Tõoma 25

1Festus n paɛ Kaesarea teŋa la dabeha atan', te en tole ge te a keŋɛ la Yerusalem teŋa poan. 2Te malema keendoma la Yudoma kpɛ'ɛndoma la daa yele en te Paul wa dela ganlom ganlom nɛra 3ge belom Festus la te a pa' ba pore, la a bahɛ te Paul wa'an Yerusalem teŋa poan na. Se'ere n sɔe la, ba daa pon te'ele maahom te ba ko' en ge te a baŋɛ paɛ na. 4Festus lebehe yele ba yeti, Ba pagɛ Paul la Kaesarea teŋa pakadeen la poan. Ge mam mea wan lebe bini nananawa. 5Bahɛ ya te ya zuodoma la doohe mam te to keŋɛ Kaesarea teŋa poan te yelese'ere n han bɔna te boraa la tue, ya ta'an dekɛ yetɔgom la en. 6Festus n ta bɔna ba zen'en le pa'ahɛ wo dabeha anii bii dabeha pia la, te a nya lebe Kaesarea teŋa poan na. Te yiimbeere la, a keŋɛ zen'sɛka te ba dita yetɔgom la. En tole ta zin'ire la kugusɛka poan te ba zin'inra gankera nɛra la, ge nya tom yete ba tare Paul wa'an na. 7Paul n paɛ na la, Yudoma la n daa ze'ele Yerusalem teŋa poan na la pin'ilom mɛ lagom taaba kae en bahɛ yɛta te a ton la yelese'a n de be'em ge ba ka ta'an tɔgɛ sɛla pa'alɛ te bama n yelese'ere la dela sera. 8Ge te Paul ihege tɔgɛ te a pa'alɛ te a ka tare tuure yeti, Mam ka eŋɛ yelese'ere tue Yudoma pa'alegɔ la bii Yenɛ Yire yɛla la. N me ka le tue Kaesar la. 9Ge Festus daa bote Yudoma la nɔŋɛ en. Bala te a soke Paul yeti, Ho wan sakɛ te to tare ho keŋɛ Yerusalem teŋa poan, te n ta gankɛ ho behɛ nya ho tare tuure bii ho ka tare tuure? 10Paul lebehe en yeti, Aai, mam ka sakɛ. Mam kɔ'ɔn bɔta te Kaesar wa n gankɛ ma a zen'en wa. Ho mɛŋa pon mina soŋa soŋa te ma ka tare tuure la Yudoma wa yelese'ere poan. 11Ge mam han tom la yelese'a ha te la de'a la n nare te ba ko' mam, mam kan yeti te ba da ko' mam. Ge yelemɛŋɛrɛ han bɔna yelese'a te ba yeti n eŋɛ ya wa, nɛra yi ka boe wan dekɛ mam tehɛ ba. Bala, bahɛ te Kaesar la n gankɛ ma! 12Festus la a nɛreba la n nya ta nyɛ' taaba ba'ahɛ la, a lebehe yele Paul te, Ho yete ho bote Kaesar la n gankɛ hɔ. Bala ho wan keŋɛ la Kaesar la zen'en te a gankɛ hɔ. 13Ge te dabeha daa eŋɛ fiin wa, te Naba Agripa la a tanya Bernise daa keŋɛ Kaesarea teŋa poan te ba ta behɛ Festus ge bo en zaarɛ. 14Te ban daa ta bɔna bini te dabeha yuura la, Zuodaana Festus daa wa yele Naba Agripa la yelese'a te Paul eŋɛ, yeti, Boraa kayema n bo kalam te Feliks daa bahɛ te ba pagɛ en. 15Mam me n daa keŋɛ Yerusalem teŋa poan la, malema keendoma la zuodoma la daa yele ma yelese'a woo te a eŋɛ ba la bɔta te mam bo sore te ba ko' en. 16Mam lebehe yele ba te Aromdoma la ka maalom ba kɔ'ɔn bahɛ te ba ko' nɛrese'em te ba yete a tue la yele, han dagana la ba bahɛ mɛ te se'emdaana te ba yete a tue la yele la la nɛresɛba n nyɔkɛ en na la te ba tɔgɛ la taaba. 17Te ban daa wa'an n zen'en na la, n daa ka go'om ba, be yiimbeere la te n daa keŋɛ zensɛka te ba dita yetɔgom la. Te mam daa paɛ la, n daa bo nɔɔrɛ te ba tare boraa la kɛn' na. 18En daa kɛn' na la, nɛresɛba n daa nyɔkɛ en te a tue la yele la, daa ihege saazuo tɔgɛ. Ge ba yetɔgom la poan la, yelese'ere daa ka bo bini pa'alɛ te a ton la yelese'ere n de be'em te mam tɛn'ɛhe ne la. 19Yelese'ere ma'an te ba yete a tue ya wa daa yenzuo de'a la ba mɛhe sɔdoma kiha yɛla la boraa kayema n daa boe te a yu'urɛ dɛna Yesu ge ki', ge te Paul yete boraa wa vɔe mɛ. 20Te mam mea daa pon ka bɔkɛ mam wan eŋɛ yele dena wa se'em. Bala te mam daa soke boraa la nya a wan sakɛ keŋɛ Yerusalem teŋa poan te ba tɔgɛ a yetɔgom la. 21Ge te a daa zagahɛ mɛ ge lebehe yete enŋa kɔ'ɔn bɔta la Kaesar te a gankɛ a yetɔgom la. Dene poan te mam me daa bo nɔɔrɛ te ba tare en le ta pagɛ pakadeen la ge te n maahom dabaherɛ te a keŋɛ te Kaesar la ta gankɛ en. 22Agripa yele Festus yeti, Mam bote n nyɛ' boraa wa te a tɔgɛ te n wom la n mɛŋa toba. Festus lebehe en te, N ye wan bahɛ te a tɔgɛ te ho wom la ho mɛŋa toba beere. 23Te yiimbeere la, Agripa la Bernise la pɛɛntɛɛnreba zuodoma la teŋa la poan zuodoma la keŋɛ deo kantɛ la poan te nɛreba lagaha dita yetɔgom la. Ge te ban kɛn' deo la poan la, Festus bo nɔɔrɛ te ba tare Paul kɛn' na. 24Festus nya ihege yeti, Naba Agripa la nɛresɛba woo n bo kalam wa, boraa la n wana te Yudoma woo sɛba n bo kalam wa la sɛba n bo Yerusalem teŋa poan yete a tɔgɛ la yetɔgom sebo n de be'em la ge me daa le vɔla te ba ko' en ge a ka nare te a vɔna. 25Ge mam daa behɛ yetɔgom la zuo la, mam daa ka nyɛ' yelese'ere poan te a tue ya te la nara te ba ko' en. Ge a mea daa pon yete a kɔ'ɔn bɔta te Kaesar n tɔgɛ a yetɔgom la. Bala te mam me eŋɛ n potɛn'ɛrɛ te ba tare en keŋɛ. 26Ge mam ka bɔkɛ yetɔgom la zuo soŋa soŋa wa ta'an golehɛ a yele eŋɛ gɔŋɔ poan bo Kaesar. Bala poan, Naba Agripa, te mam bahɛ te ba tare en na yamam nɛŋa na te a tɔgɛ te ya wom te a han tɔgɛ la ya bala, n wan nyɛ' yele fiin wa golehɛ. 27Se'ere n sɔe la, la kan de'a ma'an bo mam te n tare se'em n bo pakadeen poan keŋɛ Kaesar zen'en ge ka ta'an pa'alɛ soŋa soŋa yelese'a te a eŋɛ la.

will be added

X\