Tõoma 4

1Peter la Yon daa na bo bini tɔgɔra mɛ ge te malema keendaana la guruba la Yenɛ Yire la zuodaana la Saduseedoma la keŋɛ ba zen'en. 2Ban daa paɛ ba zen'an la, ba sunsunya nyii mɛ. Se'ere n sɔe la, Yesu tontoneba la tɔgɔre ge pa'ala nɛreba la te nɛreba wan ihege ba kum poan wo Yesu n daa ihege a kum poan se'em la. 3Te ba daa nyɔkɛ Peter la Yon mɛ pagɛ ge gura la beere te ba wan gankɛ ba. Se'ere n sɔe la, la diŋɛ de'a la zanɔɔrɛ. 4Ge bala mea zan'an nɛreba kekeko nɛrekooŋɔ la poan n wom Peter la Yon yetɔgom la, ba sakɛ ba potɛn'ɛrɛ poan bo Yesu mɛ. Sɛba woo n sakɛ bo Yesu la daa dela wo boraahe tuha anuu. 5Yiimbeere la ba nya tare la ba yetɔgom Yerusalem teŋa poan. Yudoma kpɛ'ɛndoma la zuodoma la pa'alegɔ pa'aleba la me lagom bɔna bini mɛ. 6Annas, se'em n de malema nɛŋadaana la Kaiapas la Yon la Alekzander la nɛresɛba n ze'ele ba buuri poan la lagom bɔna bini mɛ. 7Bilam te ba bahɛ te ba tare Peter la Yon wa'an ba zen'en na te ba nya soke ba yeti, Bene paŋa poan bii ana yu'urɛ poan te ya eta wana wa? 8Bilam te Yenɛ Sea soŋɛ Peter te a lebehe yele ba yeti, Kpɛ'ɛndoma la zuodoma wa, 9ya kɔ'ɔn mɔ'ɛn nini sɔkera tɔ zina wa yɛhera la la eŋɛ se'em te kɔɔrɔŋɔ wa ban'an bahɛ wa. 10Bala, yamam la Israel teŋa nɛreba zan'an, baŋɛ ya te la dela Nazaret boraa la Yesu Krista paŋa poan n bahɛ te kɔɔrɔŋɔ wa ban'an wa bahɛ ge te a ta'an kena wa. Yesu mea n bala te ya daa bahɛ te ba nyɔkɛ en kpa' punpuuredɔɔ zuo, ge te Yenɛ daa bahɛ en te a ihege a kum poan. 11La daa dela Yesu te Yenɛ gɔŋɔ la daa yɛta yeti, Kuguse'ere te mɛteba zagahɛ la, denɛ en ta dɛna ɛnberɛ kugure. 12Yesu ma'an n wan ta'an fan' ya bahɛ ge Yenɛ daa ka bahɛ te nɛra ayema bɔna teŋa wa zuo te nɛra wan yi' a yu'urɛ te a fan' en bahɛ. 13Te ban nyɛ te Peter la Yon ka tare dabeem ba yetɔgom la poan te baŋɛ te be dela yiremɔhe ge lagom dela Yesu dɔlɔba, la de'a la pakerɛ bo Yetɔgom Tɔgɔrɔba nɛreba, ban yele se'em la. 14Ge bala mea zan'an ba ka ta'an yelese'ere, ban nyɛ' te boraa sɛka ban'an n bahɛ la ze'a la Peter la Yon la zuo. 15Bilam poan te ba yele Peter la Yon la boraa la te ba yehe Yetɔgom Tɔgɔrɔba deo la poan ge nya pin'ilom gan'angera la taaba ba wan eŋɛ se'em. 16Te ba yɛta taaba te, To wan eŋɛ Peter la Yon la boraahe wa la wane? Nɛresɛba woo n boe Yerusalem teŋa poan mi' te bama n ete yelekerega kana wa. To me kan ta'an parom yete dagɛ bama n ete la. 17Dene zuo, bahɛ ya te to ka'an Peter la Yon wa te ba da le yɛ'ɛha dekɛ Yesu yu'urɛ tɔgɛ bo nɛra se'em. To han yele bala, nɛreba kekeko ka le ta'an wom dɛ. 18Bilam poan te ba le yi' ba kɛn' ba sɔnhega deo la poan ta yele ba te sorɔseko ka le bɔna te ba wan dekɛ Yesu yu'urɛ tɔgɛ bii pa'alɛ. 19Ge Peter la Yon lebehe ba yeti, Gankɛ ya ya mɛhe sɛla n de ma'an Yenɛ nɛŋa. Te sakɛ bo yamam nɔɔrɛ la bii te sakɛ bo Yenɛ nɔɔrɛ? 20Tomam kan ta'an kan tɔgɔra sɛla te to nyɛ' ge wom. 21Te Yetɔgom Tɔgɔrɔba nɛreba le kan'an ba la ninmɔ'ɔrɛ ge dekɛ ba bahɛ te ba keŋɛ. Se'ere n sɔe te ba ka ta'an namehe ba la dela nɛra woo pɛngɛ Yenɛ yɛhera la Peter la Yon n eŋɛ se'em la. 22Boraa sɛka te yelekerehe tooma bahɛ te a ban'an la bahɛ la gane yuun pihinaahe mɛ. 23Ban ta bahɛ te Peter la Yon kula, ba lebe la bama la sɛba n po'ohe la zen'en ta yele ba malema keendoma la la zuodoma la n yele se'em la. 24Peter la Yon n ta yele ba bahɛ la, ba zan'an lagahɛ mɛ sohɛ bo Na'ayenɛ. Ba yele en yeti, To Daana Na'ayenɛ, hon de se'em n maalɛ saazuo la teŋa la mɔga la kolaahe la sɛla woo n de bonvɔa. 25Hon daa bahɛ te to sɔyaaba David tɔgɛ dena wa. A daa dela hon yameŋa ge te ho Sea la daa soŋɛ en la yetɔgom te a daa yeti, Bene n sɔe te teŋhe pan'ahɛ ba mɛhe, te nɛreba wa gaara yo wa? 26Teŋa wa na dama zan'an ihege ze'ele mɛ, te nɛŋadoma woo lagehɛ taaba te ba zabɛ la Na'ayenɛ, ge zabɛ la Se'em Te A Loe La. 27Sera sera Pontius Pilate la Naba Herod daa lagom la Israeldoma la buuri basɛba teŋa wa poan te ba ko' Yesu se'em n de ho fa'a bia te ho loe te a fan' nɛreba bahɛ la. 28Ba daa lagom taaba te ba eŋɛ sɛla n pon yete la eŋɛ la. Se'ere n sɔe te ho daa pon tɛn'ɛhɛ bala la daa dela ho paŋa zuo ge me daa bɔta dɛ te de eŋɛ bala. 29Ge nananawa to Daana, kelehe ban yele to se'em. Bo' tomam sɛba n ton bɔ'ɔra ho la paŋa. 30Tɛɛn ho nu'o ge tebɛ ban'ahedoma. Bahɛ te to tom yelekerehe tooma zo'e zo'e Yesu yu'urɛ poan, se'em n de ho fa'a bia la. 31Ban daa ta ba'ahɛ sohoga zen'sɛka te ba daa ze'a la daa miim mɛ. Bilam, te Yenɛ Sea la daa bo ba paŋa te ba daa pin'ilom tɔgɔra Yenɛ yetɔgom ge ka tara dabeem. 32Sɛba woo n sakɛ bo Yesu la tare la potɛn'yemɔ la suunre deyena. Se'em ka tɛn'ɛhere te sɛla te enŋa tara la kɔ'ɔn de'a la a mea denɛ. Ba lagom tɔnta sɛla woo mɛ. 33Yesu tontoneba la tɔgɛ Yenɛ yɛla la paŋa yɛta nɛreba te to Na'ayenɛ Yesu ihege a kum la poan. Bilam te Yenɛ bo ba kan'somɔ. 34Nɔŋɔ ka tare ba se'em. Se'ere n sɔe la se'em woo n tare peelom bii yiya, a ne koohe dɛ mɛ 35tare ligiri la na bo Yenɛ tontoneba la te ba dekɛ soŋɛ sɛba n bote soŋorɛ. 36Te la eŋɛ bala te boraa kayema bɔna te a yu'urɛ dɛna Yosef. A dela Levidoma nɛra ge te ba dɔgɛ en Kiprus teŋa poan. Yesu tontoneba la daa yi'ira en la Barnabas. La vɔnrɛ dela se'em n soŋore nɛreba. 37Boraa wa koohe la a peelom te a tare ligiri la na bo Yesu tontoneba la.

will be added

X\