1 Na'ayenɛ yeti, Moab teŋa yelebe'ero totan', tonaahe la zuo, n kan bahɛ n sunsunyiim la ba. Bama n nyɔ' Edom naba la bugum, te a di lebege tampegelom. 2 N wan tom bugum bahɛ Moab teŋa zuo na, te bo di ba Keriot pɛɛntɛɛnreba bɔŋa zen'enhe la. Zaba tentana peebego, la zaba mɛŋa wan lobɛ Moab teŋa. 3 N wan sagom teŋa la naba, kɔrom teŋa la kpɛ'ɛndoma zan'an. Na'ayenɛ yele se'em n bala. 4 Na'ayenɛ yeti, Yuda teŋa yelebe'ero totan', tonaahe la, n kan bahɛ n sunsunyiim la ba. Ba zagahɛ Na'ayenɛ pa'alegɔ la mɛ, ka dɔla a nɔɔrɛ la. Se'ere n sɔe la yena yooro n pan'ahɛ ba. Ba yaabdoma n yuun dole yena se'a la n pan'ahɛ ba te ba bɔregɛ, 5 N wan tom bugum bahɛ Yuda teŋa zuo na, te bo di Yerusalem pɛɛntɛɛnreba bɔŋa zen'enhe la. 6 Na'ayenɛ yeti, Israel yelebe'ero totan', tonaahe la, n kan bahɛ n sunsunyiim la ba. Ba tare la nɛre tontɔɔdoma kɔɔha ligiri, ge tara nahedoma kɔɔha tɔ'ɔha tagara pirihom boyena boyena. 7 Ba zom la taromdoma zuo nɛɛra ba wo ban nɛɛre teŋa se'em la, ka bɔ'ɔra taromdoma la boorɔ n de se'em. Te boraa, la ka dayɔa lagona taaba la pɔka kayena, dɛngɛ mam Fa'a Yu'urɛ la. 8 Ba dole ɛ gan'an la ba bimbina n boe zen'an woo zuto, tara futo toseto te nɛreba tare na ŋmɛ' tampogerɛ tɛ'ɛra gan'an, ge kɛɛra nɛreba daam ba yena deto la poan tɔ'ɔha nyuura. 9 Ge mam n wa sagom Amoridoma ba ninin, la ban daa pon kanregɛ wɔgɛ zɛ'a ta'an wo tiihe kanra la, mam wa ze'ele la a zuin na paɛ a na'ma. 10 Mam n tare ya ze'ele Mizraim teŋa yehe na, tara ya yuuma pihinaahe mɔen la ha, te n dekɛ Amoridoma teŋa wa bo ya. 11 Ge me le yehe nɔtɔgɔheba ya poan, ge yehe ya bonbilipaalehe ze'ele bo n mɛŋa. Israel nɛreba wa, n parom mɛ? Na'ayenɛ yele se'em n bala. 12 Te yamam bahɛ te bonbilipaalehe wa nyuura daam, ge bo mam nɔtɔgɔheba la nɔɔrɛ te ba da tɔgɔra sɛla te mam nɛɛra bɔ'ɔra ba la. 13 Bala zuo, n wan kɔ' ya wo tebehegɔ n gaŋɛ toroko te ko kɔ' se'em la. 14 Se'em n pon tana koroha ya poan kan peɛn, se'em n pon dɛna paŋadaana ya poan kan ta'an dekɛ a paŋa eŋɛ sɛla. Pɛɛntɛɛnra kan ta'an fan' a mɛŋa bahɛ. 15 Pɛɛntɛɛnra ka boe wan ta'an ze'ele de daarɛ, na'se'a n tan' koroha kan peɛn, bii se'em n mi' yiri ban'an zɔ to'e a vom. 16 Se'em n ba' kpe'em bɔna ya poan wan zɔ beele de daarɛ. Na'ayenɛ yele se'em n bala.
