Daniel 9

1Darius n de Ahasurus n de Media buuri la poan dayɔa la Kaldea teŋa na'am dia yuunɛ, 2a na'am dia yuunɛ mea poan te mam Daniel beha yuuma la te Na'ayenɛ tɔgɛ doohe Yeremia poan a golehɛ biŋe Yenɛ bɔŋɔ la poan yeti, yuuma pihiyopɔe poan Yerusalem teŋa wan sagom la. 3Bala te mam dekɛ n suunre zan'an lo la Daana Yenɛ wa, dekɛ sohoga, pɛnka, zagahɛ n mɛŋa, sunsagaŋɔ futo yɛɛa, la tampegelom pukure n mɛŋa ɛ en. 4Te mam sohɛ Na'ayenɛ mam Yenɛ wa yeti, Daana wa n kanregɛ ge dɛna dabeem Yenɛ, tara ho nɔbiŋere la nɔŋerɛ kantɛ bɔ'ɔra sɛba n nɔŋɛ hɔ ge dɔla hom bo nɔse'a wa. 5Tomam tue mɛ ge ganlom, tom toonfɛn'ɛha kperɛ toba, pon ta bahɛ hom bo to nɔse'a, la kiha se'a la. 6Tomam ka kelehe ho yamehe la n de nɔtɔgɔheba zɛ'a hom yu'urɛ poan tɔgɔra bɔ'ɔra to nadoma, to naditeba, to yaabdoma la to nɛreba zan'an n boe teŋa wa poan la. 7Tontɔɔvom dela hom n Daana denɛ, ge nyanɛ kantɛ n dite Yuda, Yerusalem la Israel nɛreba zan'an. Sɛba n lɛm la sɛba n zaan bɔna zen'se'ehe woo poan te hom mɛŋa yeregɛ to bahɛ bini ha, doohe la tomam dagɛ birikindoma la zuo. 8Na'ayenɛ, nyanɛ n dite tomam la to nadoma, to naditeba la to yaabdoma. Se'ere n sɔe la, tomam tue ho mɛ. 9La tomam n pon tue la zan'an, hom n Daana la to Yenɛ wa zɔ to ninbɔn'ɔn mɛ, ge di suguru bo to. 10Tomam ka nam Na'ayenɛ to Yenɛ la bii to dɔla a pa'alegɔ la te a doohe a yamehe la n de a nɔtɔgɔheba poan pa'alɛ to la. 11Yelemɛŋɛrɛ, Israel zan'an tue ho pa'alegɔ la mɛ, ge ŋmɛregɛ ka nana hɔ. Bala te nɔpɔtɛ, la pɔtɛ se'ere n golehɛ Yenɛ yameŋa Moses la pa'alegɔ gɔŋɔ la poan la sigera to zuo wa. Se'ere n sɔe la tomam tue ho mɛ. 12A doohe la a yelehom sebo te a tɔgɛ bahɛ tomam la to nadoma zuo te la bo to nɔyalegerɛ la. Se'ere n sɔe la, teŋparɛ wa zuo zan'an nyanɛ ka tabelɛ di teŋsɛka wo nyanɛ se'ere n di Yerusalem wa. 13Lan golehɛ se'em bɔna Moses pa'alegɔ la poan la, nɔyalegerɛ aŋa woo sige tomam zuo mɛ na, ge te to kelom ka zegera to ɛ hom Na'ayenɛ to Yenɛ ninbɔn'zɔrɛ, yehe to tuure wa poan ge kɛleha ho yelemɛŋɛrɛ la. 14Bala zuo te hom Na'ayenɛ maahom nɔyalegerɛ la, nya bahɛ te de sige to zuo na wa. Na'ayenɛ to Yenɛ la dela tontɔɔ, a tooma woo poan, ge tomam n ka kelehe a nɔɔrɛ. 15To Daana to Na'ayenɛ wa, hom tare ho nɛreba Mizraim teŋa poan yehe na la ho mɛŋa paŋa, te ho yu'urɛ yehe wo lan ane se'em zina wa. Tomam tue ya. Tomam dela toonfɛn'ɛhadoma. 16To Daana, hom de tontɔɔdaana la zuo, pakɛ ho sunsunyiim la n taɛ bahɛ ho teŋa Yerusalem zuo, la ho toolom zoore wa zuo wa. Tomam tuure, la to sɔyaabdoma tuure zuo, te teŋse'ehe woo n kae tomam toore Yerusalem la tomam n de ho nɛreba wa. 17Bala, tomam Yenɛ wa, kelehe ho yameŋa wa sohoga la a fabelegɔ, ge behɛ hom de se'em la zuo, la ho sure behɛ ho toolom yire wa n lebege daboo wa. 18N Yenɛ wa, kelehe, sure behɛ sagaŋɔ seko n paɛ teŋsɛka te hom Yu'urɛ pota ka poan wa. Tomam ka sohore soho kana wa doohe la to tara la toonsonɛ se'ere to poan, ge ho ninbɔn'zɔrɛ la n zo'e la. 19N Daana kelehe. Di suguru n Daana, ge kelehe ge tom. N Yenɛ wa, doohe la hom mɛŋa yu'urɛ la zuo da go'om. Se'ere n sɔe la, hom Yu'urɛ n pote teŋa la la ka nɛreba la poan. 20Mam tɔgɔre n sohoga la poan la, ge pota n mɛŋa tuure la n nɛreba Israeldoma la tuure la, dekera n fabelegɔ biŋera Na'ayenɛ wa n de n Yenɛ wa nɛŋan, doohe la a Toolom zoore wa zuo la. 21Mam kelom bɔna bini mɛ tɔgɔra ge soha, te Yenɛ soŋora Gabriel la te mam nyɛ ne n zaanheŋɔ la poan la wa'an mam zen'an na, bala ma'an te mam pon taregɛ mɛ, te la pon yɛ'a la zanɔɔrɛ kaanbegɔ saŋa. 22Te a bo mam kan'aŋɔ, ge tɔgɛ la mam yeti, Daniel, mam nya wa'ana te n bo ho la yam la bɔkerɛ. 23Saŋsɛka te ho pɔhɛ ho sohoga la te Na'ayenɛ bo nɔɔrɛ. Bala te mam wa'ana te n yele ho. Ho dela zuodaana, bala kelehe yele wa soŋa ge bɔkɛ liligere wa. 24Dabeha ayopɔe, sugumnɔɔren pihiyopɔe n pon yehe biŋe te ho nɛreba la la ba teŋa la wan namehɛ ba tuure la zuo. Bala han ba'ahɛ, tuure kan le bɔna, ge te yelemɛŋɛrɛ nya sɔe bɔna yɛ'ɛha ka tara ba'ahegɔ. Zaanheŋɔ la yelehom sebo woo te nɔtɔgɔheba la tɔgɛ la wan seren wa'ana tom. Toolom zen'an wa wan le malom mɛ. 25Bala, mina, ge me baŋɛ yeti, pɔhera nɔɔrɛ la n pon bo te ba malom mɛ Yerusalem la, dekɛ ta paara Faanra la kenɛ poan na, dela dabeha ayopɔe sugumnɔɔren boyopɔe, la dabeha pihiyoobe la ayi' sugumnɔɔren boyopɔe. Yerusalem wan malom mɛ soŋa, tara sɔnhega zen'kantɛ, te ba tun' boko kantɛ kae te la gu' teŋa la, ge wana woo ta eta la saŋsɛka te la kpe'em poan. 26Ge dabeha pihiyoobe la ayi' sugumnɔɔren boyopɔe wa han tole, ba wan ko Faanra la, te a ka tara sɛsɛla. Sateŋa kayema naba la a pɛɛntɛɛnreba wan urugura na wo ko'om la, sagom teŋa la la Yenɛ yire wa. Zaba la sagaŋɔ wan bɔna ka poan bala gura ba'ahegɔ saŋa la, wo Na'ayenɛ n maahom dɛ se'em la. 27Naba wa wan biŋe nɔɔrɛ la nɛreba zo'e zo'e dabeha ayopɔe, ge dabeha ayopɔe la teŋasoka, a wan gu' te ba da kaanbera bii bɔ'ɔra boom bo'olom. A wan dekɛ toonfɛn'ɛherɛ se'ere n tare sagaŋɔ kena la ze'ele, te de bɔna gura te saŋsɛka te Na'ayenɛ maahom te a sagom sagona la ta paɛ.

will be added

X\