Kolↄsɩ 2

1N bote n yele ya mɛ mam daa tom se'em bo ya, la nɛresɛba n boe Laodisea teŋa poan, la nɛresɛba woo n ka mi' mam de se'em la. 2N yeti n eŋɛ wana wa te la kpemehe ya me, ge te ya dɛna boyena nɔŋerɛ poan. Ba me wan tara yelemɛŋɛrɛ bɔkerɛ. Ba han tara bala, ba wan baŋɛ te Yenɛ yelese'ere n sogɛ la, yele la dela Krista mɛŋa. 3Enŋa Krista n de kparehega yu'uha Yenɛ toolom lɔgɔrɔ la n de yam la mi'ilom la. 4N yeti ya dena wa te ya da bahɛ te nɛra pan'ahɛ ya la nɔkpɛ'ɛma n ane wo yam n boe bini la. 5Te mam ka boe la ya te ya nyɛte mam ge n boe la ya mɛ ya sea poan. N me tara popeelom la mam nyɛ' te ya bɔna bɔŋyeŋɔ poan ge sɛ' ze'ele kaŋkaŋɛ ya sakerɛ Krista sore dɔlɔga la poan la. 6Ge yan diŋɛ sakɛ bo Yesu Krista te enŋa n de Na'ayenɛ la, bɔna ya la en. 7Sɛ' ya me wo nyɛga la a poan. Mɛ' ya mɛhe a poan ge me kpe'em yan nam en se'em la poan wo ban daa pa'alɛ ya se'em la, ge perɛ la pɛnka bɔ'ɔra en. 8Dene poan, da sakɛ ya te nɛra dekɛ asaala yam yoo pan'aha ya te ya bahɛ te ya dɛna la a yameŋa. Se'ere n sɔe la, yam bona dela yam sebo te nɛresaaleba mɛhe la Yenɛ diŋdoma yuun daa pa'ala. Ge bo ka ze'ele Krista zen'en na. 9Yenɛ naanɛ zan'an daa boe la Krista daa tare asaala iŋnaanɛ se'ere la poan. 10Bala me te ya me naɛ la Krista la dɛna tontɔɔ Sea poan. Enŋa Krista n sɔe sɛla woo n tare paŋa bii kpe'eŋo behera. 11Krista n daa fan' ya bahɛ ge bo ya vom sebo n ka tare ba'ahegɔ Yenɛ zen'en la, la daa ana wo yɔ'ɔra ŋmaa te nɛreba basɛba ŋma'. Gee dena wa dagɛ iinhe ŋmaa ma'an, ge la dela be'em ŋmaa ya bɔŋa poan. 12Te yan to'e ko'om soa la, la daa dela ba lagom pin' ya mɛ la Krista, ge te ya lagom ihege mɛ ya kum poan la Krista, doohe la yan nam Yenɛ se'em n vo'e Krista a kum poan la. 13Yamam n daa zaan Yenɛ zen'en nan lɛm en ya dɔla Krista Yesu la zuo. Se'ere n sɔe, Krista ki te Yenɛ bahɛ ya be'em bo ya. 14To zan'an tom la be'em Yenɛ nɛŋan te la dɛna tuure. Ge Yesu n daa ta ki' punpuuredɔɔ la zuo, a sagom tuure la. Dena wa fan' to bahɛ. 15Punpuuredɔɔ la zuo la, Krista daa to'e zuodoma la kpɛ'ɛndoma zaba lɔgɔrɔ la zan'an ge di'ihi ba vi nɛrekooŋɔ poan. 16Bala, da bahɛ ya te se'em le bo ya kiha yɛhera disɛka te ya wan dita, bii ko'om sebo te ya wan nyuura, bii dabahese'a n de kiha dabeha, bii ŋmarepaalehe de'enɔ, bii Vo'ohogo Dabeha. 17Yele ana wa woo dela yelese'a n de fiin n wan wa'an pooren na. Ge de yelemɛŋɛrɛ zan'an zan'an dela Krista. 18Da bahɛ ya se'em n parom te a sigehe la a mɛŋa ge me po'oha soŋoreba behe ya yoo, la yan ka ete n ete sɛla la zuo. Se'ere n sɔe la, enŋa taaba eta la sɛla te a yeti a nyɛ'. Dena wa me ka ze'ele la saazuo na, ge de ze'ele la teŋa wa zuo na. 19A daana me ka gorɛ Krista se'em n de zuo iŋa poan la. La dela Krista paŋa te iŋa wa wo giinla la kɔnba toŋe taaba zɔ'ɔra soŋa soŋa wo Yenɛ n bote se'em la. 20Ge ya ki' mɛ la Krista la, nya bɔna fai te teŋa wa sea panhe ka sɔna ya. Wane te ya eta wo ya kelom dɔla kiha la n yele se'em la, 21Da gorɛ ena, da lɛm ena, da kalom ena? 22Yele ana woo ka tare vɔnrɛ ho han dekɛ ba ge ba dela asaala mɛhe n eŋɛ kiha bama pa'alɛ aŋa. 23Kiha ana wa ane wo yam n boe bini la. Se'ere n sɔe la a pa'alɛ nɛreba te ba eta sɛla n kpe'em, te ba pa'alɛ bama n dekɛ ba mɛhe kaanbe bo Yenɛ se'em. Ba sigehe ba mɛhe me, saanha ba iinhe. Ge yelemɛŋɛrɛ, yele ana kan ta'an soŋɛ nɛreba te ba ta'an ba koŋkoma'ahom yooro la.

will be added

X\