Daniel 10

1Persia teŋa naba Kirus na'am dia yuuma atan' saŋa, te Yenɛ tɔgɛ bo Daniel la te ba segɛ en Beltesazar la zaanheŋɔ poan. Yelehom la dela zaberɛ kantɛ yele, dɛna yelemɛŋɛrɛ, te Daniel wom yelehom la ge bɔkɛ zaanheŋɔ la. 2Dabeha aŋa poan, mam Daniel kele mɛ dabeha ayopɔe ayopɔe sugumnɔɔren botan'. 3Mam ka dite disɛka n zan'anhom bii n obe nɛnɔ, bii daam kalom n nɔɔrɛn, bii n sɔn' kaam sebo, te dabeha ayopɔe sugumnɔɔren botan' wa ta ba'ahɛ. 4Yuunɛ pɔhega ŋmarega la dabeha pihiyi' la anaahe daarɛ, te mam boe la kolaa kantɛ n de Tigris la kuŋkune la zuo. 5Te mam gorege, te boraa kayema n bala yɛ lɔgɔpeela n ane soŋa, te salensoma ma'an sɛganɛ lo' a sea wa. 6Te a iŋa wa nyagera wo kuga peele, te a nɛŋa nyagera wo saa n nyagere se'em la, te ka nini nyagera wo bugum la, te ka nu'uhe la na'ma pelege wo wɔbɔnyɛnɛ te ba sɔn' dɛ la, te ka yetɔgom sakera wo nɛrekooŋɔ n tɔgɔre la. 7Mam Daniel ma'an n nyɛte liligere wa, ge sɛba woo n boe la mam la ka nyɛte dɛ, ge dabeem kantɛ kɛn' ba, te ba zɔta ta sogɛ. 8Mam ma'an n nyɛ liligere kantɛ dena wa, te dabeem kɛn' mam, te n giinla kɔ'ɔhɛ. 9Ge mam wom la boraa wa n tɔgɛ, mam wom a tɔgom la, mam lu la teŋa aliko, te gɔɔm kantɛ nyɔkɛ mam. 10Te nu'o kalom mam, ge ve'e mam te mam nyaŋɛ kpa' n duma. 11Te a yele mam yeti Daniel, Yenɛ eŋɛ ho la nɛrekantɛ. Enŋa n tom mam na. Bala, ihege ze'ele saazuo la ho kelehe soŋa. Te mam ihege zɛ'a ge gbe'era. 12Te a yele mam yeti, Daniel, da bahɛ te dabeem tara hɔ. Pɔhɛ daanse'ere daarɛ te ho sigehe ho mɛŋa Yenɛ nɛŋan soha te ho bɔkɛ yele ana wa la, te Yenɛ wom ho sohoga la. Bala te a tom mam ho zen'an na. 13Ge Persia teŋa kolokpan'arega n gu' mam tara tara la dabeha pihiyi' la deyena, te Mikael n de Yenɛ soŋoreba nɛŋadaana ayema la n bala wa'ana fan' mam Persia teŋa kolokpan'arega wa nu'uhen bahɛ. 14Mam wa'ana te n bahɛ te ho bɔkɛ la sɛla n wan eŋɛ ho nɛreba wa beere ha. Se'ere n sɔe la, liligere la dole mɛ la saŋsɛka n nan kene na. 15Yenɛ soŋora wa n tɔgɔre la mam la, mam lu la teŋa maam. 16Te ayema ana wo asaala la wa'ana kalom mam nɔgbama wa, te mam nyaŋɛ ya'ɛ n nɔɔrɛ tɔgɛ bo soŋora se'em n ze' ne la mam la yeti n daana, liligere wa bo mam la daaŋɔ, te n pon ka le tara paŋa la fiin me. 17N daana, ho yameŋa kan ta'an tɔgɛ bo ho. N ka le tara paŋa la fiin me. N ka tan' vɔ'ɔha. 18Te se'em n ane wo asaala la le kalom mam, bo mam iŋa wa paŋa. 19Ge yele mam yeti, toolom lɔkɔ wa, da zɔta dabeem. Sunma'ahom bɔna la hɔ. Kpemehe ho mɛŋa ze'ele kaŋkaŋe. N tɔgɛ bo mam la, bilam bilam te mam iŋa wa nyɛ paŋa te mam yeti, N daana, nya tɔgɔra ge ho bo n iŋa wa paŋa. 20Te a yele mam yeti, Ho bɔkɛ se'ere zuo te n wa'an ho zen'an na wa? Mam yeti n lebe mɛ ta zabɛ la Persia teŋa kolokpan'arega la. Ge mam ye'ehe wa, behɛ Greek teŋa soŋora be'a maahenɛ mɛ te a wa'ana. 21Ge lan de se'em woo, n yeti n pa'alɛ ho la golehegɔ seko n golehɛ eŋɛ yelemɛŋɛrɛ golehegɔ la poan la vɔnrɛ. Ge la bala zan'an, se'em ka boe zɛ'a la mam te to zabɛ la panhe bɛ'ɛhe wa, han dagana Yenɛ soŋora Mikael n de ho naba wa ma'an.

will be added

X\