Tõoma 6

1Dabeha n daa eŋɛ fiin la, Yesu dɔlɔba la me zo'ore mɛ ge te nɔkpe'ene wa wa'an ba teŋasoka na. Basɛba n de Yudoma ge tɔgɔra la Greek yetɔgom la daa yeti te basɛba n de Yudoma ge tɔgɔra Hebru la ba teŋa yetɔgom ma'an ka le bɔ'ɔra Greek pɔkɔnpa dia ligiri la te ba ne bɔ'ɔra ba daarɛ woo la. 2Bilam poan te Yesu tontoneba pia la bayi' la yi' lagaŋɔ la zan'an lagahɛ yele ba yeti, La dagɛ ma'an te to bahɛ te ton wan eŋɛ se'em behera te pɔkɔnpa daarɛ woo bahɛ tɔ te to tamɛ kan tɔgɛ Yenɛ yele bo nɛreba. 3Dene poan n sɔɔnrɔ loe ya boraahe seyopɔe ya poan, sɛba te ya mina te ba tare yamsomɔ ge te Yenɛ Sea la me bɔna la ba. Ya han loe ba bahɛ te wan dekɛ ba te bama sɔna pɔkɔnpa behera. 4Tomam mea me tooma wan de'a la to sohɛ ge pa'ala nɛreba Yenɛ Yelesoma la. 5Bilam te lagaŋɔ la daa tara sunpeelom la Yenɛ tontoneba la n tɔgɛ se'em la ge nya loe nɛreba bayopɔe. Sɛba te ba loe la dela Stepen se'em n daa ka de'ene la Yenɛ sohoga ge te Yenɛ Sea la me daa bɔna la en. Ba me loe Filip la Prokorus la Nikanor la Timon la Parmenas la Nikolaus se'em n dagɛ Yuda buuri nɛra ge ze'ele Antiok teŋa poan na la. A me tee a mea eta wo Yudoma n ete se'em la. 6Ban daa loe nɛreba la, ba tare ba paɛ la Yesu tontoneba la zen'en te ba sohɛ bo ba ge dekɛ ba nu'uhen pagalɛ ba zuto. 7Bilam poan te Yenɛ yɛla sina ge kɔ'ɔn yeregera bɔbɔre woo. Te Yesu dɔlɔba la n boe Yerusalem teŋa poan la me zo'ore kekeko, kekeko ge malema keendoma kekeko me sakɛ bo Yesu. 8Yenɛ daa loe Stepen ge eta som bɔ'ɔra en ge bɔ'ɔra en paŋa te a eta yelekerehe zo'e zo'e bɔ'ɔra nɛreba la. 9Ge nɛreba basɛba ka sakɛ bo Stepen etegɔ la. Ba lagom de'a la Zamehegɔ yire se'ere te ba yi'ire Fai tɛn'ɛhegɔ doma. Basɛba ze'ele la Kirene la Alekzandria na. Ge te basɛba me ze'ele Silisia la Asia. Daarɛ deyema te nɛrebana wa ŋmɛ'ɛra nɔkpe'ene la Stepen. 10Ge Yenɛ Sea la bo Stepen yamsomɔ te a tɔgɛ te nɛreba la ka le ta'an ŋmɛ' nɔkpe'ene la en. 11Bilam poan te ba yɔ' boraa se'ehe te ba parom yeti, Tomam wom en te a tɔgɔra sɛla n ka ane soŋa bɔ'ɔra Moses la Yenɛ. 12Ban ta yele wana wa la, la daam nɛreba la zuodoma la sɛba n pa'alɛ Pa'alegɔ la. Te ba ihege keŋɛ Stepen zen'en ta nyɔkɛ en tare en keŋɛ Yetɔgom Tɔgɔrɔba la nɛŋan. 13Bilam te ba nya tare boraa se'ehe kɛn' na te ba parom bo Stepen. Ban kɛn' na la, ba yeti, Daarɛ woo boraa kana wa tɔgɔre la sɛla ka an soŋa bɔ'ɔra toolom zen'an la pa'alegɔ la. 14Tomam wom en te a yɛta te Nazaret boraa la Yesu la yeti a gbi' la Yenɛ Yire la bahɛ ge me yete a tee Moses malema la. 15Yetɔgom Tɔgɔrɔba woo n zin' bini la kɔ'ɔn beha Stepen zen'en te a nɛŋa kɔ'ɔn nɛɛ wo Yenɛ soŋoreba nɛŋa la.

will be added

X\