Amos 4

1Samaria Zoore zuo pɔgɔhe wa n kanregɛ wo Basan teŋa nii wa, kelehe ya yele dena wa. Ya namehere la nahadoma, nɛɛra taromdoma, zin'an ge tona ya sereba yeti, Ta da' daam na te to nyu'. 2Daana Na'ayenɛ pɔ' la a mɛŋa fa'a bɔŋa la yeti, Dabaherɛ wan seren wa'ana, te ba dekɛ mi'inhe lo ya, ve'e ya keŋɛ. Ya sɛba n wan gee la, ba wan dekɛ zim baŋa tuhe ya nyɔya poan ve'e ya keŋɛ. 3Ba wan kibigɛ yoko dangoone zen'an, ve'e ya doohe ko poan yehe, tare ya ta lobe bahɛ Harmon teŋa ha. Na'ayenɛ yele se'em n bala. 4Malom lebe ya Betel teŋa ta tom ya be'em la yan bote se'em, keŋɛ ya Gilgal teŋa ta tom be'em gaŋɛ bala. Tare ya ya kaanbegɔ bo'olom kena daarɛ woo bolika na, ge yɔɔra ya pia porogerɛ bo'olom dabeha atan' atan'. 5Tare ya pɛnka boroboro te mi'ihom bɔna de poan kena na, ge ŋmɛ'ɛra ya nyɔn'ɔn la yamam n bo'ore ya popeere bo'olom se'em. Israeldoma wa, yan nɔŋɛ yelese'a etegɔ n bala. Daana Na'ayenɛ yele se'em n bala. 6Mam bahɛ te kom n sige ya teŋhe woo poan, ge la bala zan'an, ya kan ŋmɛregɛ lebe n zen'an na. Na'ayenɛ n yele. 7Te mam nyɔkɛ saa, se'em ma'an te ya dia ta gee ŋmarehe setan' la ya kɛ' la, te saa la ka niira bɔ'ɔra ya. Te n ne bahɛ te saa ni teŋa kayema poan, ge bahɛ teŋa kayema, ni va'am boyema poan, ge lɔkɛ va'am boyema bahɛ. 8Te nɛreba ɛɛra lɔ'ɔha teŋhe angera ko'om kula nyuura, ge la bala zan'an, ya kan ŋmɛregɛ lebe n zen'an na. Na'ayenɛ yele se'em n bala. 9Te n dekɛ warɛ n ka tare makerɛ, la salurugo n ka tare makerɛ ŋmɛ' ya, ge bahɛ te sonwa'ara ɔbera ya va'am bibihe tiihe, kenkanhe la kaam tiihe zan'an, ge la bala zan'an, ya kan ŋmɛregɛ lebe n zen'an na. Na'ayenɛ yele se'em n bala. 10Te n tom too ya teŋa wa poan na wo mam yuum eŋɛ Mizraim teŋa se'em la. Mam ko ya boraahe mɛ pɛɛntɛɛnrɛ poan, sagom ya yiri zan'an, te ya ki fɛn'ɛra ya tiiheŋɔ zen'an la poan, ge la bala zan'an, ya ka ŋmɛregɛ lebe mam zen'an na. Na'ayenɛ yele se'em n bala. 11Te n sagom ya sɛba wo mam sagom Sodom la Gomora teŋhe se'em la, te ya ana wo dɔɔ te ba zɛ ko foe bugum poan la, ge la bala zan'an, ya kan ŋmɛregɛ lebe mam zen'an na. Na'ayenɛ yele se'em n bala. 12Bala, mam wan eŋɛ Israel se'em n wana. Mam wan eŋɛ ya wana wa la zuo, Israel maahom to'ohɛ Yenɛ la. 13Na'ayenɛ n maalɛ zɔya la sabeeo, ge liligera a potɛn'ɛrɛ pa'ala asaala la. Na'ayenɛ n bahera te wontɛɛŋa lɛbɛgera yu'uŋɔ la. A yu'urɛ dela Na'ayenɛ n de Yenɛ, dɛna Pɛɛntɛɛnreba Nɛŋadaana.

will be added

X\