaahe n perɛ la ko'om la. 8Saŋkaŋa poan te Na'ayenɛ daa loe Levi buuri la ma'an te ba ziira nɔbiŋere daka la te Na'ayenɛ nɔbiŋere la bɔna ka poan la ge le zɛ'ɛta Na'ayenɛ nɛŋan tona ge tara a yu'urɛ la kan'ara wo ban kelom ete se'em zina wa la. 9Bala n sɔe te Levi buuri wa ka tara tɔntɛ bii sɔ'ɔlom la ba sɔɔnrɔ la. Na'ayenɛ n de ba tɔntɛ wo Na'ayenɛ ya Yenɛ la n yele ba se'em la. 10Mam ta bɔna zoore la zuo la dabeha pihinaahe, yu'uŋɔ la wontɛɛŋa zan'an, wo mam pon tabelɛ eŋɛ se'em yia la. Te Na'ayenɛ kelom kelehe mam saŋkaŋa me poan. La daa dagɛ a potɛn'ɛrɛ te a sagom ya. 11Te Na'ayenɛ yele mam yeti, Kena ta bɔna nɛreba wa nɛŋan tara ba te ba kɛn' ta sɔe sɔ'ɔna teŋsɛka te mam pɔ' nɔɔrɛ la ba sɔdoma te n wan dekɛ bo ba la. 12Nananawa Israeldoma, Na'ayenɛ ya Yenɛ la eere la bene ya zen'an gana ya zɔta Na'ayenɛ ya Yenɛ la ge dɔla a sɔya la zan'an ge nɔŋɛ en ge tona bɔ'ɔra Na'ayenɛ ya Yenɛ la la ya sunya la ya sea zan'an? 13Dɔla Na'ayenɛ nɔya la malema wa te n bɔ'ɔra ya zina ya som zuo wa. 14Behɛ, saazuo la saazui zui ha la teŋparɛ wa la sɛla woo n boe ba poan dela Na'ayenɛ ya Yenɛ la denɛ. 15Ge la bala zan'an, Na'ayenɛ daa tona la yamam sɔyaabdoma te a nɔŋɛ ba ge loe yamam n de ba yaahe wa te ya gana teŋhe woo n boe, wo lan ane se'em zina wa. 16Tee ya ya sunya ge da dene ya tobekperegadoma. 17Na'ayenɛ ya Yenɛ la n deyena woo Yenɛ, dɛna daandoma Daana, Yenɛ kantɛ. A dela paŋa la dabeem daana. A ka tara ninkɔɔra. A ka to'ohe mu'ure bo'olom. 18A ka zagahɛ keebehe la pɔkɔnpa ge nɔŋɛ saana mɛ bɔ'ɔra en dia la futo. 19Yamam me nɔŋɛ sɛba n de saama, ya mɛhe tabelɛ dɛna la saama Mizraim teŋa la zuo. 20Zote ya Na'ayenɛ ya Yenɛ la, ge tona bɔ'ɔra enŋa ma'an. Gin' ya en kaŋkaŋe ge bahɛ te a yu'urɛ la dɛna ya pɔtɛ. 21Enŋa n de ya pɛnka. Enŋa n de ya Yenɛ, se'em n tom toonkanra n tare dabeem. Toonkerehe se'a te ya mɛhe nini nyɛ la. 22Ya sɔyaabdoma sɛba n yuun keŋɛ Mizraim teŋa la yuun dela nɛre pihiyopɔe ma'an. Ge nananawa, Na'ayenɛ ya Yenɛ la bahɛ te ya wi'ɛ mɛ wo ŋmarebibihe.

will be added

X\