Tõoma 24

1Dabeha anuu poan la te malema nɛŋadaana Ananias la zuodoma basɛba la Tertulus n de to'ohe yetɔgom tɔgɔhaba ayema daa keŋɛ Kaesarea teŋa poan. Ban paɛ la, ba yele teŋbehera yelese'a te ba yeti Paul eŋɛ la. 2Ge te Feliks yele Tertulus te a tole na tɔgɛ. Te a tole pin'ilom tɔgɔra Paul n eŋɛ sɛla te, Hon tare yam zo'e zo'e la zuo n sɔe te to nyɛ' popeelom te la yue wana wa. Ge te yelese'a n nare teere me tare som wa'an to teŋa wa na. 3Teŋbehera Feliks, to me po'ohɛ hɔ zo'e zo'e la yele ana wa. 4Ge n ka bote n go'om hɔ. Bala n bene ho mɛ te ho ma'ɛn ho mea kelehe to yelepeka wa soŋa soŋa bo to. 5To nyɛ' boraa wa ta a de'a la zabesagaha. A dole sagaha te Yudoma n gbirigera la teŋa wa zuo woo ge le de'a sɛba n dole Nazaret boraa la nɔɔrɛ la zuodaana. 6A me daa le keŋɛ la Yenɛ Yire la poan ta ba'ahɛ te zen'sɛka n ka tare dɛngerɔ Yenɛ nɛŋa la tara dɛngerɔ. Bala zuo te to daa nyɔkɛ en te to eŋɛ to potɛn'ɛrɛ te to dekɛ la pa'alegɔ la gankɛ en. 7Ge pɛɛntɛɛnreba kpɛ'ɛma Lisias daa wa'an na la paŋa tare en keŋɛ. 8Te a daa bo nɔɔrɛ te sɛba n tare yetɔgom la Paul la wa'an ho zen'en na. Ho han soke Paul wa sɔgɔha, ho mɛŋa wan nyɛ' yelese'a te to yete a eŋɛ ya wa. 9Tertulus n ta tɔgɛ wana wa ba'ahɛ la, Yudoma la woo naa la nɔɔrɛ yete yelese'a woo te a tɔgɛ wa dela sera. 10Teŋbehera la nya yele Paul te enŋɛ me tole na tɔgɛ. Te Paul tole na yeti, Mam mi' te ho sɔe teŋa wa behera te yuuma zo'e mɛ. Bala n tare popeelom te n tɔgɛ bo ho te ho baŋɛ te n ka tuure yelese'ere poan. 11Ho ta'an soke baŋɛ yelemɛŋɛrɛ ho mea. La ka gaŋɛ dabeha pia la ayi' n wana te mam daa keŋɛ Yenɛ Yire la n bo Yerusalem teŋa poan te n ta po'ohɛ. 12Te mam daa bo Yenɛ Yire la poan la, Yudoma la daa ka nyɛ' mam te n ŋmɛ'ɛre nɔkpe'ene la se'em bini. Ba daa ka le nyɛ' mam mɛ te n sagahe zamehegɔ yiya la poan bii teŋsɛka n bo bilam te ba gbirige, 13ge le bahɛ te ba le yele pa'alɛ ho yelese'a la yelese'a te ba yete n tue ya wa. 14Ge sɛla te mam sakɛ dela dena wa. Mam sakɛ te mam po'ohere la Yenɛ se'em te to sɔyaabdoma yuun po'oha la. Mam me dole Sore dɔlɔga poan te ba yete la dagɛ yelemɛŋɛrɛ dɔlɔga la. Ge mam me dɔla yelese'a woo n boe Pa'alegɔ la Nɔtɔgɔheba gɔŋse'a la. 15Ge n me le tara n potɛn'ɛrɛ poan wo bama me n tare de se'em la, te Yenɛ wan bahɛ te nɛra woo, sɛba n tone som la sɛba n tone be'em ihege ba kum poan. 16Bala, mam kpeŋere n mea ka tɛn'ɛha boyi' boyi' n suunre wa poan yɛhera la n bɔŋa n ane se'em Yenɛ nɛŋa la nɛreba zen'enhen. 17Mam daa ka bɔna Yerusalem teŋa poan te yuuma yue, te n nya daa lebe bini na te n dekɛ ligiri ta bo n nɛreba ge la n me ko' dunhe kaanbegɔ. 18Te la daa de'a la yele ana wa te n daa bɔna Yenɛ Yire la poan. Bala ma'an la ha la te mam pon tom malema toonɛ la ba'ahɛ mɛ, la n ta'an kɛn' Yenɛ Yire la poan ba'ahɛ mɛ. Lana wa woo etegɔ poan la, nɛrekooŋɔ ka lagom bɔna la ma bii gbirigere bɔna bini. 19Ge la dela Yudoma basɛba n ze'ele teŋse'ehe n bo Asia teŋa poan la n daa bo bini. Ge la sontii bama mea wa'an ne ho nɛŋa na yele yelese'ere te n tara la ba la, te yelese'ere n han bɔna te n tue ba, ba wan yele ho. 20Bii ho bahɛ te boraa se'ehe n ze' kalam wa yele ho yelese'ere poan te ba daa nyɛ' mam te n tue ya te sɛba n dite yetɔgom la n daa gankɛ ma la. 21Han dagana la yele yenɛ ma'an te mam daa ze'ele ba zen'en yele ba. N daa yele ba te, Ya gankere ma zina wa la mam sakɛ te sɛba n ki' la wan ihege ba kum poan la zuo. 22Paul n ta tɔgɛ ba'ahɛ la, Feliks se'em n daa pon mina Sore dɔlɔga fiin wa daa go'ɛ yetɔgom la ge yele ba yeti, N wan leen tɛn'ɛhɛ ya yetɔgom wa Lisias se'em n de pɛɛntɛɛnreba kpɛ'ɛma la han wa'an na. 23En yele wana wa ba'ahɛ la, a nya yele la pɛɛntɛɛnreba la zuodaana ayema se'em n daa gure de daarɛ la, te a tare Paul keŋɛ la a ta gura en, ge te a bahɛ te a taaba bɔ'ɔra en n bote sɛla. 24Dabeha fiin wa n tole ge te Feliks daa wa'an la a pɔga Drusila. Pɔka la me daa dela Yudoma teŋa pɔka. Ba tom te ba tare Paul na te Paul n daa paɛ na la, ba kelehe en ta a tɔgɛ bo ba nam Yesu Krista vɔnrɛ n de se'em. 25Paul n kelom tɔgɔra ba yɛhera la tontɔɔtooma la ba wan tare ba mɛhe se'em la daarɛ te Yesu wan gankɛ nɛra woo la, dabeem kɛn' Feliks mɛ. Bilam te a yele Paul yeti, Nananawa, ho ta'an keŋɛ. N wan ta nyɛ' nɛŋa se'em ma'an n wan yi' ho. 26Feliks yele Paul wana wa la ge me daa tɛn'ɛha te Paul wan bo en ligiri. Bala n sɔe te a daa kɔ'ɔn tona te ba yi'ira en te ba tɔgɔra la taaba la. 27Yuuma ayi' n tole la, Porsius Festus n sɔe Feliks tee de'a teŋbehera. Ge Feliks sine ge kelom bahɛ te Paul bɔna pakadeen mɛ. Se'ere n sɔe la, a bote Yudoma la n nɔŋɛ en.

will be added

X\