Tõoma 23

1Paul tole ba nɛŋan kɔ'ɔn kpa' beha Yetɔgom Tɔgɔrɔba nɛhe ziin ge yeti, N sɔɔnrɔ, mam ka tɛn'ɛhɛ boyi' boyi' n suunre wa poan yɛhera la n bɔŋa n an se'em Yenɛ nɛŋa tara tara la zina wa. 2En daa yele wana wa la, malema nɛŋadaana Ananias daa yele nɛresɛba n daa ze' du' Paul la te ba ŋmɛ' a nɔɔrɛ. 3Paul nya yele en yeti, Yenɛ wan ŋmɛ' la ho mea! Hon ane bala wo dangoone kɛka te ba takɛ dɛ te de lebege pelega la! Ho ton zin'an bilam ha tara pa'alegɔ la gankera mam ge ka dɔla a ho mea la hon yete ba ŋmɛ' mam la. 4Te boraa se'ehe n daa kɔ'ɔn ze'a du' Paul la daa yele en yeti, Ho ka mi' te ho toore la malema nɛŋadaana la? 5Te Paul lebehe yele ba yeti, N sɔɔnrɔ, mam ka mi' te enŋa n de malema nɛŋadaana la ge la golehɛ te, Da pɔ' nɔɔrɛ bahɛ nɛŋadaana se'em n behere ya nɛreba zuo. 6Paul n ta baŋɛ te bama basɛba n de Saduseedoma te basɛba la me n de Pariseedoma, a tɔgɛ la Yetɔgom Tɔgɔrɔba kpe'eŋkpe'eŋo te, N sɔɔnrɔ wa, mam wa dela Parisee ge le de'a Parisee boraa dayɔa. Se'ere zuo n sɔe te ya tara yetɔgom la ma kalam wa dela mam tare n potɛn'ɛrɛ poan te Yenɛ wan bahɛ te sɛba n ki' la le vɔna yɛ'ɛha. 7En ta yele wana wa ba'ahɛ la, Pariseedoma la la Saduseedoma pin'ilom mɛ ŋmɛ' nɔkpe'ene la taaba yelehe yema yema. 8Se'ere n sɔe la Saduseedoma la daa ka sakɛ te nɛra wan ki' ge ta'an ihege a kum poan. Ba me da ka le sakɛ te Yenɛ soŋoreba la se'ehe boe. Ge Pariseedoma la me daa sakɛ te lana wa woo boe mɛ. 9Ba nyabega la gana bala te pa'alegɔ pa'aleba la ge de'a Pariseedoma basɛba ihege saazuo ka sakɛ ge tɔgɛ kpe'eŋkpe'eŋo te, To ka nyɛ' tuure boraa wa zen'en. Bala la, daanse'ere la dela Yenɛ soŋora bii sea n tɔgɛ bo en. 10Ge te ba nɔkpe'ene la nya kɔ'ɔn mɔ'ɛn la nini. Bilam te pɛɛntɛɛnreba la kpɛ'ɛma la tara dabeem la daanse'ere ba ya wan ta ko' Paul. Bala te a yele a boraahe la te ba keŋɛ nɛrekooŋɔ la poan la ba ta tare Paul yehe keŋɛ deo seko te ba kan paɛ en la poan. 11Te yiimbeere yu'uŋɔ la, te to Daana wa'an Paul zen'en yele en yeti, Kaanbɛ suunre! Wo ho yele nɛreba mam yele Yerusalem teŋa poan wa, nananawa la sontii ho keŋɛ ta yele bala mea nɔɔ bo Arom teŋa nɛreba me. 12Yiimbeere bolika la, Yudoma basɛba lagahɛ nyɛ' taaba la ban wan eŋɛ se'em ta'an ko' Paul. Bilam te ban nya pɔ' pɔtɛ te ba mina mina da di' dia bii nyu' sɛsɛla, han dagana ba nyaŋɛ ko' la Paul. 13Ba gaŋe ba nɛreba pihinaahe la n daa zin'ire nyɛ' taaba yele wana wa la. 14Te ban nyɛ' taaba wana wa ba'ahɛ la, ba nya keŋɛ ta yele malema keendoma la zuodoma la yeti, To nyɛ' la taaba pɔ' pɔtɛ n de ninmɔ'ɔrɛ te to kan di' dia dia, han dagana la to nyaŋɛ ko' la Paul wa. 15Bala la, yamam la Yetɔgom Tɔgɔrɔba la tom se'em te a keŋɛ Aromdoma pɛɛntɛɛnreba kpɛ'ɛma la zen'en. A han paɛ bini ya parom yele en te yamam yete a bahɛ te Paul la wa'an ya zen'en na te ya maan tɔgɛ nyɛ' yetɔgom la zuo zen'en. Ge tomam pon maahom te to ko' en ge te a baŋɛ paɛ na. 16Ge Paul tanya bia wom Yudoma la n yete ba eŋɛ Paul se'em la. Bilam te a keŋɛ kɛn' Paul n bo deo seko poan la ta yele en sɛla woo te Yudoma la tɛn'ɛhɛ te ba eŋɛ en la. 17Paul n daa wom wana wa la, a yi' pɛɛntɛɛnreba la zuodoma la ayema na yele en yeti, Tare bodibila wa keŋɛ kpɛ'ɛma la zen'en te a tare la se'ere te a yele en. 18Te zuodaana la tare en keŋɛ kpɛ'ɛma la zen'en ta yele en yeti, Paul se'em n boe pakadeen la n yi' mam na yele mam te n tare bodibila wa wa'an ho zen'en na. Se'ere n sɔe la, bodibila la tare la se'ere te a yele ho. 19Te kpɛ'ɛma la tare bodibila la ta ba lilom fiin ha ge te a yele en yeti, Ho tare la dene te ho yele mam? 20Bodibila la yele en yeti, Yudoma zuodoma la lagahɛ nyɛ' taaba te la de'a la ba parom yele ho te ho bahɛ te Paul wa'an Yetɔgom Tɔgɔrɔba zen'en na beere te bama maan tɔgɛ la en nyɛ' yetɔgom la zuo zen'an. 21Ge ba han yele wana, da kelehe ba. Se'ere n sɔe la, ba gaŋɛ ba nɛreba pihinaahe n wa sogɛ sɔrɔɔ n ha ge gura en. Se'ere n sɔe la ba pɔ' la pɔtɛ te ba kan di' dia dia bii nyu' sɛsɛla, han dagana ba nyaŋɛ ko' en mɛ. Ge ba me maahom te ba eŋɛ lana wa mɛ, ge ba nan gure la hon wan yele se'em. 22Kpɛ'ɛma la nya yele bodibila la yeti, Da yele nɛnɛra te hon dekɛ dena wa ko'ohe bo mam. Ge te a daa bahɛ en te a keŋɛ. 23Te a nya yi' a zuodoma la bayi' na yele ba yeti, Loe ya pɛɛntɛɛnreba kɔbehe seyi' la ya sɛba n mi' yiriban'an pihiyopɔe, ya sɛba n sabete la kana kɔbehe seyi'. Ya han loe ba wana ba'ahɛ, ya tare la ba te ya keŋɛ Kaesarea teŋa poan zina yu'uŋɔ wa. 24Ge me bɔ' yiri bo Paul la ya tara en soŋa soŋa paɛ bo Feliks se'em n de zuodaana la. 25Ge te kpɛ'ɛma la nya golehɛ gɔŋɔ yeti, 26Mam Klaudius Lisias n golehɛ hon Teŋbehera Feliks se'em n gane zan'an la na. Taarɛ. 27Yudoma n daa nyɔkɛ boraa wa sigera te ba ko' en. Mam n daa wom te a dela Arom teŋa boraa, te mam la n nɛresɛba n de pɛɛntɛɛnreba la daa keŋɛ bini te to to'e en bahɛ. 28Mam n daa bote n baŋɛ la se'ere zuo n sɔe te ba mɔ'ɛn nini te ba ko' en la, te n tare en keŋɛ ba Yetɔgom Tɔgɔrɔba zen'an la. 29Mam daa nyɛ' te a ka tue se'ere n nare ba ko' en bii ba pagɛ en. Yelese'ere te ba tara dɔla en daa yenzuo de'a la ba mea teŋa pa'alegɔ yɛla. 30Mam me daa wom ya te Yudoma la basɛba zin'ire enŋɛ la nɔɔrɛ te ba ko' en. Bala te n eŋɛ n potɛn'ɛrɛ te ba tare en na bo ho. Ge n me yele nɛresɛba n tare yetɔgom la en la, te ba wa'an hon zen'en na la ba yele ho sɛla te ba tara la en. 31En daa golehɛ wana wa bo ba ba'ahɛ la, a pɛɛntɛɛnreba la doohe en yele se'em la. Ge ba tare Paul te ba bahɛ yu'uŋkoŋɔ mea nɔɔ keŋɛ ta paɛ Antipatris teŋa poan. 32Te yiimbeere la, te ba basɛba n keŋɛ na'ma la daa ŋmɛregɛ lebe ba zen'an la poan te sɛba n ban' yire la tare Paul keŋɛ. 33Yiriban'andoma n tare en paɛ Kaesarea teŋa poan la, ba dekɛ gɔŋɔ la bo teŋbehera la, ge nya dekɛ Paul eŋɛ a nu'uhen. 34Teŋbehera la n daa kan'anlɛ gɔŋɔ la, a soke Paul te teŋkana te a yehe na. En ta baŋɛ te a dela Silisia teŋa boraa la, 35a yele yeti, Nɛresɛba n tare yetɔgom la ho la han wa'an na, n wan ma'ɛn n mea behɛ ho yetɔgom la zuo soŋa soŋa. A nya bahɛ mɛ te pɛɛntɛɛnreba la tare Paul keŋɛ la yire se'ere te Naba Herod yuun daa mɛ' la poan ta gure en.

will be added

X\