Tõoma 28

1To zan'an n daa paɛ doone soŋa soŋa la, teŋa la nɛreba yele tomam te bama yi'ire ba teŋa wa la Malta. 2Malta nɛreba wa la to'e tomam soŋa soŋa ge ete sɛla woo n an soŋa bɔ'ɔra tɔ. Ba tuure bugum bo to, saa n niire te ɔɔrɔ bɔna la zuo. 3Paul n yuhɛ la dibehe te a maala bugum la, te waahɔ yehe dibehe la poan na wɔlɔgɔ la zuo la done la Paul nu'o ge kɔ'ɔn vele dɛ kaŋkaŋɛ. 4Malta nɛreba la n daa nyɛ' te bonsɛla la daa vele a nu'o bala la ba yele bo taaba yeti, Boraa wa daa ko' la nɛra. Bala n sɔe te bagase'a ka sakɛ te a vɔna bii la n pon nyaŋɛ doe done ko'om la poan na ge ka ki' wa, baga la wan sina ge ko' en. 5Ge Paul mɛhɛgɛ a nu'o ge te waahɔ la lu' bugum la poan ge pon ka daan Paul nu'o. 6Malta nɛreba la gure beha te Paul ta fohom bii a nɛŋa wan lobege te a lu' teŋa ki'. Te ban gure yue wana wa la ge ka nyɛ' sɛsɛla wa, ba nya tee ba potɛn'ya mɛ ge yeti, Boraa wa dela bagarɛ. 7Te Malta naba Publius daa bɔna ge tara a va'am te ko lɛm to zen'an la. A to'e to soŋa soŋa ge te to daa bɔna a yiren dabeha atan'. 8Publius sɔ nyɛ'ɛra mɛ ge gan'an te ɔɔrɔ tara en. Paul n kɛn' te a behɛ Publius sɔ la, te a po'ohɛ Yenɛ bo en ge dekɛ a nu'uhen pagalɛ Publius sɔ la zuo te a ban'an la ba'ahɛ. 9Paul n daa eŋɛ lana wa la, teŋa la nɛreba la tare ba ban'ahedoma na te ban'ahe la ba'ahɛ. 10Ba me bo to bo'olom kekeko. Ge ton zom ɔɔnrɔŋɔ kantɛ la, ba dekɛ sɛla te to nara te to tara eŋɛ ɔɔnrɔŋɔ kantɛ la poan bo to. 11Ge te ŋmarehe setan' n daa tole ge te to nya nyɛ' Alekzandria teŋa ɔɔnrɔŋɔ kantɛ te ba yi'ira dɛ Leeba Baga. Ge te ɔɔnrɔŋɔ wa bo teŋa wa poan la ɔɔrɔyenɛ la ha. 12Ton zom ɔɔnrɔŋɔ wa la, to wa paɛ la Sirakuse teŋa poan. Te dabeha atan' te to yee bɔna teŋa la poan. 13Ton daa bahɛ Sirakuse teŋa la, to le zom la to ɔɔnrɔŋɔ mea le ta paɛ Aregium teŋa poan. Te yiimbeere la te sabeeo ze'ele gɔbega nu'o bɔba na wa lɔbera ge te dabeha ayi' poan la te to nya paɛ Puteoli teŋa poan. 14Ton sige ɔɔnrɔŋɔ kantɛ Puteoli teŋa wa la, to nyɛ' Yesu dɔlɔba te ba yele to te to wa'an na bɔna la ba dabeha ayopɔe. Bilam te to nya doohe keŋɛ Arom teŋa poan. 15Te ton daa ye' Arom teŋa poan la, Yesu dɔlɔba la basɛba me boe Arom teŋa wa poan mɛ. Te ban wom te tomam ye' na la, basɛba yehe mɛ ge to'ohɛ tɔ Appius teŋa da'a na ge te basɛba me yehe to'ohɛ tɔ Daam Yiya Atan' zen'an na. Te Paul n nyɛ' wana wa la, a po'ohɛ Yenɛ ge maan nyɛ' paŋa Yesu sore dɔlɔga poan. 16Te ton daa paɛ Arom teŋa poan la, Arom teŋa zuodoma la bo Paul sore te a bɔna n bote se'em. Ge pɛɛntɛɛnreba la ayema gura en te daanse'ere a ye wan ta zɔ'. 17Te dabeha atan' poan la, Paul daa yi' lagahɛ Yudoma kpɛ'ɛndoma la n bo Arom teŋa poan la na. Te ban lagahɛ na la, a yele ba yeti, N sɔɔnrɔ, mam daa ka ton toonse'ere n de be'em bo to mɛŋa nɛreba wa bii n zagahɛ mɛ te n kan dɔla tɔ teŋa la etegɔ te to sɔyaabdoma eŋɛ bo to wa. Ge bala mea zan'an, ba daa dekɛ mam mɛ bo Aromdoma te ba dekɛ mam eŋɛ pakadeen Yerusalem teŋa poan. 18Te Aromdoma n daa soke ma sɔgɔha ge daa bɔta te ba bahɛ ma, ban daa ka nyɛ' ma te n ton toonse'ere n de be'em te la nara la ba ko' ma la zuo 19Yudoma n daa zagahɛ ya te ba da bahɛ ma. Bala te mam me daa ye yete ba ye tare ma keŋɛ te Kaesar la gankɛ ma. La mam pon ka tare yelese'ere te n wa yete n mɛŋa nɛreba eŋɛ ma wa. 20Bala zuo n sɔe te mam bɔta te n nyɛ' ya ge tɔgɛ la ya. Ge te ba ba' ma banhe wa la se'emdaana te Israeldoma eŋɛ ba potɛn'ɛrɛ gura wa zuo. 21Te Yudoma kpɛ'ɛndoma daa yele en yeti, Tomam pon ka to'e gɔŋseko Yudea teŋa poan yɛhera ho yele. To sɔɔnrɔ wa ayema me ka ze'ele bilam bɔna na wa yele to yɛla bii yelese'a n de be'em te ba yete hon eŋɛ ya. 22Ge to wan bɔta te to me wom ho n tare se'ere ho potɛn'ɛrɛ poan. Se'ere n sɔe la, to mi' te zen'an woo nɛreba tɔgɔre tɔgɔsebo n ka an soŋa bɔ'ɔra lagaŋseko te ho lagom de'a ayema wa. 23Ba nya daa bo la dabahese'ere daarɛ te ba wan wa'an Paul zen'an na. Ba zo'e zo'e yehe de daarɛ keŋɛ Paul n bo zen'sɛka la. Paul tɔgɛ bo ba Yenɛ Sɔ'ɔlom n ane se'em bolika tara tara la yu'uŋɔ. A zegera tɔgɛ bɔkɛ bo ba Yesu yɛla la vɔnrɛ n de se'em Moses Pa'alegɔ la Nɔtɔgɔheba gɔŋɔ la poan. 24En daa eŋɛ lana wa la, basɛba ba poan tee ba potɛn'ya sakɛ te yelese'a te a tɔgɛ la dela yelemɛŋɛrɛ. Ge basɛba me ka sakɛ. 25Bilam te ba bahɛ Paul zen'an la ge gan'angera la taaba la Paul n yele dena wa ma'an zuo. A yeti, Yenɛ Sea la daa tare yelemɛŋɛrɛ la n bahɛ te Yenɛ nɔtɔgɔha Isaiah yuun yele ye sɔdoma se'em la, 26yele yeti, Keŋɛ ta yele nɛrebana wa yeti, Kelehe ya malom kelehe, ge ya kan malom bɔkɛ. Behɛ ya malom behɛ, ge ya kan malom nyɛ. 27Bahɛ te nɛrebana wa potɛn'ɛra da tana tɛn'ɛha, bahɛ te ba toba da wuna, te ba nini da nyɛta. Han dagana bala, ba nini wan nyɛta, te ba toba wona, te potɛn'ɛra bɔkera, te ba ŋmɛregɛ lebena nyɛ ba tebegɔ. 28Te Paul le yeti, Bahɛ ya te n yele ya dena wa te ya mina te Yenɛ daa bahɛ te nɛreba mɔɔlɛ Yesu Yelesoma yɛhera la a faanrɛ la poan bo sɛba n dagɛ Yudoma la me ge te ba me wan nam dɛ. 29Paul n daa yele Yudoma wana wa ba'ahɛ la, ba nya daa bahɛ a zen'an la mɛ ge nya kɔ'ɔn ŋmɛ'ɛra nɔkpe'ene zo'e zo'e la taaba. 30Ge yuuma ayi' te Paul mea daa yɔɔra ligiri bɔ'ɔra zensɛka te a kɛn'ɛra la to'ohe sɛba woo n kena a zen'en la. 31A mɔɔla Yenɛ Sɔ'ɔlom la n ane se'em, ge pa'ala to Daana Yesu Krista yɛla te dabeem ka tare en bii a go'e te enŋa kan mɔɔlɛ.

will be added

X\