Tɛɛnhegɔ 1

1Yele ana te Moses tɔgɛ bo Israel nɛreba, ban wa bɔna Yordan Kolaa yakenɛ ha pɔgɔtia la poan la. Ba wa bɔna la Moab paberɛ poan tɔɔra Sup teŋa na, bɔna Paran la Topel la Laban la Hazerot la Dizahab teŋhe teŋasoka. 2Ba ne dekɛ dabeha pia la deyena keŋɛ na'ma ze'ele Horeb Zoore dɔla sose'ere n dole yɛ'a teŋsɛka n yage zoore zuo te ba yi'ira ka Edom la ta paɛ Kades Barnea. 3Israeldoma yɛhega yela la bahɛ te la dela yuum pihinaahe poan ŋmarega pia la kayena pɔhega daarɛ, te Moses tɔgɛ Na'ayenɛ n bo en nɔɔrɛ te a yele Israel nɛreba sɛla woo la bo Israel nɛreba la zan'an. 4Bala ma'an te Na'ayenɛ pon bo ba paŋa te ba zabɛ nyaŋɛ Amoridoma la ba naba Sihon n zin' a na'am gɔŋɔ zuo Hesbon teŋa, la Basan teŋa naba Og n zin' a na'am gɔŋɔ zuo Astarot la Edrei teŋhe poan. 5Yordan Kolaa la pooren ha, Moabdoma sɔ'ɔlom poan te Moses pɔhɛ pa'ala Israeldoma ena pa'alegɔ wa. 6Na'ayenɛ to Yenɛ la yuun yele to Horeb Zoore la zen'an yeti, Ya ba' ze'ele zoore wa zen'an yuue mɛ. 7Yeregɛ ya zom ta kɛn' Amoridoma teŋhe wa n yage zoore zuo la pɔgɔtia n lɛm ya, la teŋhe n boe zɔya wa la teŋhe n boe nɛŋa tontɔɔ zɔya la Negev pɔgɔtia zen'enhe poan la ko'kantɛ nɔgbɛma paberɛ la poan. Keŋɛ Kanaan la Lebanon teŋhe la poan paɛ kolaa kantɛ Euprates la beene. 8Behɛ ya, n dekɛ teŋa wa bo ya mɛ. Kɛn' ya ka poan ta sɔe teŋsɛka te Na'ayenɛ pɔ' nɔɔrɛ te a wan dekɛ bo ya sɔyaabdoma Abraham la Isaak la Yakob la ba yaahe se'ehe n wan wa'an pooren na te ba sɔna la. 9Saŋkaŋa ha la, n yuun yele ya yeti, Ya ba' dɛna la zeero n tebegɛ bo mam. 10Na'ayenɛ ya Yenɛ la bahɛ te ya ba' wi'ɛ mɛ ya kanlɛ poan. Zina beere wa, ya zo'e mɛ wo ŋmarebibihe la. 11Na'ayenɛ ya sɔdoma Yenɛ la wan bahɛ te ya buuri malom wi'ɛ kɛn' tuha tuha, ge kan' som bahɛ ya zuo wo n pon biŋe nɔɔrɛ se'em la. 12Mam yeti n eŋɛ la wane ta'an maala ya yɛla, ya daaŋɔ la ya nɔkpɛ'ɛma zan'an n ma'an. 13Loohe ya yamdoma n tare bɔkerɛ ge dɛna nɛre zura ya buuri la woo poan, te ba wa'an na te n bahɛ te bama beha ya. 14Te ya yele mam yeti, Sɛla te ho yele la ane soŋa. 15Te mam to'e ya yizuto woo poan nɛŋadoma la, nɛresɛba n de yamdoma ge dɛna nɛre zura la, bo ba sore te ba beha ya. Basɛba behera tuha, te sɛba behera kɔbehe, te sɛba behera pihinuu, te sɛba me behera pia pia, te sɛba dɛna nadoma kpɛ'ɛndoma. 16Te n yele ya yelegankereba la bala ma'an ha la yeti, ba kɛleha nɔkpɛ'ɛma se'a woo n boe ba sɔɔnrɔ la teŋasoka, la ba gankera a la yelemɛŋɛrɛ. Nɔkpe'ene han bɔna Israel nɛreba bayi' teŋasoka, bii Israel nɛra la saana teŋasoka, ba gankɛ dɛ la yelemɛŋɛrɛ. 17Da tare ya ninkɔɔra yɛla gankerɛ poan. Gankere ya nɛrekanreba la taromdoma boyena. Da zote ya nɛra se'em. Na'ayenɛ n bo ya sore te ya gankera. Yele se'a n ne kpe'em bo ya te ya kan ta'an gankɛ a la, ya tare aŋa wa'ana bo mam. 18Ge n me yele ya bala ma'an ha la, sɛla woo n nare ya eta. 19Na'ayenɛ to Yenɛ la n bo to nɔɔrɛ se'em la, te to ihege Horeb Zoore la zen'en doohe Amoridoma teŋa la n yage zoore zuo la sore la faanrɛ ba pɔgɔtia la poan, zen'sɛka te ya mɛhe nini nyɛ kan kpe'em se'em la poan, tara tara na paɛ Kades Barnea teŋa. 20Te n yele ya yeti, Ya paɛ Amoridoma teŋa la n yage zoore zuo te Na'ayenɛ to Yenɛ la dekera bɔ'ɔra to la poan. 21Behɛ ya, Na'ayenɛ to Yenɛ la n bo'ore ya teŋkana wa. Zom ya ta fan' ka sɔe sɔna wo Na'ayenɛ n de ya sɔdoma Yenɛ la n yele ya se'em la. Da zote ya se'em bii ya giinla kɔ'ɔhɛ ba zuo. 22Te ya zan'an ko nɔɔrɛ deyena lagahɛ taaba wa'an n zen'an na yele mam yeti, N bahɛ te ya tom vɛɛhereba te ba keŋɛ ta kae zen'an la behɛ ge lebena pa'alɛ sose'ere te ya wan doohe la teŋse'ehe te ya wan paɛ yia. 23Te ya potɛn'ɛrɛ wa ana soŋa bo mam, te n ganhɛ yizuo woo nɛrayenɛ nɛra yene, te ba zan'an dɛna nɛre pia la bayi'. 24Te ba yehe keŋɛ zom teŋa wa n yage zoore zuo wa, keŋɛ ta paɛ Eskol teŋa, veehe veehe ka poan zan'an. 25Ge ba aanhom ka samana tiihe dia tare na ge yele to yeti, teŋa la te Na'ayenɛ to Yenɛ la dekera bɔ'ɔra to la kɔ'ɔn ba'ahɛ la teŋa. 26Ge ya daa zagahɛ mɛ ka sakɛ te ya zom teŋa la poan wo Na'ayenɛ ya Yenɛ la n bo a nɔɔrɛ se'em la. 27Te ya lebe ya gan'an zen'enhe ta gogolena yeti, Na'ayenɛ pon yaɛ tomam mɛ n sɔe te a yeen tare tomam Mizraim teŋa poan yehe na te a bahɛ te Amoridoma wa sagom tɔ. 28To wan keŋɛ la bɛ? To sɔɔnrɔ sɛba te to tom la pon bo to la iŋkɔ'ɔhegɔ ge yeti nɛreba la kpe'em mɛ ge dɛna nɛredareba gana tomam, te ba teŋhe la me dɛna teŋkanra zaŋa dangoone n wɔgɛ sukura yenɛ niho kae se, te Anakdoma la boe bini mɛ. 29Te n yele ya yeti, Da bahɛ ya te dabeem kɛn' ya. Da zote ya dabeem la ba. 30Na'ayenɛ ya Yenɛ la wan tole ya nɛŋa zabɛ bo ya, wo n tabelɛ eŋɛ se'em bo ya Mizraim teŋa poan ya mɛhe ninin la 31la n eŋɛ se'em pɔgɔtia la poan la. Ya sore zuo kenɛ la zan'an, ya nyɛ Na'ayenɛ n buke ya se'em wo nɛra n buke a dayɔa la, tara tara na paɛ ka'lam na wa. 32Ge la bala zan'an, ya kelom ka nam ya Na'ayenɛ ya Yenɛ la, 33se'em n boe ya nɛŋa ya kenɛ la poan, ne dɛna bugum bɔna ya nɛŋa yu'uŋɔ, ge dɛna saŋgbanɛ pin' ya wontɛɛŋa, ɛɛra zen'enhe bɔ'ɔra ya te ya zɛ'ɛta vɔ'ɔha, ge pa'ala ya wan doohe zen'an la. 34Na'ayenɛ n wom ya gogoleŋɔ la, a suunre nyie mɛ, te a pɔ' yeti, 35Nɛra ayena me kan bɔna toonbe'ero buuri kana wa poan te a niho nyɛ teŋsoŋa sɛka te mam pɔ' nɔɔrɛ te n wan dekɛ bo ya sɔyaabdoma la, 36han dagana Yepune dayɔa Kaleb. Enŋa n wan nyɛ ka. Teŋsɛka woo poan te a na'arɛ ka poan, Na'ayenɛ wan dekɛ ka bo enŋa la a yaahe zan'an. Se'ere n sɔe la, a doohe Na'ayenɛ mɛ la a suunre zan'an. 37Yamam zuo te Na'ayenɛ eŋɛ suunre la mam yeti, Hom me pon kan kɛn' ka poan. 38Yosua n soŋorɛ ho dɛna Nun dayɔa la n wan kɛn' ka poan. Kpemehe en, ge enŋa wan tare Israeldoma wa kɛn' sɔ'ɔlom bona wa poan. 39Ya kɔmbibihe se'ehe te ya yeti, Ya diŋdoma wan nyɔkɛ la bama saahɛ ba so'ahe la, kɔmbibihe se'ehe n nan ka mi' som la be'em wɛleha la n wan kɛn' teŋa la poan. N wan dekɛ ka bo ba, te ka dɛna ba sɔ'ɔlom. 40Ge han dɛna yamam, ŋmɛregɛ ya doohe mɔen sore la n dole yɛ'a Mɔgɔ Mɔlega la poan ha la. 41Te ya nya yeti, Tomam tue Na'ayenɛ. To wan to'e a nɔɔrɛ la, la to keŋɛ ta zabɛ wo enŋa n yele to se'em la. Te ya zan'an dekɛ ya zaba lɔgɔrɔ yɛ', tɛn'ɛha te la dela naana te ya zom teŋa la n yage zoore zuo la ta zabɛ. 42Te Na'ayenɛ yele mam yeti, Yele ba yeti ba da zom teŋa poan ta zabɛ ge mam nu'o kan bɔna ba poan. Ya diŋdoma la wan ba'ahom nyaŋɛ ya. 43Te mam me yele ya, te ya zagahɛ. Ya zagahɛ Na'ayenɛ nɔɔrɛ mɛ ge dekɛ ya mɛhe tobekpa'a zom teŋa la poan ha. 44Te Amoridoma la n kɛn'ɛre ba teŋa la poan zoore zuo la yehe na paɛ ya, dige ya wo siim n digere ya la, pɔhɛ Seir zoore la zuo ŋmɛ'ɛra ya lɔbera sore la zuo bala ta paɛ Horma. 45Te ya lebe na kɛla Na'ayenɛ nɛŋan, te a pon ka be'e behɛ ya koonɔ la, ge malom le' a toba. 46Te ya yare kɛn'ɛra Kades teŋa la poan dabeha kekeko.

will be added

X\