Tõoma 27

1Te ban daa ta tɛn'ɛhɛ dɛ ba'ahɛ te la de'a la to keŋɛ Itali teŋa poan la, Festus daa nya dekɛ Paul la sɛba n lagom bɔna pakadeen la dekɛ eŋɛ pɛɛntɛɛnreba kpɛ'ɛma nu'uhen te a tare ba keŋɛ. Kpɛ'ɛma la daa lagom de'a la pɛɛntɛɛnreba zabera bɔ'ɔra nakantɛ ayema te a yu'urɛ dela la Yulius. 2Bala te to keŋɛ ta zom Adramitium teŋa ɔɔnrɔŋɔ kantɛ n daa wa'an na. Ɔɔnrɔŋɔ kantɛ la me maahom ne mɛ te ko lebe la kon ze'ele zen'an na la. Ge ko me wan zɛ'ɛta zen'se'ehe n bo teŋse'ehe n bo Asia teŋa poan la. Ge Aristarkus se'em n de Makedonia teŋa boraa ge ze'ele Tesalonika teŋa na la lagom dɔla tɔ mɛ. 3Ton daa zom to ɔɔnrɔŋɔ kantɛ la, yiimbeere te to paɛ Sidon teŋa poan te kpɛ'ɛma Yulius eŋɛ Paul soŋa ge bo en sore te a daa doohe po'ohɛ a zɔdoma ge to'ohe sɛla te a bɔta ba zen'enhen. 4Ton daa le ze'ele Sidon teŋa poan la, to le bɔna la ɔɔnrɔŋɔ kantɛ mea poan ye'a ge sabebego n bo lɔbera tu'uha tɔ zo'e zo'e te to yare ŋmɛregɛ doohe la Kiprus teŋa bɔba. Bilam bɔba te sabebego la ka ba' lɔbera. 5Te to keŋɛ ko'om la poan doohe tole Silisia la Pampilia tenhen la paɛ Mira teŋa la n bo Likia teŋa poan la te 6kpɛ'ɛma la nyɛ' Alekzandria teŋa ɔɔnrɔŋɔ kantɛ n bote a keŋɛ Itali teŋa poan. Bilam te a tare tɔ ta kɛn'ɛhɛ bini 7ge te dabeha kekeko te to kelom bɔna ɔɔnrɔŋɔ kantɛ la poan ge me ka keni zɔ'ɔra. Se'ere n sɔe la, sabebego n ba' lɔbera tu'uha ɔɔnrɔŋɔ zo'e zo'e ge nya yiinzuo walena la bala ta paɛ Knidus teŋa poan. Sabebego la kelom lɔbera mɛ te to ka nyaŋɛ doohe bɔba denɛ keŋɛ yɛ'ɛha ge te ton nya doohe la Salmone teŋa n bo Krete teŋa bɔba keŋɛ doohe tole. 8To kɔ'ɔn dɔla la mɔgɔrɛ la nɔgbenɛ nyɛ' namehegɔ zo'e zo'e to keni mea poan ge nya paɛ zen'an kayema te ba yi'ira Ze'elesoŋa Zen'an la n lɛm Lasea teŋa poan. 9La nya kpe'emɛ zo'e zo'e te to bɔna ɔɔnrɔŋɔ kantɛ poan yɛ'ɛha mɛ, te ton daa kena dabeha kekeko te Be'em Duuhego Daarɛ tole mɛ ge ton le ka zagahɛ to mɛhe. Bala te Paul nya daa kan'an ba la ninmɔ'ɔrɛ yeti, 10Boraahe wa, to han yete to le ze'ele kalam wa zom ɔɔnrɔŋɔ kantɛ la le keŋɛ yɛ'ɛha, mam mi' te la wan kpe'em zo'e zo'e bo to. Ge te ɔɔnrɔŋɔ kantɛ mɛŋa la la lɔgɔseto woo n bo bini la wa sagom zo'e zo'e. Nɛreba me wa ki' bini. 11Ge kpɛ'ɛma la doohe la ɔɔnrɔŋɔ kantɛ zuodaana la la ɔɔnrɔŋdaana la nɔɔrɛ, ge ton zagahɛ Paul n yele se'em la. 12Zen'sɛka mea te to ɔɔnrɔŋɔ kantɛ la ze'a la me ka ane soŋa te nɛra wan gan'an bini ɔɔrɔyenɛ wa. Bala te basɛba zo'e zo'e bɔta te to le zom ɔɔnrɔŋɔ kantɛ la to kɔ'ɔn ŋmibe paɛ Poeniks teŋa poan bɔna wo to han wan nyaŋɛ. Se'ere n sɔe la Poeniks teŋa dela zensɛka n boe Krete teŋa bɔna zuɔ la gɔbega nu'uhe bɔba te ɔɔnrɔŋɔ kantɛ kena zɛ'ɛta ɔɔrɔyenɛ wa. 13Te ton daa ye' la, sabebego ze'ele te gɔbega nu'o bɔba la na lɔbera fole fole, te ba la tɛn'ɛhe te ba wan sina ge ta'an tom ban bote se'em la. Bala, te ba nya kɔ'ɔn dɔla mɔgɔrɛ la n bo Krete teŋa nɔgbenɛ bɔba la ma'an kena. 14Ge la ka ba yue ge te sabebego ze'ele dapɔya bɔba wana lɔbera teŋa la poan na. 15Sabebego la n kɔ'ɔn lobe mɛ to'ohɛ tɔ ɔɔnrɔŋɔ kantɛ la. Bilam te to behɛ te la wan kpe'em bo to te to kena tu'uha sabebego la. Bala te to nya ka le yete to zegɛ behɛ ge yiinzuo bahɛ te sabebego la kɔ'ɔn lɔbera tɔ dɛɛra ye'a ton pa' zen'an. 16Ton pa' zen'an dene kena la, te to kɔ'ɔn doohe to gɔbega nu'o bɔba wa paɛ tole la zen'an kayema te ba yi'ira Kauda teŋa poan te sabebego la ka lɔbera tu'uha. Bilam te to nyɛ' daaŋɔ wana fiin wa ge me walom nyaŋɛ te ɔɔnrɔŋpeka la n toŋe ɔɔnrɔŋkantɛ la pore la ka sagom. 17Te ba nya ɔnbegɛ ɔɔnrɔŋpeka la mɛ eŋɛ ɔɔnrɔŋɔ kantɛ la poan ge dekɛ mi'inhe lo' ɔɔnrɔŋkantɛ la kaŋkaŋɛ te ko tara paŋa. Ba tare la dabeem la ba yaɛ wan ta lu' tentɔnbin'ihegɔ ko'om la poan Sirtis teŋa poan la. Bilam te ba ka le keŋɛ kekeko ge nya bahɛ te sabebego la lɔbera pɛ'ɛra ba kena. 18Sabebekantɛ n wa lɔbera zo'e zo'e la zuo, te yiimbeere la ba kɔ'ɔn degeha lɔgɔrɔ la n boe ɔɔnrɔŋɔ kantɛ la poan la me le bahɛ ko'om poan. 19Te yiimbeere deyema la yɛ'ɛha te ba dekɛ ba mɛhe nu'uhe gbɛ' lɔgɔseto te ba tare tona ɔɔnrɔŋɔ kantɛ la poan la mɛ bahɛ ko'om poan. 20Dabeha zo'e zo'e n tole te to mina mina ka nyɛ' yentule bii ŋmarebila la a niho. Te sabebego la me sina ge kelom lɔbera zo'e zo'e. Bilam poan te to zan'an ka le tare potɛn'ɛrɛ te to wan le vɔna yɛ'ɛha. 21Te la paɛ dabeha te boraahe la ka dekɛ dia eŋɛ ba nɔɔrɛn. Bilam te Paul yele ba yeti, Boraahe wa, ya han sakɛ ne mam yele ne se'em la ge ka bahɛ ne te to ze'ele Krete teŋa la wa'an na, wana ma'an to ka nyɛ' ne namehegɔ wa'ana wa zo'e zo'e. 22Ge nananawa n bene ya mɛ, din'inhe ya suunre. Te dagɛ la ya ayema ya poan n wan ki'. Han dagana la ɔɔnrɔŋɔ kantɛ la ma'an n wan sagom. 23Zam la yu'uŋɔ Yenɛ se'em te mam dɔla ge na'aha wa soŋora ayema wa'an mam zen'an mɛ na 24yeti, Paul, da bahɛ te dabeem tare hɔ. Te hon wan ze'ele Kaesar la nɛŋa. Se'ere n sɔe la Yenɛ zo'ohogɔ zuo te a wan bahɛ te nɛresɛba woo n lagom bɔna la hɔ ɔɔnrɔŋɔ kantɛ la poan ayema me kan ki'. 25Bala, boraahe wa, din'inhe ya suunre. Te mam mi' te Yenɛ wan seren eŋɛ sɛla te n wom wa. 26Ge yia, sabebego la wan ba'ahɛ lobe pe'e to ta bahɛ teŋa kayema ha. 27Te la de'a la dabeha pia la anaahe daarɛ yu'uŋɔ te sabebekantɛ lobe pe'e to Adriatik Mɔgɔrɛ. Ge lan ta de'a wo yu'uŋsunsua bɔba la, sɛba n tare ɔɔnrɔŋɔ kantɛ la te ko kena la tɛn'ɛhe te to nya pɔnre la done. 28Bilam te ba dekɛ mi'an bɔ sɛla n de bontebegegɔ lu' ta' la mi'an la nya bahɛ ko'om la poan. Ba eŋɛ bala la te ba behɛ la lan zaen se'em. Te ban daa eŋɛ bala dekɛ bahɛ ko'om la poan la, ba behɛ te la kelom kɔ' mɛ zo'e zo'e ka yona la done. Te ɔɔnrɔŋɔ kantɛ la le keŋɛ fiin wa ge te ba le dekɛ mi'an la le bahɛ ko'om la poan te la ka le ba' kɔ' yɛ'ɛha. 29Dabeem n me tare ba la daanse'ere sabebego la yaɛ wan lobe pe'e te ɔɔnrɔŋɔ kantɛ la keŋɛ ta ŋmɛ' la tanhen. Bala te ba tole ɔɔnrɔŋɔ kantɛ la pooren ta lorege kuto tonaahe, sɛba n suunre te ɔɔnrɔŋɔ kantɛ la zɛ'ɛta la ferɛ tentɔnbin'ihegɔ poan. Ge ba nya kɔ'ɔn bɔta te beere yelegɛ ba kalam. 30Sɛba n tare ɔɔnrɔŋɔ kantɛ la te ko kena la nya zegere te ba le'ehɛ yehe ɔɔnrɔŋɔ kantɛ la poan mɛ. Bala te ba parom eta wo bama bote te ba dekɛ kuto la bahɛ te to ferɛ nya mina ge lorege ɔɔnrɔŋpeka la bahɛ ko'om poan. 31Paul n nyɛ' bala la, a yele kpɛ'ɛma la a pɛɛntɛɛnreba la yeti, Sɛba n tare ɔɔnrɔŋɔ kantɛ wa te ko kena wa han le'ehɛ zɔ' ge bahɛ ɔɔnrɔŋɔ kantɛ la, yamam me kan vɔna. 32Te pɛɛntɛɛnreba la ŋma' ɔɔnrɔŋpeka la mi'inhe la n lo' lamenɛ ɔɔnrɔŋkantɛ la bahɛ te a dɛɛra ye'a. 33Te beere n ta pɔnra yelegerɛ la, Paul belom nɛreba la te ba di' dia ge yele ba yeti, Dabeha pia la anaahe n wane te ya bɔna ɔɔnrɔŋɔ kantɛ wa poan ge ka di' sɛsɛla. 34Bala n bene ya mɛ te ya di' dia fiin wa te bala n wan bahɛ te ya nyɛ' paŋa. Ge da fabele ya te se'em zonto pon kan bɔregɛ. 35En ta yele ba wana ba'ahɛ la, a dekɛ la boroboro po'ohɛ bo Yenɛ ba zan'an nɛŋa ge nya gɛn'ɛn dɛ obe. 36Bilam te ba zan'an din'inhe suunre ge te nɛra woo n bo bini la lagom di' dia. 37Te to sɛba woo n bo ɔɔnrɔŋɔ kantɛ la poan la daa dela nɛra kɔbehe seyi' la nɛra pihiyopɔe la bayoobe. 38Ban ta di' tegɛ la, ba nya ɔnbɛ la bon la yema n ane wo moe la ɔɔnrɔŋɔ kantɛ la poan bahɛ ko'om la poan. Ban eŋɛ bala la, ɔɔnrɔŋɔ kantɛ la ka le ba' tebegɛ yɛ'ɛha wo kon daa tebegɛ se'em la. 39Ge te beere n yelegɛ la, sɛba n tare ɔɔnrɔŋɔ kantɛ la te ko kena la ka baŋɛ teŋsɛka te ba pɔnra la ge ba nyɛ' la tentɔnbin'ihegɔ zen'an la. Bilam te ba eŋɛ ba potɛn'ɛrɛ te la han wan nyaŋɛ ne, ba wan bahɛ ne te ɔɔnrɔŋɔ kantɛ la keŋɛ ta sin'inle bini. 40Bala te ba nya ŋma' mi'inhe la n lo' kuto la n soŋore te ɔɔnrɔŋɔ kantɛ la zɛ'ɛta la bahɛ te ba sin'inle tentɔnbin'ihegɔ ko'om la poan ge me le lorehe mi'inhe la n lo' zen'an te ba gota eta te ɔɔnrɔŋɔ kantɛ la kena la bahɛ, ge dekɛ fukantɛ n kpe'em lo' ɔɔnrɔŋɔ kantɛ la te sabego lɔbera zan'anra dɛ kena ye'a doone. 41Bilam te ɔɔnrɔŋɔ kantɛ la ferɛ bɛngɛrɔ la poan te nɛŋa daa ferɛ ge ka le kena, ge te ko'mi'inhe la ŋmɛ'ɛra ɔɔnrɔŋɔ kantɛ la pooren la paŋa aanhom yema yema. 42Pɛɛntɛɛnreba la tɛn'ɛha ba potɛn'ya poan te ba wan ko' sɛba woo te ba daa tare ba pakadeen na la. Se'ere n sɔe la ba daa tɛn'ɛhe te nɛreba la han sige ko'om la poan bum paɛ doone, ba wan zɔ'. 43Ge pɛɛntɛɛnreba kpɛ'ɛma bote te a fan' Paul bahɛ mɛ te a ka sakɛ bahɛ pɛɛntɛɛnreba la te ba ko' nɛreba la. Kpɛ'ɛma me bo nɔɔrɛ te ba zan'an sɛba n mi' ko'om buŋa la, ɛnkɛ lu' ko'om la poan la ba bum paɛ doone. 44Ge basɛba me n ka mi' buŋa la, dekɛ dɔɔrɔ pɔ'ɔba bii dɔɔseto n de ɔɔnrɔŋɔ kantɛ dɔɔrɔ la ge sagom bahɛ te dɔɔrɔ la tare ba paɛ doone. Ba zan'an eŋɛ wana wa la, te ba zan'an paɛ doone soŋa soŋa.

will be added

X\