Kolↄsɩ 1

1Mam Paul se'em n de Yesu Krista tontoneba la ayema yɛhera doohe la Yenɛ potɛn'ɛrɛ poan la la to sɔɔn Timoti n golehɛ gɔŋɔ wa. 2To golehɛ bɔ'ɔra la Yenɛ nɛreba la n de to sɔɔnrɔ bɔna Kolose teŋa poan dɛna birikindoma Krista nɛŋa la. To Sɔ Yenɛ wan eŋɛ ya zo'ohogɔ gee bo ya sunma'ahom. 3Daarɛ woo, to bo'ore Yenɛ fara ya zuo. To eŋɛ bala la to han ta po'ohɛ Yenɛ se'em n de to Na'ayenɛ Yesu Krista Sɔ la. 4Se'ere n sɔe la, to wom ya sakerɛ Krista Yesu sore dɔlɔga la poan n ane se'em la yan me tare nɔŋerɛ se'em bɔ'ɔra Yenɛ nɛreba la. 5Ge ban daa pɔhɛ wa'ana tɔgɛ yelemɛŋɛrɛ yetɔgom la n de yelesoma la bo ya la, ya daa wom ban daa yele sɛla te ya sakɛ se'em gura ya potɛn'ɛra poan la. Bala, yan sakɛ se'em bo Yesu, la yan tare nɔŋerɛ se'em nya boe la yan sakɛ se'em gura ya potɛn'ɛra poan la. Yenɛ me dekɛ dena wa me biŋe soŋa soŋa a zen'en saazuo ha bo ya. 6Ge Yelesoma la bahere te nɛreba n nyɛta kan'somɔ Yenɛ zen'en ge me le yeregera paara nɛra woo teŋa wa zuo. Bo kɔ'ɔn ana la bala wo bon daa ane ya zen'en se'em yan daa pɔhɛ wom Yenɛ n ete nɛreba som se'em la dela yelemɛŋɛrɛ wa la. 7Ya zamehɛ dena wa la to sɔɔnsoŋa Epapras zen'en. Tomam la enŋa lagom dɛna la Yenɛ yamehe. A dela birikindaana sɔe tomam tona bɔ'ɔra Krista. 8Ge la dela enŋa n yele tomam yɛhera Sea la n bahɛ ya te ya tara nɔŋerɛ se'em. 9Te dena mea zuo daanse'ere daarɛ te to daa wom ya yele tole na yehe zina, to kɔ'ɔn po'oha Yenɛ bɔ'ɔra ya mɛ daarɛ woo. To sohore Yenɛ te a bahɛ ya te ya mina a yɛla la yɛhera la yam sebo woo la bɔkerɛ se'ere woo te enŋa Sea la bahera te nɛreba tara la. 10Bala te ya wan ta'an bɔna wo Na'ayenɛ n bote ya bɔna se'em la ge me daarɛ woo eta sɛla n ete a suunre nyɛlom. Ya bɔŋa poan, ya wan tona tonsoŋse'ere woo ge te ya mi' Yenɛ se'em me wan zo'e pa'ahɛ. 11Paŋsɛka n ze'ete Yenɛ soŋa paŋa poan na la wan bahɛ te ya kpe'em, la ya ta'an din'inha suunre ŋmebera yele woo poan. Ya me wan tara popeelom, 12bɔ'ɔra to Sɔ Yenɛ fara. La dela enŋa n bahɛ ya te ya nara te ya lagom to'e sɛla te a dekɛ biŋe a yelemɛŋɛrɛ sɔ'ɔlom la poan te a bo a nɛreba la. 13A fan' tɔ la likatooma poan bahɛ, ge nya tare tɔ soŋa soŋa wa'an a dayɔba'arɛ Yesu sɔ'ɔlom la poan na. 14La dela a Dayɔa Yesu poan te enŋa Yenɛ fan' to bahɛ. Dena wa vɔnrɛ dela a bahɛ la to yelebe'ero bo to. 15Krista dela Yenɛ se'em te ba ka nyɛta naanɛ. Sɛla woo te Yenɛ naam la Krista n de Dayɔdeeŋa sɔna behera. 16Te la dɛna la Krista poan te Yenɛ naam sɛla woo n boe saazuo ha la teŋa wa. La dela sɛla te ba nyɛta, la sɛla te ba ka nyɛta, la sea poan panhe, daandoma, zuodoma, la kpɛ'ɛndoma. Enŋa Krista poan te Yenɛ daa naam sɛla woo ge a me daa naam bala bo en mɛ. 17Krista daa boe mɛ ge te sɛla woo daa baŋɛ bɔna. La daa dela enŋa poan te sɛla woo bɔna a zen'en soŋa soŋa wa. 18Enŋa n de iŋa wa zuodaana. Iŋa wa me dela lagaŋseko n dole enŋa Yesu sore la. Enŋa le yɛ'ɛha n de se'em n bo'ore iŋa wa vom. Enŋa n le dɛna Dayɔdeeŋa nɛra woo poan la, te Yenɛ bahɛ te a le vo'e a kum poan. Bala te enŋa ma'an wan ta'an dɛna yiadaana yelese'ere woo poan. 19La daa dela Yenɛ mɛŋa n daa bote te a Dayɔa la mɛŋa tara Yenɛ naanɛ la zan'an a poan. 20Te la dɛna la enŋa Yenɛ Dayɔa poan te a daa tɛn'ɛhɛ tare sɛla woo te a naam saazuo ha la teŋa wa zuo lebe a mɛŋa zen'en na. Yenɛ daa eŋɛ sunma'ahom la nɛreba doohe la a Dayɔa la kum punpuuredɔɔ zuo la. Dena wa poan te a le tare sɛla woo n boe teŋa wa zuo la saazuo ha lebe a mɛŋa zen'en na. 21Ge wonse'eren ha la, ya daa nan zaan mɛ la Yenɛ ge me daa dɛna a diŋdoma. Ya daa ane bala la yan daa tone be'emtooma ge me tɛn'ɛha be'em tɛn'ɛhegɔ la zuo. 22Ge doohe la Yenɛ Dayɔa n daa ki' wo asaala n kiire se'em la zuo, te Yenɛ nya dekɛ ya te ya dɛna la a zɔdoma. A eŋɛ dena wa te a ta'an bahɛ ya te ya dɛna toolom nɛreba sɛba n ka tare dɛngerɔ la ganleŋɔ a nɛŋan. 23Bala, dene ya birikindoma ge sɛ' ze'ele kaŋkaŋɛ ya sakerɛ Yesu sore dɔlɔga la poan. Da bahɛ te sɛla min ya yan sakɛ ge gura sɛla ya suunre poan la. La daa dela yelesoma wa poan te mam Paul dɛna yameŋa. Yelesoma aŋa n bala te ba mɔɔlɛ bo nɛra woo teŋa wa zuo wa. 24Ge nananawa, n tare popeelom la mam n daa nyɛ' namehegɔ ya zuo la. Mam namehere wana wa n iŋa wa poan dela n soŋɛ ba'ahɛ namehe seko te Krista daa namehɛ lagaŋɔ la zuo. 25Yenɛ me n bahɛ mam te n dɛna yameŋa bo lagaŋseko n dole Yesu sore la. Enŋa Yenɛ n bo mam toondena wa te n tom yamam som zuo. Toonɛ la me dela n kɔ'ɔn mɔɔla a yɛla la bɔ'ɔra nɛreba. 26Nɛra daa ka mi' a yɛla wa yuuma yuuma n tole ha. Ge nananawa, a lilige a bo a nɛreba. 27Ge Yenɛ n bote a eŋɛ se'em n wana: A bote a bahɛ mɛ te a nɛreba mina a yelese'a te nɛra ka mina la. A yele ana wa dela yelese'a n tare pɛnka kantɛ. Yele la dela, Krista n boe ya poan la zuo te ya wan nyɛ' Yenɛ pɛnka soŋa la. 28Bala, to mɔɔlɛ la Krista yele bɔ'ɔra nɛra woo. To tare yam sebo woo te to mina kan'ana ge pa'ala nɛra woo. To ete wana te to bi'ihe nɛra woo Krista poan. 29Bala, yele dena wa zuo, mam tone mɛ ge me zegera te n tara paŋsɛka n gane zan'an te Krista bɔ'ɔra la tona. Paŋkaŋa n bala te n tara tona wa.

will be added

X\