Tõoma 26

1Te Naba Agripa nya bo Paul sore mɛ te a tɔgɛ a denɛ. Te Paul ihege po' nu'po'ɔ ge nya tɔgɛ te a soŋɛ a mea yeti, 2Naba Agripa, n zuo an soŋa la mam bo ho nɛŋa zina wa. Te n tɔgɛ te ho baŋɛ te Yudoma la n yete n eŋɛ sɛla la sɛla la la dagɛ yelemɛŋɛrɛ. 3Se'ere n sɔe la, ho mea pon mina soŋa soŋa Yudoma teŋa yɛla etegɔ la n bo yema yema se'em. Bala n bene ho mɛ te ho ma'ɛn ho mea kelehe ma soŋa soŋa. 4Yudoma zan'an mi' n bɔŋa n daa ane se'em mam n daa nan dagɛ bonkotɛ la. Ge la mam me n daa pɔhɛ n bɔŋa woo se'em mam n daa bo n mɛŋa teŋa la Yerusalem teŋa poan la. 5Ba kɔ'ɔn mina zo'e zo'e wo ba han ka parona te mam daa lagom dɔla Pariseedoma yɛla la sɛba n daa kɔ'ɔn ka de'ena la ban po'ohe Yenɛ se'em la. 6Ge mam bala ze'a zina nananawa te ba gankɛ mam. Se'ere n sɔe la, mam gure ge nam Yenɛ n daa biŋe a nɔɔrɛ bo to sɔyaabdoma se'em la. 7Nɔbiŋdenɛ nɔɔ n bala te to yizuto pia la bayi' to teŋa wa eŋɛ ba potɛn'ɛrɛ gura la, wo ban po'ohe Yenɛ wontɛŋa la yu'uŋɔ zan'an la. Ge bala mea zan'an, Naba, la dela tɛn'dena wa la zuo te Yudoma la yeti te mam tom la be'em. 8Bene zuo nya sɔe te la kpe'em bo yamam Yudoma te ya sakɛ te Yenɛ wan bahɛ te sɛba n ki' la ihege ba kum poan? 9Ge te la de sera te mam mea daa zegɛre mam wan eŋɛ se'em woo ta'an sagom Nazaret teŋa boraa Yesu yu'urɛ. 10Dena mea te n daa eŋɛ Yerusalem teŋa poan la. N daa doohe malema keendoma la zen'enhen te ba bo ɔ sore te n doohe nyɔkɛ Yesu nɛreba la pagɛ ba. Ge te ban daa ne yete la nare ba ko' se'em, mam daa ne sakɛ te ba ko' en. 11Dabeha zo'e zo'e te n daa dɔla zamehegɔ yiya la poan namehera ba zo'e zo'e, ge zegera te ba dekɛ Yesu sore dɔlɔga bahɛ. Ge te n daa nyie n sunsunya zo'e zo'e keŋɛ tenhen sese'ehe poan la te n ta nyɔkɛ ba namehe ba. 12Te la daa de'a la toon ana mea zuo te n daa keŋɛ Yudoma malemadoma la zen'en la te ba daa golehɛ gɔnɔ bo ma sore te n keŋɛ Damaskus teŋa poan. 13N daa ta bɔna la sore zuo ye'a te wontɛŋa zuo teŋasoka ma'an la, Naba, te n daa nyɛ' te bugum ze'ele saŋgbanɛ zuo na. Lan daa ze'ele bala na la, bo daa kɔ'ɔn nɛɛ ma mɛ la nɛresɛba n daa dole mam la. 14Ton zan'an daa lu' la teŋa, te mam daa wom te konkore yɛta ma na la Aramaik yetɔgom poan te, Saul, Saul, bene te ho mɔ'ɛn nini tona ma bala? Ho namehere la ho mɛŋa. 15Te n daa soke yeti, Hon dela ane, n Daana? Te a lebehe yeti, La dela mam Yesu te ho mɔ'ɛn nini eta bala la. 16Ge ihege saazuo te n nɛɛ n mea ho zen'en wa te n loe ho mɛ te ho de'a n yameŋa yele nɛreba sɛla la sɛla te ho nyɛ' mam zen'en zina wa la yelese'a te n wan pa'ala hɔ pooren na. 17N wan fan' ho bahɛ ho mea nɛreba Yudoma la nu'uhen la sɛba n dagɛ Yudoma sɛba te n wan ton ho te ho mɔɔlɛ n yɛla bo ba nu'uhen. 18Hon wan yu'ɛ ba nini tara ba lika poan lebe bugum la poan ge yehe ba Dima nu'uhen lebe Yenɛ nu'uhen na. Bala poan te ba han nam mam, n wan bahɛ ba be'em bo ba ge te ba lagom sɛba n na'aha mam Yenɛ yete ba bɔna la. 19Dene poan la, Naba Agripa, mam kan ta'an zagahɛ te n kan nam se'em te n daa nyɛ' yenzuo ha la. 20Ge n daa mɔɔlɛ Yenɛ yɛla yia la Damaskus la Yerusalem tenhen poan a nya ta' Yudea tenhen la woo la sɛba n dagɛ Yudoma zen'enhen. N daa mɔɔlɛ yɛta ba te ba tee ba potɛn'ya ba be'em poan ge dekɛ ba mɛhe paɛ Yenɛ zen'en la ton toonse'a n wan pa'alɛ te ba seren tee ba potɛn'ya. 21Te la daa de'a la toon ana mea te n daa tona te Yudoma la daa kɔ'ɔn wa'ana nyɔkɛ mam Yenɛ Yire la poan, ge zegera te ba ko' ma mea. 22Yenɛ me ye soŋɛ mam zo'e zo'e te n kelom bɔna ge la zina wa ze'a kalam tɔgɔra yelemɛŋɛrɛ bɔ'ɔra nɛra woo bonkotɛ wo la bonbila wo wa. Ge te mam yete yelese'a eŋɛ wa me dela boyena la yelese'a te nɔtɔgɔheba la Moses yuun yete la wan eŋɛ la. 23Ba yuun yete nɛreba wan namehe Krista zo'e zo'e ta ki' ge de'a yiadaana ihege a kum poan. Bala te a wan nɛɛ te Yudoma la sɛba n dagɛ Yudoma la zan'an nini te ba nyɛ' faanrɛ ba yelebe'ero poan. 24Te Paul n ta tɔgɛ denɛ wana ba'ahɛ la, Festus nyabegɛ en yeti, Paul, ho nya zaale mɛ! Ho gɔŋɔ zamehegɔ la bahɛ te ho zaale mɛ! 25Ge Paul me lebehe yele en yeti, Zuodaana Festus, la dagɛ la ma zaale mɛ. La dela yetɔgom sebo te ma tɔgɛ wa kɔ'ɔn de'a la yelemɛŋɛrɛ la yam. 26Ge, han de'a Naba Agripa, a mi te mam ta'an tɔgɛ sɛla woo bo ho ge kan sogɛ yelese'ere. Mam me mi' soŋa soŋa te ho le nyɛta yele ana wa tooma n keŋɛ se'em. Bene zuo, yele ana wa n eŋɛ la ka lile mɛ. 27Ge, Naba Agripa, mam mi' te ho sakɛ te yelese'a te nɔtɔgɔheba la golehɛ la dela yelemɛŋɛrɛ. 28Agripa lebehe en yeti, Paul, ho tɛn'ɛhɛ te ho yetɔgom fiin la wana wa la wan ta'an bahɛ mam te n dɔla Yesu sore? 29Paul me daa lebehe en te, Ho sakɛ nananawa wo te ho wan dɔla Yesu sore, ho ka sakɛ wo, mam po'ohe Yenɛ bɔ'ɔra hon la sɛba woo n bo kalam kɛleha mam zina wa te Yenɛ wan bahɛ te ya zan'an tee ya potɛn'ya te ya dɔla Yesu sore wo mam n dole se'em wa, ge dagɛ ba me ba' ya la banhe. 30Te Paul n ta tɔgɛ dena wa ba'ahɛ la, naba la teŋbehera la Bernise la sɛba n lagom bɔna bini la vaɛ ihege mɛ saazuo. 31Ge te ban yehe deo la poan la, ba yele bo taaba te, Boraa wa ka ton la toonse'ere n de be'em te la nare te ba ko' en bii ba pagɛ en. 32Agripa nya yele Festus te, To ta'an bahɛ ne te boraa wa keŋɛ a han ka yele ne te a kɔ'ɔn bɔta la Kaesar la n tɔgɛ a yetɔgom wa.

will be added

X\