Amos 1

1Amos n de go'ola piihe Tekoa teŋa poan n nyɛ se'ere n yeti de eŋɛ Israel teŋa, yuuma ayi' poan ge te teŋmiiŋɔ la wa'ana na la yetɔgom n wana. Bala ma'an te Uzia n de Yuda, la Yerusalem teŋa naba, te Yehoas dayɔa Yeroboam dɛna Israel teŋa naba. 2Amos yeti, Na'ayenɛ ze' la Zion zoore la zuo tanhera na, a konkore ze'ete la Yerusalem teŋa na, te bɔn'ɔn yaama woo ku'e, te Karmel zoore zuo mɔɔ zan'an ku'e. 3Na'ayenɛ yeti, Damaskus teŋa toonbe'ero totan', tonaahe la zuo, n kan bahɛ sunsunyiim la ba. Ba dekɛ la kuto tanduŋa n ane nyareha nyareha tɔ Gilead zuo buguhe buguhe. 4Bala, n wan tom bugum bahɛ Hazael yire poan na, te bo di Ben Hadad pɛɛntɛɛnreba bɔŋa zen'enhe la zan'an sagom. 5N wan kɔ' Damaskus teŋa nayahe bahɛ. N wan sagom naba sɛka n boe Aven teŋa bɔn'ɔn poan la la ka nɛreba bahɛ, ge sagom Bet Eden teŋa naba. Aram teŋa nɛreba wan loŋe ta kɛn'ɛra Kir teŋa poan. Na'ayenɛ yele se'em n bala. 6Na'ayenɛ yeti, Gaza teŋa toonbe'ero totan', tonaahe la zuo, n kan bahɛ sunsunyiim la ba. Ba zabɛ mɛ nyɔkɛ teŋhe nɛreba kekeko, koohe ba bo Edom teŋa te ba dɛna da'aba. 7Bala, n wan tom bugum bahɛ Gaza dangɔɔma zuo na, bo wan di Gaza pɛɛntɛɛnreba bɔŋa zen'enhe la. 8N wan sagom Asdod naba n boe Askelon teŋa la. N wan zabɛ la Ekron teŋa wa ko Pilistidoma wa zan'an. Daana Na'ayenɛ n tɔgɛ. 9Na'ayenɛ yeti, Tire teŋa toonbe'ero totan', tonaahe la zuo, n kan bahɛ sunsunyiim la ba. Ba kɔ' sɔɔn nɔɔrɛ la mɛ ge zabɛ nyɔkɛ nɛreba kekeko koohe ba bo Edom teŋa te ba dɛna da'aba. 10Bala, n wan tom bugum bahɛ Tire teŋa dangɔɔma zuo na, te bo di Tire pɛɛntɛɛnreba bɔŋa zen'enhe la. 11Na'ayenɛ yeti, Edom teŋa toonbe'ero totan', tonaahe la zuo, n kan bahɛ n sunsunyiim la ba. Ba dekɛ la pɛɛma dige ba sɔɔnrɔ te suguru ka malom bɔna, ba suunre ihegere mɛ la ba sɔɔnrɔ wa saŋa woo, te ba ka malom tara suguru bɔ'ɔra ba sɔɔnrɔ wa. 12Bala, n wan tom bugum bahɛ Teman teŋa zuo na, te bo di Bozra pɛɛntɛɛnreba bɔŋa zen'enhe la. 13Na'ayenɛ yeti, Ammon teŋa toonbe'ero totan', tonaahe la zuo, n kan bahɛ n sunsunyiim la ba. Ban wa bɔta te ba yalegɛ ba teŋa beene pa'ahɛ la, ba ta zabɛ mɛ la Gilead teŋadoma, larom teŋa la pɔge poohe fɔ se kɔma lobe bahɛ. 14Bala, n wan tom bugum bahɛ Araba teŋa dangɔɔma zuo na, te bo di pɛɛntɛɛnreba bɔŋa zen'enhe la. N wan bahɛ te pɛɛntɛɛnreba bibige teŋa la wo sim la. Ba wan vagelom teŋa la wo sabeeo la zaberɛ daarɛ. 15Teŋa la naba, la ka kpɛ'ɛndoma zan'an wan zɔ loŋe teŋa. Na'ayenɛ yele se'em n bala.

will be added

X\