Daniel 5

1Saŋsɛka te Belsazar ta dɛna naba la, a eŋɛ la de'eŋɔ bo a nɛrekanreba tuhure, nya zin'an la a nɛra kanreba tuhure wa nyuura daam. 2N nyu' daam la te bo ta nyaŋera en la, te a bo a nɔɔrɛ te ba tare sanlema la sanlenpeelega lɔgɔrɔ se'a te a sɔ Naba Nebukadnezar vaɛ Yenɛ Yire Yerusalem la na, te enŋa la a nɛrezura la la a pɔgɔba la a pɔgɔbɔ'ɔrenhe nyu' to poan. 3Te ba tare sanlema la sanlenpeelega lɔgɔrɔ wa n yehe Yenɛ Yire la poan Yerusalem la na, te naba wa, a nɛrezura la, a pɔgɔba la a pɔgɔbɔ'ɔrenhe la nya nyuura to poan. 4Te ba nya nyuura daam la ge pɛngera ba yena la n de sanlema, sanlenpeelega, nyɔgom, kuto, dɔɔrɔ la kuga la. 5Ba yeti ba behɛ te asaala nu'o n bala goleha lamta naba yire la dangoone, zen'an te butolela la nɛɛ tɔ soŋa la, te naba wa ta nyɛ nu'o la n golehe la. 6Te naba la nɛŋa tee te a tɛn'ɛhɛ te dabeem kɛn' en, te a giinla kɔ'ɔhɛ te a duma gbe'era. 7Te naba wa yi' buki te ba tare behereba, Kaldea la ninidoma na. Te naba wa yele Babilon teŋa yamdoma wa yeti, Se'em n nyaŋɛ kaanlɛ ge pa'alɛ mam golehegɔ wa vɔnrɛ, n wan yɛɛlɛ en na'am fuo, ge yɛɛlɛ en sanlema zɔnrɔgɔ ge bahɛ en te a dɛna kpɛ'ɛma gana kpɛ'ɛndoma zan'an sɔ'ɔlom wa poan. 8Te naba wa yamdoma la woo wa'ana ge ba ayena me ka boe ta'an kaanlɛ bii pa'alɛ golehegɔ la vɔnrɛ. 9Te naba Belsazar pabegɛ te dabeem kɛn' en, te a yamdoma la ma'ɛn suram. 10Te naba la ma wom naba la la a nɛrezura la n tɔgɔre se'em la, kɛn' de'eŋɔ la n boe deo seko poan la na yele naba yeti, naa naba, da bahɛ te ho potɛn'ɛrɛ bahɛ te ho pabegɛ bii dabeem kɛn' hɔ. 11Boraa kayema boe ho sɔ'ɔlom wa poan kpe'em. Ho sɔ saŋa ha la, nɛɛhom, bɔkerɛ la yam yuun boe ka poan mɛ wo yena wa yam la. Te ho sɔ Naba Nebukadnezar bahɛ en te a dɛna tiimdoma, behereba, Kaldeadoma la ninidoma la la zan'an nɛŋadaana. 12Se'ere n sɔe la, mi'ilom, yam la bɔkerɛ paŋa kayema n boe Daniel wa te naba yuun tee segɛ en Beltesazar wa poan te a tana pa'ala zaanheŋɔ vɔnrɛ, ge pa'ala magaha, ge tana maala nɛreba yɛla. Bahɛ te ba yi' Daniel wa nananawa na ge a wan pa'alɛ hɔ de vɔnrɛ. 13Te ba tare Daniel wa'an naba wa nɛŋan na, te naba wa tɔgɛ bo en yeti, Hom n de Daniel, Yuda buuri la te mam sɔ pɛnregɛ ba loŋe na la ayema? 14Mam wom la ho yele, te ho kpe'em mɛ, tara nɛɛhom la bɔkerɛ, te yam paŋa n boe kayema bɔna ho poan. 15Nananawa te ba tare yamdoma la behereba kɛn' mam zen'an na te ba kaanlɛ ge pa'alɛ mam golehegɔ wa vɔnrɛ, ge ba ka nyaŋɛ pa'alɛ mam golehegɔ wa vɔnrɛ. 16Ge mam mɛŋa n wom ho yele te ho tan' pa'alɛ zaanheŋɔ vɔnrɛ ge maala yelese'a n kpe'em. Nananawa, ho han wan ta'an kaanlɛ golehegɔ wa ge pa'alɛ ko vɔnrɛ n wan yɛɛlɛ ho na'am futo, ge yɛɛlɛ ho sanlema zɔnrɔgɔ, ge bahɛ te ho dɛna kpɛ'ɛma gana kpɛ'ɛndoma zan'an sɔ'ɔlom wa poan. 17Te Daniel lerege naba wa yeti, tara ho bo'olom la bii ho dekɛ bo se'em. Ge mam wan kaanlɛ golehegɔ wa bo naba, ge pa'alɛ ho ko vɔnrɛ. 18Naa naba, Yenɛ n de Saazuo Daana wa n yuun bo ho sɔ Naba Nebukadnezar sɔ'ɔlom la kantɛ la na'ahegɔ la soŋa. 19Doohe la kantɛ se'ere te Yenɛ ka'ɛ bahɛ a zuo la, saala woo, teŋhe la se nɛreba la buuri woo gbe'era a nɛŋan. Enŋa n bote a ko se'em a koore mɛ, enŋa n bote a bahɛ se'em a bahere mɛ. Enŋa n bote a zɛnkɛ se'em a zɛnkere mɛ, enŋa n bote a sigehe se'em a sigehere mɛ. 20Ge pa'alɛ n mɛŋa n daa ta perɛ en la, Yenɛ daa yehe en a na'am gɔŋɔ la zuo mɛ, ge yehe na'ahegɔ la a zen'an. 21Yenɛ yuun sa'ɛ en mɛ saaleba poan, ge enŋɛ te a potɛn'ɛrɛ dɛna duŋa potɛn'ɛrɛ te a bɔna la mɔen bonhe. A dia daa dela yaama te a ɔbera wo nii la, te mɛgelom luta a zuo gura te a ta baŋɛ te Yenɛ n de Saazuo Daana wa n sɔe sɔ'ɔlom la asaala woo. A me dekere bɔ'ɔra la se'em te a bɔta. 22Ge la bala zan'an, hom a dayɔa Belsazar n pon mina yele ana zan'an la, ho ka sigehe ho mɛŋa ho suunre poan. 23Ho ton zɛnkɛ la ho mɛŋa la saazuo Daana wa, te ya dekɛ a yire poan lɔgɔrɔ wa'ana ze'ele ho nɛŋan, te hom la ho nɛrezura, ho pɔgɔba, la ho pɔgɔbɔ'ɔrenhe nya nyuura ya daam a poan, ge te ho le pɛngera yena te ba dekɛ sanlenpeelega bii sanlema bii nyɔgom bii kuto bii dɔɔrɔ bii kuga maalɛ a te a ka nyɛta bii wona bii bɔkera sɛla la. Ge ya ton ka na'ahera Yenɛ se'ere te ya vo'ohom la ya sɛla woo bɔna a nu'uhen la. 24Bala n sɔe, te Yenɛ wa tom nu'o la na te ko golehɛ golehegɔ wa. 25Golehegɔ la n de se'em dela: Mene, Mene, Tekel, Parsin. 26Yelehom la vɔnrɛ dela, Mene la dela Yenɛ kaanlɛ ho sɔ'ɔlom la dabeha mɛ sagom bɔ. 27Tekel la me dela ba magahɛ ho mɛ behɛ te ho ka paɛ. 28Te Parsin la me dɛna ba aanhom ho sɔ'ɔlom la tɔnrɛ bo la Media la Persia teŋhe. 29Te Belsazar bahɛ te ba yɛɛlɛ Daniel na'am futo, ge yɛɛle en sanlema zɔnrɔgɔ, ge bahɛ te ba mɔɔlɛ te Daniel n de kpɛ'ɛma gana kpɛ'ɛndoma la zan'an sɔ'ɔlom la poan. 30De daarɛ mea yu'uŋɔ te ba ko Kaldea naba Belsazar wa. 31Te Media teŋa naba Darius n de wo yooma pihiyoobe la ayi' la to'e sɔ'ɔlom la.

will be added

X\