Daniel 7

1Babilon teŋa naba Belsazar na'am dia yuunɛ poan te Daniel zaanhom a soŋɔ zuo, golehɛ zaanheŋɔ la biŋe ge nya yele ko vɔnrɛ. 2Daniel yeti, Mam nyɛ' la liligere yu'uŋɔ, mam yeti n behɛ te sabeeo kanra ze'ele logorɛ woo na gbirigera ko'kantɛ wa. 3Te dunhe kanra senaahe yema yema te ba behega tara dabeem ze'ele ko'om la poan dɔɔra na. 4Yia duŋa la ane wo gbegenɛ, ge tara kelompagehe n ane wo tuguho kelompagehe la. Mam behere la bala ta nyɛ te ba fɔ a kelompagehe la, ge zɛnkɛ en ihege ze'ele saazuo te a zɛ'a a na'ma ayi' zuo wo asaala, ge bo en asaala potɛn'ɛrɛ. 5Mam yeti n behɛ te duŋa kayema n bala, seyi' daana n bala ana wo dɛɛa la te ba zɛnkɛ enŋa ihege ze'ele saazuo zen'an kayema me, te a gin' sapirihe kɔnba atan' a nyɛna poan. Te ba yele en yeti ihege vole nɛnɔ n gan' yoo. 6Dena n tole la, mam kelom behera mɛ. Mam yeti n behɛ te duŋa kayema n le bala ana wo yeobaa la tara kelompagehe senaahe a poore zuo. Te duŋa wa tara zuto tonaahe te ba bo ka paŋa. 7Dena n tole la, mam kelom beha n yu'uŋɔ liligere wa mɛ, mam yeti n behɛ te duŋa kayema le bala bonaahe daana, ana zuguma, tara dabeem ge ba' kpe'em, tara kuto nyɛna kanra ayi'. Te ka vɔla, ge wɔnta sɛla woo n gete la la ka na'ma. Duŋa kana wa boe la kayema la mam nyɛ se'ehe yia la. Ka tare la iila pia. 8Mam nan boe bini tɛn'ɛha ka iila wa yele la, mam yeti n behɛ te iilebila yehe iila la poan na, ge te ba voen iilekanra la atan' la a nyɛga yehe iila la poan. Te mam yeti n behɛ te iilebila wa tare la nini wo saala nini la, la nɔɔrɛ te de tɔgɔra pa'alɛ mɛŋa yɛla bahera na. 9Te mam kelom beha, ta nyɛ te ba yaarom na'am gɔnɔ biŋe, te Deemen Deemen Ha Daana la wa'ana zin'ire a na'am gɔŋɔ zuo. Te a fuo pelege wo saakuga la, te a zuo zonto pelege wo pehego kɔnberɔ la, te a na'am gɔŋɔ la zan'an nyagera la bugum, te na'ma se'a te na'am gɔŋɔ la nyaga a zuo la dɛna bugum. 10Te kolaa n zote la bugum ma'an ze'ele a poan yehe bɔna a nɛŋan la. Te yamehe tuha tuha tona bɔ'ɔra en, te tuha pia pia zɛ'a a nɛŋan. Te ba zan'an zin'ire, te gɔnɔ yu'uhɛ biŋe. 11Te mam kelom beha pa'alɛ mɛŋa yetɔgom la te iilɛ la ogora la. Mam behere la bala te ba ta kɔrɔgɛ duŋa la, sagom ka iŋa la dekɛ bahɛ bugum la n dite la poan. 12Han dɛna dunhe se'ehe woo n gee la, ba to'ohe se panhe mɛ ge ton malom pa'ahɛ ba vom dabeha gura saŋa kayema n maahom biŋe. 13Te mam kelom beha n yu'uŋɔ liligere la, mam yeti n behɛ te saazuo saŋgbana wa poan, te nɛra ane wo asaala dayɔa la kena na. Te a wa'ana paɛ Deemen Deemen ha Daana la dekɛ a mɛŋa pa'alɛ en. 14Te ba dekɛ paŋa, na'ahegɔ la kpe'eŋo bo en, te saaleba, teŋhe nɛreba la buuri woo na'aha en. A paŋa la ka tare ba'ahegɔ. A kpe'eŋo kan malom tole, te a sɔ'ɔlom la me kan malom nyɛ sagaŋɔ. 15Han dɛna mam Daniel, mam suunre sagom mɛ. Liligere wa bahɛ te mam pabegɛ. 16Te mam vuruge paɛ se'em n ze' bilam la sɔkera en yele ana wa woo vɔnrɛ n de se'em. Te a yele mam, ge pa'alɛ mam yɛla wa vɔnrɛ n de se'em. 17Duŋkanra wa n de senaahe wa dela Sɔ'ɔlom kanra anaahe n wan ihege teŋparɛ wa zuo. 18Ge sɛba n de Saazuo Daana wa kɔma la n wan to'e sɔ'ɔlom wa, sɔna ka beha saŋa woo, buuri saŋa woo n kene na poan. 19Te mam bɔta te n baŋɛ duŋsɛka n pa'ahɛ senaahe la, bɔna kayema dunhe la zan'an poan, ana zuguma, tara kuto nyɛna ayi' te ka na'ɛɛnhe dɛna nyɔgom te ka vɔla ge wɔnta sɛla n gee la la ka na'ma la vɔnrɛ, 20la ka iili pia la n boe ka zuin la, la iilɛ se'ere n puhe na pa'ahɛ te iili kanra atan' figie lu la. Iilɛ se'ere n tare saala nini te de behega tara dabeem gana de taaba la, tara nɔɔrɛ te de ogora pa'alɛ n mɛŋa ma'an la. 21Te mam kelom beha, te iilɛ wa kɔ'ɔra zaberɛ la Yenɛ kɔma, nyaŋera ba. 22Tara tara te Deemen Deemen Daana la ta wa'ana gankɛ te a kɔma wa to'e sɔ'ɔlom la sɔna. 23Te a yele mam yeti, duŋsɛka n pa'ahɛ senaahe la dela, sɔ'ɔlom bonaahe daana n wan ihege teŋparɛ wa zuo na, bɔna boyema la sɔ'ɔlom woo, vole teŋparɛ wa zan'an aanhom bahɛ wɔnrɛ. 24Han dɛna iila pia la, nadoma pia wan yehe sɔ'ɔlom bona mea poan na te kayema me ihege ba booren na, bɔna ayema la ba. A wan nyaŋɛ ba poan nadoma batan'. 25A wan tɔgɔra zɛrɛgɛ Saazuo Daana wa, kɔ'ɔhɛ a kɔma giinla. A me wan zegɛ te a malom tee saŋa wa, la ze'elego la. A wan tara saŋa, saŋhe, la saŋa gito paŋa. 26Ge ba wan zin'ire gankerɛ zin'irego, to'e a paŋa la, ge sirige en, sagom en te a kan le malom lebe na. 27Ge te teŋhe wa woo n boe teŋparɛ wa zuo wa kpe'eŋo, paŋa la kantɛ nya wan dekɛ bo Saazuo Daana wa kɔma la n de a nɛreba. A sɔ'ɔlom la kan tara ba'ahegɔ, te panhe woo wan tona bɔ'ɔra ge nana la enŋa. 28Liligere la te ka beene n bala. Ge han dɛna mam Daniel, mam tɛn'ɛhegɔ la bahɛ te mam pabagɛ mɛ, te mam nɛŋa zuŋe, ge te mam tara yele la n suunre poan n ma'an.

will be added

X\