Amos 7

1Daana Na'ayenɛ lilige la zaanheŋɔ pa'alɛ mam, te mam nyɛ te a maahom la sonwa'ara te ba han ta kɛ' naba dia tɔntɛ la ba'ahɛ, ge te pooren borega la yehe ba'aha, a bahɛ te sonwa'ara wa wa'ana. 2Te mam nyɛ zaanheŋɔ la poan te sonwa'ara la wa'ana obe sɛla woo n ze' samanɛ zuo zan'an, te mam kaahɛ soke Daana Na'ayenɛ wa yeti, Eŋɛ suguru, Yakob yeti a eŋɛ la wane vɔna ge nan pɔ'ɛ wana wa? 3Te Na'ayenɛ tee a suunre dena wa poan ge yeti, La kan eŋɛ bala. 4Te Daana Na'ayenɛ lilige pa'alɛ mam te mam nyɛ te a maahom la bugum te a dekɛ gankɛ teŋparɛ wa, te bugum la di ko'kanra n gan' teŋa teŋa ha, ge loŋe dita teŋparɛ wa zuo. 5Te mam yeti, Daana Na'ayenɛ, di suguru bahɛ. Yakob yeti a eŋɛ la wane vɔna ge nan pɔ'ɛ wana wa? 6Te Daana Na'ayenɛ tee a suunre dena wa poan ge yeti, La kan eŋɛ bala. 7Te Daana lilige pa'alɛ mam zaanheŋɔ poan, te mam behɛ te Daana la ze' lɛm la dangoone, zanla mɛta mi' magahega. 8Ge Na'ayenɛ soke mam yeti, Amos, ho nyɛ la bem? Te mam lerege yeti, Mɛta mi'an. Te Daana yele mam yeti, Behɛ, n yeti n magahɛ la n nɛreba Israeldoma wa behɛ. N kan bahɛ la nɛra ayena me. 9N wan sagom Isaak na'ahere Yenɛ zen'enhe la zan'an, Israel kaanbegɔ zen'enhe la woo wan lebege daboto, ge te n dekɛ so'a zabɛ la Yeroboam yiredoma. 10Te Amazia n de Betel malemadaana la tom nɔɔrɛ bo Yeroboam n de Israel naba la yeti, Amos kɔ'ɔn ɛɛra la yelekantɛ bagala ho zuo Israel teŋa wa poan. Teŋa la kan ta'an tara a yɛla la zan'an. 11Amos yeti, So'a wan ko Yeroboam, ge te ba zabɛ nyaŋɛ Israel, tare Israel nɛreba yehe loŋe teŋa. 12Te Amazia nya yele Amos yeti, Fɔnregɛ n zen'an la ho behega la. Lebe ta bɔna Yuda teŋa poan dita ge dɛna ho nɔtɔgɔha bilam ha. 13Da le ze'ele Betel teŋa wa poan tɔgɛ sɛla. Se'ere n sɔe la, ka'lam dela naba zen'an, ge le dɛna teŋa la zan'an na'am yire. 14Te Amos lerege yele Amazia yeti, Mam dagɛ nɔtɔgɔha, n sɔ me daa pon dagana nɔtɔgɔha, mam go'ole piihe mɛ, ge sɛɛra n kenkanhe. 15Te Na'ayenɛ mɛŋa yehe mam n go'olɛ piihe la poan na yele mam yeti, Keŋɛ ta tɔgɛ mam nɔɔrɛ bo n nɛreba Israeldoma. 16Bala kelehe Na'ayenɛ n yeti ho se'em. Hom yeti n da porɛ sagaŋɔ bahɛ Israel zuo, n da porɛ too bahɛ Isaak buuri zuo. 17Bala, Na'ayenɛ yeti, Ho pɔga wan lebege yaloma teŋa wa poan. Ho dayɔɔhe, la ho pɔyɔɔhe wan ki zaberɛ poan. Ba wan to'e ho teŋa wa aanhom ka tɔnrɛ, te hom mɛŋa ta ki sateŋa n zaan poan. Israeldoma wan loŋe teŋa n dagɛ ba teŋa.

will be added

X\