Daniel 6

1Saŋa kayema te naba Darius ta eŋɛ a potɛn'ɛrɛ te a loe kpɛ'ɛndoma kɔbega la pihiyi' a sɔ'ɔlom la poan, te ba sɔna a sɔ'ɔlom la zan'an behera. 2Ge loe kpɛ'ɛndoma batan' n gane bama me te ba beha ba, te Daniel dɛna batan' la poan ayema. Bama n wan behera kpɛ'ɛndoma wa te naba n bote se'em la da sagom. 3Te Daniel wa tona gana kpɛ'ɛn kanra bayi' la, la kpɛ'ɛndoma bana la. Se'ere n sɔe la paŋa kayema n boe a poan. Te naba wa maahena te a bahɛ te Daniel dɛna a sɔ'ɔlom la woo poan kpɛ'ɛndoma la woo kpɛ'ɛma. 4Wana wa zuo te kpɛ'ɛndoma bayi' la la kpɛ'ɛndoma bana la woo ɛɛra ban wan nyɛ sɔrɔɔ seko zɛrɛgɛ Daniel doohe n tone a tooma se'em. Ge ba ka nyɛ a zɛrɛgerɛ zen'an bii ŋmɛlema a tooma la poan. Se'ere n sɔe la Daniel dela birikina, te zenyangerɛ bii ŋmɛlema ka bɔna a poan. 5Te boraahe wa yele taaba yeti, to kan malom nyɛ se'ere dekɛ zɛrɛgɛ Daniel wa, han dagana se'ere n wan bahɛ te a ganlom a Yenɛ la. 6Te kpɛ'ɛn kanra wa la kpɛ'ɛn bana la woo ko nɔɔrɛ keŋɛ naba la zen'an, ta yele naba wa yeti, naa naba Darius. 7Kpɛ'ɛn kanra la, la sɛba n sɔe bɔbɔrɛ bɔbɔrɛ beha, la kpɛ'ɛndoma, la kpɛ'ɛma bibihe woo la teŋbehere ba woo n boe sɔ'ɔlom wa poan ko la nɔɔrɛ yeti, Hom naba tɛhɛ nɔɔrɛ te ba golehɛ dɛ biŋe yeti, dabeha pihitan' poan, hom se'em n sohɛ se'ere yenɛ se'ere bii nɛra se'em zen'an han dagana hom naba wa ma'an zen'an, ba nyɔkɛ a daana bahɛ gbegema deo wa poan. 8Bala naba, bahɛ te gɔŋɔ la golehɛ nananawa te ho din'e ho nu'o ko poan, te ko dɛna Media la Persia nɔze'elego ka tara teere wo to nɔze'elego woo n ka tare teere se'em la. 9Bala te naba Darius din'e a nu'o gɔŋɔ la n golehɛ la poan. 10Daniel n ta baŋɛ te naba din'e a nu'o gɔŋɔ la poan la, a kɛn' la a yire. A yire la saazuo bɔ'ɔ la tare la takɔla n yu'urɛ tɔɔra Yerusalem teŋa na. A kɛn'ɛre la bilam pɔnta na'ma na'aha ge pɛngera Yenɛ sugumnɔɔren botan' daarɛ woo wo n ne pon eta se'em la. 11Te boraahe wa ko nɔɔrɛ wa'ana nyɛ te Daniel pɛngera ge soha a Yenɛ. 12Te ba paɛ naba la zen'an naba wa yeti, Naa naba, ho ka golehɛ gɔŋɔ yeti se'em n sohɛ se'ere yenɛ se'ere bii nɛra se'em zen'an dabeha pihitan' wa poan han dagana la hom zen'an ba nyɔkɛ en bahɛ gbegema deo wa poan? Te naba wa lerege yeti, La dela a sera. De dela Media la Persia ze'elego ka tara teere. 13Te ba lerege naba wa nɛŋan yeti, Naa naba, Daniel la n de Yuda buuri la te ba pɛnregɛ ba loŋe la na ka dekɛ hom bii gɔŋɔ la te ho golehɛ la yi' sɛla, ge kelom soha a sohoga botan' daarɛ woo. 14Naba wa n wom dena wa la, a suunre sagom mɛ, te a maahom a potɛn'ɛrɛ te a fan' Daniel bahɛ. A mɔ la n wan eŋɛ se'em fan' Daniel bahɛ, te yenɛ ta lu. 15Te nɛreba wa le ko nɔɔrɛ lebe naba wa zen'an na yeti, Naa naba, ho mi' te gɔŋɔ wa dela Mediadoma la Persiadoma nɔze'elego la, ka tara teere. 16Te naba bo nɔɔrɛ te ba nyɔkɛ Daniel na ta bahɛ gbegema deo la poan. Te naba wa tɔgɛ ge yele Daniel yeti, Mam mi' te ho Yenɛ wa te ho tona bɔ'ɔra saŋa woo la mɛŋa wan fan' ho bahɛ. 17Te ba dekɛ kugure na ligile deo la nɔɔrɛ, te naba wa dekɛ a nu'toa danlehom din'e kugure la poan, te a kpɛ'ɛndoma la me din'inhe bala mea, te potɛn'se'ere da le tee dɔla Daniel n boe gbegema deo la poan la. 18Te naba wa lebe kule a yire, ta zagahɛ a mɛŋa yu'uŋɔ la zan'an, te de'eŋɔ seko ka de'em a nɛŋan, te gɔɔm ka bɔna a ninin. 19Te naba wa yaɛ ihege kanbelɛ keŋɛ gbegema deo la zen'an. 20N wa'ana paɛ deo la poan na la, a fabelɛ mɛ. Yi' Daniel yeti, Yenɛ vɔa yameŋa wa, ho Yenɛ la nyaŋɛ fan' ho gbegema la zen'an bahɛ? 21Te Daniel tɔgɛ bo naba la na yeti, Naa naba, 22mam Yenɛ la tom la a soŋora na, te a wa'ana maam gbegema la nɔya te ba ka daam mam. Se'ere n sɔe la n ka tare tuure a nɛŋan ge me ka tara tuure hom naba nɛŋan. 23Te naba wa suunre ma'ɛn, te a bo a nɔɔrɛ te ba yehe Daniel gbegema deo la poan na. Te ba daregɛ Daniel gbegema deo la poan yehe na, te a ka pɔgɔlom la fiin me. Se'ere n sɔe la a dele la a Yenɛ la. 24Te naba la bo a nɔɔrɛ te ba tee nyɔkɛ borase'ehe n zɛrɛgɛ Daniel la na la ba kɔma la ba pɔgɔba tee bahɛ gbegema deo la poan. Ba pon ka kɛn' paɛ te gbegema la pon gilige ba nyɛngehom ge ŋma' ba konba zan'an. 25Te naba Darius golehɛ bo saaleba woo, teŋhe woo la buuri woo nɛreba n boe teŋparɛ wa zuo yeti, sunma'ahom bɔna la ya. 26Mam naba Darius tɛhere la nɔɔrɛ yeti, Mam na'am wa sɔ'ɔlom woo poan, asaala woo zɔta ge na'aha Daniel Yenɛ la nɛŋan. Se'ere n sɔe la, a dela Yenɛ vɔa ka tara ba'ahegɔ. A sɔ'ɔlom ka tare bo sagom, te a na'am ka tara ba'ahegɔ. 27Enŋa n faanre baha ge tɛ'ɛla ge tona nyalema la kerehe saazuo la teŋparɛ wa zuo na. Enŋa n fan' Daniel gbegema paŋa poan bahɛ. 28Bala te Daniel di nyaŋerɛ nyɛlom naba Darius la Persia naba Kirus saŋa la poan.

will be added

X\