Tõoma 8

1Saul me nu'o daa lagom bɔna Stepen kum la poan. De daarɛ mea te lagaŋɔ la zan'an n boe Yerusalem teŋa poan la pin'ilom nyɛta namehegɔ kekeko. Ba daa zɔ' yeregɛ keŋɛ la Yudea teŋa la Samaria tenhen poan ge daa ge la Yesu tontoneba la ma'an. 2Sɛba n zote Yenɛ n daa dekɛ Stepen ta laɛ ge fabelɛ bo en. 3Ge Saul sine ge zegera te a sagom Yesu po'oheba la. A dole yire yire nyɔgera boraahe la pɔgɔhe sɛba n dole Yesu sore la, tare ba keŋɛ ta pagɛ pakadeen. 4Sɛba n de Yesu po'oheba la gee daa zɔ' yeregɛ la daa dole la teŋhe teŋhe tɔgɔra Yenɛ yɛla bɔ'ɔra nɛreba. 5Filip dela ayema ge keŋɛ Samaria teŋa poan. En paɛ la, a tɔgɛ Krista se'emdaana ma'an te Yenɛ loe la yɛla bo ba. 6Nɛrekooŋɔ la n wom Filip yetɔgom la ge nyɛ' yelekerehe tooma la ta tom la, ba yu'uhɛ ba toba kelehe n yele se'em la. 7Yelekerehe la dela bonbɛ'ɛhe nyabɛ ge yehe nɛreba kekeko zen'en na, ge te wɔbehe la kɔɔrɔnɔ ban'ahe me bahɛ. 8Te la de'a popeelom bo nɛreba la n bo Samaria teŋa poan la. 9Boraa kayema n daa boe Samaria teŋa. A yu'urɛ daa dela Simon ge a eta tiimtooma te la de'a pakerɛ bo nɛreba la n bo bini la. A me daa le dekɛ a mea te enŋa dela nɛrekantɛ. 10Nɛra woo, bonkotɛ woo, bonbila woo, ma'ɛn ba mɛhe kɛleha Simon ge yɛta te, Boraa wa tare la yenɛ kantɛ paŋa. 11Se'ere n sɔe te nɛreba la daa kɛleha a tiimtooma la n daa tare pakerɛ la me daa le tom bini te la yoe. 12Ge Filip n wa'an ba zen'an ba ta sakɛ la Filip yetɔgom la yɛhera la Yenɛ Sɔ'ɔlom la Yesu Krista yu'urɛ poan la. Ba me to'e ko'om soa, boraahe la pɔgɔhe. 13Simon mɛŋa me sakɛ bo Yenɛ Yelesoma la ge to'e ko'om soa. A dekɛ a mea lamenɛ Filip ge nyɛ' Filip n daa eŋɛ yelekerehe tooma te la de'a pakerɛ bo en. 14Ge te Yesu tontoneba la n boe Yerusalem teŋa poan la n daa ta wom te Samaria teŋa nɛreba sakɛ bo Yenɛ Yelesoma la, ba tom Peter la Yon ba zen'en. 15Peter la Yon n daa ta paɛ la, ba sohɛ bo sɛba n sakɛ bo Yesu la te Yenɛ Sea la wa'an ba zen'an na. 16Se'ere n sɔe la, ba daa yee nan to'e la ko'om soa to Daana Yesu yu'urɛ poan ge Yenɛ Sea la daa nan ka boe la ba. 17Te Peter la Yon dekɛ ba nu'uhen pagalɛ ba zuto te Yenɛ Sea la wa'an ba zen'an na. 18Te Simon nyɛ' Yenɛ tontoneba la n dekɛ ba nu'uhe pagalɛ nɛreba la zuto ge te Yenɛ Sea la wa'an ba zen'an la. Bilam poan te a me dekɛ ligiri bo Peter la Yon 19ge yele ba yeti, Bo' ya mam me paŋkana wa, te nɛrese'em te n dekɛ n nu'uhe pagalɛ, Yenɛ Sea la wan wa'an a daana zen'an na. 20Ge Peter lebehe en yeti, Ho wan ki' pɔn'ɛn la ho ligiri la zan'an la hon tɛn'ɛhe te ho wan ta'an da' Yenɛ bo'olom la ligiri la. 21Ho nɛŋa ka boe bini. Se'ere n sɔe la, ho suunre dagɛ ma'an Yenɛ nɛŋa. 22Bala, bahɛ be'em sebo n boe ho zen'an wa ge la ho belom to Daana la te a di suguru bo ho la ho tɛn'ɛn seko te ho tɛn'ɛha wa. 23Te tomam mi' te ho nini tɛnte la to lɔgɔrɔ la ge te yelebe'ero me bobe ho wo ho boe la pakadeen la. 24Te Simon yele Peter la Yon yeti, Belom ya to Daana Na'ayenɛ la bo ɔ te sɛla woo te ya yele wa da wa'an n zen'en na. 25Peter la Yon nya tɔgɛ Yesu yɛla bo sɛba n sakɛ bo Yesu la ge pa'alɛ ba Yesu yetɔgom te ba lebe kule Yerusalem. Ge ban boe sore zuo kena la, ba tɔgɛ Yesu Yelesoma la bo tenhen zo'e zo'e n boe Samaria poan la. 26Ge Na'ayenɛ soŋora nya tɔgɛ bo Filip wa yele en yeti, Maahom ho mea la ho doohe gɔbega nu'o sore se'ere n ze'ele Yerusalem ye'a Gaza teŋa poan la. Ba ka le dɔla sodena wa yɛ'ɛha. 27Te Filip maahom a mea keŋɛ. Te Etiopia teŋa boraa me boe sore zuo ye'a kula. Etiopia boraa wa dela zuodaana sɔna ba pɔgɔnaba lɔgɔrɔ behera Etiopia teŋa poan ge te a daa keŋɛ la Yerusalem ta sohɛ Yenɛ 28ge nya zin'an yiri toroko zuo te nɛra tara ko te ba kula. En boe sore zuo ye'a kula la, a kaanlɛ la Yenɛ nɔtɔgɔha Isaiah gɔŋɔ la poan. 29Te Sea la yele Filip yeti, Keŋɛ paɛ toroko la te boraa la yaga bini la. 30Te Filip zɔ' paɛ bini ge wom te boraa la kan'anlɛ la Yenɛ nɔtɔgɔha Isaiah gɔŋɔ la poan. Te a soke en yeti, Ho bɔkɛ sɛla te ho kaanla wa? 31Te boraa la lebehe en yeti, Se'em han ka pa'alɛ mam de vɔnrɛ, mam mea wan eŋɛ la wane ta'an bɔkɛ dɛ? Ge nya daa yele Filip te a zona zin'ire la n toroko la poan. 32Zen'sɛka poan te a kaanla Isaiah gɔŋɔ la poan la n wana: A sinɛ mɛ digi digi wo pebila te ba tara yɛ'a kɔrɔgerɛ la, ana wo pehego te ba kɛɛra ko kɔnberɔ te ko sina se'em la, bala mea te a ana, ka lakera a nɔɔrɛ. 33Ba daa pɔ'ɛ n ge daa ka gankɛ en soŋa soŋa. Ane n wan tan'an tɔgɛ a buuri yele? Se'ere n sɔe la, ba daa ko' en. 34Te Etiopia boraa la nya soke Filip yeti, Ton yele mam, ane te Yenɛ nɔtɔgɔha wa tɔgɔra bala? A tɔgɔre la a mea bii se'em me ha? 35Te Filip lebehe yele en te zen'sɛka te a kaanla la dela boraa yu'urɛ n de Yesu yɛla ge nya tɔgɛ Yesu Yelesoma bo Etiopia boraa la. 36Ban daa bo sore zuo ye'a la, ba wa paɛ la bɔka poan. Te Etiopia boraa la yele Filip yeti, Ko'om n wana bɔna bɔka poan wa. Sore boe bo mam te n to'e ko'om soa? 37Te Filip lebehe en yeti, Ho ta'an to'e ko'om soa ho han sakɛ bo Yesu la ho suunre zan'an. Te boraa la yeti, Mam sakɛ la n suunre poan te Yesu Krista dela Yenɛ Dayɔa. 38Te Etiopia boraa la yele se'em n tare yiri la te se kena la te a ze'ele te a ze'ele. Te enŋa la Filip sige keŋɛ bɔka la poan te Filip nya bo en ko'om soa la. 39Filip n ta muhe en bo en ko'om soa la ba'ahɛ la, ba nya yehe la ko'om la poan na ge te Yenɛ Sea la tare Filip keŋɛ. Te Etiopia boraa la ka le nyɛ' Filip yɛ'ɛha ge a le bɔna a sore zuo kena la popeelom. 40Ge Filip wa yete a behɛ te a boe la Azotas teŋa poan. Bilam te a daa doohe teŋhe la n boe bini mɔɔla Yesu Yelesoma la bɔ'ɔra nɛreba ge nya paɛ Kaesarea teŋa poan.

will be added

X\