Amos 8

1Te Daana Na'ayenɛ lilige mu'uro pi'ɔ pa'alɛ mam zaanheŋɔ poan. 2A soke mam yeti, Amos, ho nyɛ la bem? Te mam lerege yeti, Mu'uro pi'ɔ. Te Na'ayenɛ yele mam yeti, Saŋa la bi'e mɛ wo mu'uro wa, te n sagom n nɛreba Israeldoma wa, n ka yeti n bahɛ ba la fiin me. 3Daana Na'ayenɛ yeti, De daarɛ, yooma se'a n ne yoona Yenɛ Yire la wan lebege kaahega zen'an woo. Kum wan ko zo'e te ba gbɛ'ɛra pin'ira digi digi. 4Yamam sɛba n nɛɛre nahadoma, ge sa'aha taromdoma teŋa la poan la kelehe ya. 5Ya yetɔgom dela, Ŋmarepaalega wan tole la wane ma'an te to da' ki biŋe? Bii Vo'ohogo Daarɛ wan tole la daan denɛ te to keŋɛ koohe ki'? Tara laa peka magara, ge pa'aha ligiri kalam kalam, fan' nɛreba tomam bote se'em, 6la to nyɛ ligiri da' taromdoma, ge tara tagara pirihom da'ara nahadoma, ge tara ki' vagela pa'aha kɔɔha. 7Yakob Na'ayenɛ wa pɔ mɛ te a kan tamɛ yelebe'seto te ya tona la, la koyena me. 8Wana ka seke teŋa la gbe'era ge te ka nɛreba la kɛla? Teŋmiiŋɔ wan uke teŋa la ta tanhɛ ka bahɛ wo ko'om ne ta perɛ Nile Kolaa ne ɔlegɛ tole ge gee ka se'em la. 9Daana Na'ayenɛ biŋe nɔɔrɛ te de daarɛ, n wan bahɛ te wontɛɛŋa sobege, te la han pon dɛna wontɛɛŋa, la wan lebege lika. 10N wan bahɛ te ya de'eŋɔ woo lebege koonɔ, te ya yooma zan'an lebege fabelegɔ. Ya wan sɛnga sunsagaŋɔ futo, ge siie ya zuto. N wan bahɛ te saŋkaŋa ana wo nɛra biyeŋɔ n ki te a kɛla se'em la bo ya, dabeha enŋa han ta ba'ahɛ, ya mɛhe wan baŋɛ te a dela dabeha tooro. 11Daana Na'ayenɛ yeti, Behɛ ya, dabeha kene na te n wan bahɛ te kom sige teŋa la zuo na, dagɛ dia la ko'om kom, ge Na'ayenɛ yetɔgom la kom. 12Nɛreba wan yagehɛ mɔga, ze'ele zuɔ keŋɛ dapɔya ɛɛra Na'ayenɛ yetɔgom la, ge ba me kan nyɛ bɔ. 13Dabeha aŋa poan, pɔgɔ sonhe la bodibinto wan luta ligira la ko'nyuuro. 14Han dɛna sɛba n tare Samaria teŋa bagarɛ la te de dɛna ba pɔtɛ la, bii Dan teŋa bagarɛ, bii Beerseba teŋa bagarɛ la, bama zan'an wan lu kan malom ihege.

will be added

X\