Daniel 1

1Yuda teŋa naba Yehoiakim na'am dia yuuma atan' poan te Babilon teŋa Naba Nebukadnezar la a pɛɛntɛɛnreba wa'ana gum Yerusalem zabera la ka. 2Te Daana bahɛ te ba nyaŋɛ Yuda naba wa, vaɛ Yenɛ yire poan lɔgɔrɔ toseto keŋɛ ta kɛn'ɛhɛ Babilon naba bagarɛ deo poan Babilon teŋa. 3Te naba bo kpɛ'ɛndoma sɛba n boe naba nɛŋan tona la nɛŋadaana Aspenaz nɔɔrɛ te a behɛ Israel buuri la poan, sɛba n yehe naba, bii keendoma yiya poan na la ganhɛ bonbilipaalehe. 4Ba dɛna bodibinto te ba iŋhe ka tare fɛn'ɔ, ge te ba som, tara yam sɛla woo poan. Ba tara bɔkerɛ, tare mi'ilom wan ta'an tona naba na'am la tooma. Ge nya bo Aspenaz nɔɔrɛ te a zamehɛ ba Kaldea teŋa yetɔgom, la bo kaanlegɔ. 5Te naba wa bo nɔɔrɛ yeti ba bɔ'ɔra ba disɛka la daam sebo te enŋa naba la mɛŋa dita ge nyuura la. Ge bo nɔɔrɛ te ba zamehɛ ba yuuma atan'. Yuuma atan' la ba'ahegɔ te ba nya wan kɛn' naba la nu'uhen tona bɔ'ɔra en. 6Ban ganhɛ bodibinto wa la, basɛba n de Yudadoma dela Daniel la Hanania la Misael la Azaria. 7Te kpɛ'ɛndoma sɛba n boe naba nɛŋan tona la nɛŋadaana wa tee bo ba yu'ura. A tee segɛ Daniel la, Beltesazar, segɛ Hanania la, Sadrak, segɛ Misael la, Mesak, segɛ Azaria me Abednego. 8Ge Daniel lo' la a suunre te enŋa kan ganlom a mɛŋa la disɛka te naba la dita la bii a daam sebo te a nyuura la. Bala te a sohɛ nɛŋadaana wa te a soŋɛ en te a da ganlom a mɛŋa. 9Te Yenɛ bahɛ te nɛŋadaana la zɔ ninbɔn'ɔn ge dekɛ zo'ohogɔ bo Daniel. 10Te nɛŋadaana wa yele Daniel yeti, Mam zote se'ere dela, n daana naba n loe yan wan dita ge nyuura sɛla bo ya. A han ta nyɛ te hom pelegere mɛ ho taaba la n zone la ho la poan, la wan ana la wane? La wan bahɛ te mam bɔna nyɔnpɔnhega poan naba wa nɛŋan. 11Te Daniel yele nɛŋadaana la n loe se'em te a behera enŋa Daniel la Hanania la Misael la Azaria yeti, 12Magahɛ ho yamehe wa la zɛnvɔɔnrɔ ma'an te to dita, ge bɔ'ɔra tɔ ko'om ma'an te nyuura ta paɛ dabeha pia te ho behɛ. 13Ho behɛ tomam iŋhe n ane se'em, la sɛba n dita naba n pa'ale disɛka la iŋhe n ane se'em, ge nya eta tɔ wo hom nyɛ se'em la. 14Te a sakɛ yele dena wa, te a wan makɛ ba dabeha pia la behɛ. 15Dabeha pia la n ta ba'ahɛ la, a nyɛ te ba nyane ban daa ane se'em la, kanregɛ gana bodibinpaalehe la n dite naba la n pa'alɛ disɛka la. 16Bala te se'em n behere ba ka le bɔ'ɔra ba disɛka la daam sebo te ba loe te ba bɔ'ɔra ba la, ge bɔ'ɔra ba zɛnvɔɔnrɔ ma'an. 17Han dɛna bodibinto tona tonaahe wa, Yenɛ bo ba yam la mi'ilom gɔŋɔ woo zamehegɔ poan, te Daniel tana pa'ala liligere la zaanheŋɔ yema yema vɔnrɛ. 18Te dabahese'a te naba pa'alɛ te a han ta ba'ahɛ ba tare ba na la ta paɛ, te nɛŋadaana wa nya tare ba keŋɛ Naba Nebukadnezar zen'an. 19Te naba wa ta sɔnhera la ba. Ge ba poan, se'em ka boe ba poan ana wo Daniel la Hanania la Misael la Azaria, te bama dɛna sɛba n wan tona bɔ'ɔra naba la mɛŋa. 20Han dɛna la yam bii yelese'ere bɔkerɛ te naba wa ne ta soke ba, a ne nyɛ te kɔma banaahe wa nyane a tiimdoma bii behereba la woo n boe a nu'uhen la sugumnɔɔren pia. 21Daniel boe la bala ta paɛ naba Kirus na'am dia pɔhega yuunɛ.

will be added

X\