Tõoma 21

1Te tomam me le keehe nɛreba la n bele tomam la Paul ta bahɛ la ge zom to ɔɔnrɔŋɔ kantɛ keŋɛ. To wa keŋɛ yakɛ paɛ la Kos teŋa poan te yiimbeere la te to paɛ Arodes teŋa poan. Te ton ze'ele bilam la, to keŋɛ la Patara teŋa poan. 2Te Patara teŋa wa poan te to le zom ɔɔnrɔŋɔ kantɛ te to keŋɛ Poenisia tenhen la n bo Siria teŋa poan. 3Ge te ton kene la, to wa doohe la to gɔbega nu'o bɔba doohe tole Kiprus teŋa poan keŋɛ Siria teŋa poan. Te ton paɛ teŋa wa poan la, to daa doohe la Tire teŋa poan. Bilam te ɔɔnrɔŋɔ kantɛ la daa ze'ele ge te ba yehe lɔgɔrɔ la n bo a poan la. 4Ge ton paɛ Tire teŋa poan la, to nyɛ' Yesu dɔlɔba la basɛba bene ge daa bɔna la ba dabeha ayopɔe. Ge te Yenɛ Sea la tɔgɛ la Yesu dɔlɔba la te ba yele Paul te a da le keŋɛ Yerusalem teŋa la yɛ'ɛha. 5Ge to dabaherɛ la n ta paɛ te to bahɛ ba zen'en la, to yete to keŋɛ la ton ye' zen'an la. Te ton ye' la, ba zan'an la ba pɔgɔba la ba kɔma bele to mɛ yehe teŋa la poan. Bilam te to zan'an paɛ mɔgɔrɛ nɔgbenɛ dɔnbelɛ teŋa po'ohɛ. 6Te ton ta po'ohɛ ba'ahɛ la, to keehe taaba mɛ ge te tomam zom to ɔɔnrɔŋɔ kantɛ ye'a ge te bama me ŋmɛregɛ kula. 7Te to le bɔna to ɔɔnrɔŋɔ kantɛ mea poan ze'ele Tire teŋa la poan keŋɛ Ptolemais teŋa poan. Bilam te to paɛ po'ohɛ Yesu dɔlɔba la ge daa yee ba zen'en dayenɛ la. 8Te yiimbeere la to bahɛ Yesu dɔlɔba la zen'en mɛ ge keŋɛ Kaesarea teŋa poan. Bilam to kɛn'ɛra Filip yire, se'em n mɔɔlɛ Yesu Yelesoma la, ta bɔna la en. Ge Filip wa daa lagom bɔna nɛreba bayopɔe la te ba daa loe Yerusalem teŋa poan te ba behera pɔkɔnpa la mɛ. 9Ge te a me daa tara pɔyɔɔhe senaahe n nana ka ele te ba me sɔlena Yenɛ yɛla bɔ'ɔra nɛreba. 10Te to daa bɔna a zen'en la dabeha kekeko ge te nɔtɔgɔheba la ayema te ba yi'ira en Agabus daa ze'ele Yudea teŋa wa'an na. 11Te n daa paɛ na la, a wa'an la to zen'en na to'e Paul sɛganɛ, dekɛ dɛ mɛ lo' a mea na'ma la a nu'uhen ge yeti, Yenɛ Sea la n yele se'em n wana. A yele te Yudoma la n bo Yerusalem teŋa poan la wan lo' se'emdaana n sɔe sɛganɛ la la wana mea nɔɔ. Ba han eŋɛ bala, ba yete ba nya dekɛ en bo la sɛba n dagɛ Yudoma. 12Te ton wom wana wa la, tomam la sɛba n bo bilam la belom Paul te a da keŋɛ Yerusalem teŋa poan. 13Ge a lebehe yeti, Bene te ya kɛla wana te ya sagom n suunre? Mam pon ka mahona me ma'an te ba lo' ma Yerusalem teŋa poan, ge n ki' bini to Daana Yesu enŋa zuo. 14Paul n lebehe wana wa la, to daa ka ta'an nyaŋɛ tee a potɛn'ɛrɛ. Bala te to yenzuo bahɛ en ge yeti, Sɛla woo wa wa'an ma'an na wo to Daana Yesu n bote de se'em la. 15Te to daa yee bini la dabeha fiin wa ge daa maahom to lɔgɔrɔ keŋɛ Yerusalem teŋa poan. 16Ge te Yesu dɔlɔba la basɛba la n bo Kaesarea teŋa poan la lagom doohe to mɛ keŋɛ. Ton paɛ la, Yesu dɔlɔba la basɛba la n doohe to la, n tare to keŋɛ boraa kayema yire te a yu'urɛ de'a Mnason te to daa bɔna bini. A dela Kiprus teŋa boraa ge me pon de'a la se'em n dole Yesu sore wonseren wonseren ha. 17Te ton daa paɛ Yerusalem teŋa poan la, Yesu dɔlɔba la daa to'e to soŋa soŋa. 18Te yiimbeere la, Paul lagom doohe to keŋɛ mɛ te to ta po'ohɛ Yames. Te ton paɛ la, Yesu po'oheba sɛba n de zuodoma la zan'an bo bini mɛ. 19Paul n daa po'ohɛ ba ge yele ba a ton la poan te Yenɛ daa eŋɛ sɛla la sɛla bo sɛba n dagɛ Yudoma la. 20Ban wom wana wa la, ba zan'an pɛngɛ Yenɛ mɛ, ge yele Paul yeti, To sɔɔn, ho mɛŋa nyɛ' la an se'em. Yudoma tuha tuha n dole Yesu sore ge me ba zan'an nana la pa'alegɔ la. 21Ge ba wom ho yele te ho pa'alɛ Yudoma la waabe n bo sɛba n dagɛ Yudoma la tenhen poan la te ba da dɔla Moses yɛla la ba me da ŋma' kɔma yɔya bii dɔla Yudoma malema la. 22Ge ba me wan ba'ahɛ mina te ho wa'an na. Dene poan bene n wan eŋɛ? 23Bahɛ te to yele ho ton tɛn'ɛhe te ho eŋɛ se'em. To boraahe senaahe n bo kalam ge pɔ' pɔtɛ bo Yenɛ wo lan de to teŋa yɛla la. 24Bala doohe ba la ho lagom la ba pee ho mɛŋa la ba ge yɔ' sɛla woo te ba wan da' ton toonɛ wa bo boraahe senaahe la te ba nya ta'an keŋɛ te kɛ' ba zuto. Te ho han eŋɛ wana wa, bala te nɛra woo wan baŋɛ te nɛreba n yele te ho yele se'em la dela ponpɔrɔŋɔ, ge ho me dɔla pa'alegɔ la n yete to eta se'em la. 25Ge han de'a la sɛba n dagɛ Yudoma la sɛba n nam Yesu la yele la, to daa golehɛ gɔŋɔ ton nɛreba te ba tare ta bo ba. Gɔŋɔ la poan te daa yele ba yeti to zin'ire tɛn'ɛhɛ te la de'a la ba da di' disɛka n kaanbɛ. Se'ere n sɔe la nɛreba la kaanbɛ bo la baga. Ba daa tona yalomtooma ge la ba me da di' ziim bii ba obe duŋsɛka te ba gɛngɛ te ka ki' ge te ziim yee a poan. 26Te bala te yiimbeere te Paul daa tare boraa senaahe la keŋɛ ge ta kɛn' ton kihatooma la la a ta'an kɛn' Yenɛ Yire la poan. Te n daa eŋɛ lana wa ba'ahɛ la, enŋa la boraahe senaahe la daa lagom keŋɛ kɛn' Yenɛ Yire la poan mɛ. Ge te Paul daa yele nɛreba la dabeha se'em te ba wan dekɛ ba'ahɛ boraahe senaahe kihatooma la. Ge la ban wan koora dunhe bɔ'ɔra Yenɛ yema yema se'em bɔ'ɔra boraahe senaahe la. 27Ge dabeha ayopɔe n daa pɔnren ba'ahegɔ la, Yudoma basɛba n ze'ele teŋse'ehe n bo Asia teŋa poan wa'an na nyɛ' Paul Yenɛ Yire la poan. Ban daa nyɛ' en bini la, ba nyaŋɛ tɔgɛ gbirige nɛrekooŋɔ la te ba nyɔkɛ Paul. 28Ba vole mɛ yɛta te, Israeldoma wa, soŋɛ ya soŋɛ ya! Te boraa la n wana n dole tenhen zan'an pa'ala nɛra woo toora tomam Israel teŋa nɛreba la to pa'alegɔ la to toolom zen'an wa. Ge te nananawa, a zɔn'ɔn tare la Greekdoma la wa'an Yenɛ Yire la poan. Te a bahɛ te toolom zen'an tare dɛngerɔ Yenɛ nɛŋa. 29Se'ere n sɔe te ba daa yele bala la daa dela ba daa kɔ'ɔn nyɛ' la Tropimus se'em n de Epesus teŋa boraa la la Paul te ba bɔna teŋa la poan. Te ban daa nyɛ' bala la, ba daa kɔ'ɔn tɛn'ɛhɛ mɛ te Paul tare en kɛn' Yenɛ Yire la poan mɛ. 30Te teŋa la woo poan daa gbirige. Te lan daa gbirige bala la, nɛra woo zɔ' mɛ na lagahɛ nyɔkɛ Paul daaregɛ en yehe Yenɛ Yire la poan na. Ge te bilam bilam te ba yu' Yenɛ Yire la kolehe. 31Ge te nɛrekooŋɔ la n ta zegera te ba ko' Paul la, nɛreba keŋɛ ta yele Aromdoma sɛba n de pɛɛntɛɛnreba la zuodaana se'em n gane ba zan'an la te Yerusalem teŋa gbirige mɛ. 32Te n ta wom wana wa la, bilam bilam te a loe a zuodoma la basɛba woo n de pɛɛntɛɛnreba te ba gbelom keŋɛ nɛrekooŋɔ la poan. Te nɛrekooŋɔ la n ta nyɛ' te kpɛ'ɛma la pɛɛntɛɛnreba la, ba go'e mɛ ge ka le ŋmɛ'ɛra Paul yɛ'ɛha. 33Te kpɛ'ɛma la paɛ Paul zen'en nyɔkɛ en ge bahɛ te ba dekɛ banhe seyi' ba' en. Ban daa eŋɛ bala la, kpɛ'ɛma la nya soke mɛ yeti, Ane n de boraa kana wa, bene te a eŋɛ? 34Te sɛba nɛrekooŋɔ la poan vɔɔla te dena ge te basɛba me me vɔɔla te lana ha. Te lana wa ka tare bɔkerɛ te kpɛ'ɛma la wan ta'an baŋɛ sɛla la sɛla n ete la vɔnrɛ. Bala te kpɛ'ɛma la yele a nɛreba la te ba tare Paul keŋɛ deseko poan te nɛrekooŋɔ la kan paɛ en la. 35Ge te ban daa paɛ deo kura la poan la, pɛɛntɛɛnreba la ɔnbegɛ en mɛ. Se'ere n sɔe la nɛrekooŋɔ la kɔ'ɔn mɔ'ɛ la nini la en. 36Ba zan'an kɔ'ɔn zɔta dɔla en mɛ ge nyabera te, Ko' en! 37Te ban ta pɔnra te ba tare Paul kɛn' deo la poan la, a yele kpɛ'ɛma la la Greek teŋa yetɔgom poan te, Ho han sakɛ ne n bote ne te n tɔgɛ la se'ere bo ho. Te kpɛ'ɛma la yele en yeti, Ho tan' tɔgɔra Greek teŋa yetɔgom mɛ? 38Bala mam tɛn'ɛhɛ ne te ho dela Egipt teŋa boraa sɛka n daa wa'an yuuma n tole ha na la. N daa wa'an na la, a daa gbirige teŋa wa mɛ te nɛreba la zabera la ba zuodoma. Te n daa eŋɛ lana wa la, a daa nya nyaŋɛ yele nɛrekooreba la n daa gbirige teŋa la tuha anaahe tare ba keŋɛ mɔɔ ha. 39Paul lebehe en mɛ te, Mam mɛŋa buuri dela Yudoma ge mam teŋa dela Tarsus teŋa la n bo Silisia teŋa poan. Te teŋa woo nɛreba mina dela. Ge n bene ho mɛ, bo mam sore te n tɔgɛ bo nɛreba wa. 40Te kpɛ'ɛma la bo Paul sore te a tɔgɛ bo nɛreba la. Bala te Paul nya ze'a kura la zuo ge yebehɛ a nu'o pa'ala te nɛreba la go'e vole. Te nɛreba la go'e vole ge ta a nya tɔgɛ bo ba la Yudoma yetɔgom poan.

will be added

X\