Daniel 12

1Saŋkana poan, Yenɛ soŋora Mikael la n gure ho nɛreba wa la wan ihege na. Sunsagaŋɔ wan bɔna, sunsagaŋɔ seko n ka tabelɛ bɔna teŋparɛ wa n pɔhega na paɛ de daarɛ la. Saŋkaŋa poan, ba wan fan' ho nɛresɛba yu'ura n golehɛ eŋɛ gɔŋɔ la poan la bahɛ. 2Sɛba n ki gan'an puuhugo teŋa wa poan la wan ihege, te basɛba keŋɛ vom n ka tare ba'ahegɔ poan, te basɛba me keŋɛ namehegɔ n ka tare ba'ahegɔ poan. 3Sɛba n de yamdoma la wan nɛɛra wo saazuo wa n nɛɛ se'em la, te sɛba n pa'alɛ nɛreba tontɔɔ sore la nyankera wo ŋmarebibihe la ka tara ba'ahegɔ. 4Ge han dɛna hom Daniel, sogɛ yelehom wa, ge kpanbɛ gɔŋɔ wa gura ba'ahegɔ saŋa la. Nɛreba zo'e zo'e wan ɛɛra yaanra, te mi'ilom malom pa'aha. 5Te mam Daniel behɛ, te nɛreba bayi' ze', te ayema zɛ'a kolaa yakenɛ deyema kuŋkune la zuo, te ayema la me zɛ'a yakenɛ deyema la kuŋkune la zuo. 6Te ba ayema yele boraa la n yɛ lɔgɔpeela soma yuli ne kolaa la ko'om la zuo na la yeti, Wane ma'an te nyalema ana wa wan wa'ana tom ba'ahɛ? 7Te mam wom te boraa wa n yɛ fupeela sonɔ wa yuli ne kolaa la ko'om la zuo la zɛnkɛ a nu'uhe tɔ saazuo, ge pɔ' se'em n vɔe ka tara ba'ahegɔ wa yeti, saŋa, sanhe, la sanhe gito wan wa'ana tole. Ge se'em ma'an te se'em n namehere Yenɛ nɛreba wa paŋa la ta ba'ahɛ la, saŋkaŋa mea poan te yele ana wa wan tom ba'ahɛ. 8Han dɛna mam, mam yeen wom mɛ, ge mam ka bɔkɛ. Te ma yeti n daana, yele ana wa han tom ba'ahɛ, bene n ye' na? 9Te a yele mam yeti Daniel, kena. Yele la sogɛ mɛ, kpanbɛ gan'an gura ba'ahegɔ saŋa la. 10Ba wan fɔ nɛreba, duuhe nɛreba pee, sokɛ nɛreba zo'e zo'e yehe be'em poan, ge toonfɛn'ɛhadoma wan kelom tona la toonfɛn'ɛha mea ge kan bɔkɛ, ge sɛba n tare bɔkerɛ la wan mina. 11Pɔhera se'em ma'an te ba wan gu' te ba da kaanbera Yenɛ kaanbegɔ la, ge sɛ lɔgɔseko n tare dɛngerɔ la sagaŋɔ kena na la ze'ele la, la wan dɛna la dabeha tuhure la dabeha kɔbehe seyi' la dabeha pihiwae'. 12Kan'somɔ wan bɔna la nɛra se'em n gure ge tɛnra dabeha tuhure la dabeha kɔbehe setan' la dabeha pihitan' la anuu wa. 13Hom yeen vɔna gura ba'ahegɔ. Ho wan ta ki, ge ta ihege le yɛ'ɛha te ba bo ho ho tɔntɛ se'ere n gan' gura ho la.

will be added

X\