Tõoma 2

1Dapihinuu Daarɛ la n daa paɛ la, sɛba n nam Yesu la lagahɛ la zen'an kayema. 2Bilam bilam te nɛreba la wom to voole vɔɔla wo sabebekantɛ n lobere se'em la. Nɛresɛba woo n zin' yire la poan la, wom voole la mɛ. 3Bilam te ba nyɛ' te sɛla ana wo bugum peelom peka la. Wana wa yeregɛ mɛ sigera na paara nɛra woo. 4Bilam te ba nya to'e Yenɛ Sea la, ge te ba zan'an daa pin'ilom tɔgɔra yetɔgom buuri buuri. Yenɛ Sea la n soŋɛ ba te ba tɔgɔra yetɔgom la bala. 5Yudoma sɛba n daa boe Yerusalem teŋa poan la ze'ele la bɔbɔre woo na. Ba dela sɛba n po'ohere Yenɛ. 6Ban ta wom te sɛba n sakɛ bo Yesu la tɔgɔre yetɔgom buuri buuri la, ba iinhe kete mɛ te ba daa lagahɛ bini. Se'ere n sɔe la nɛra woo wom te ba tɔgɔra la a teŋa yetɔgom, a teŋa yetɔgom. 7Ban wom dena wa la, la eŋɛ ba pakerɛ te ba yɛta te, Aba! Sɛba n tɔgɔre wana wa dagɛ la Galilee nɛreba? 8Ge te la eŋɛ la wane te to zan'an wona te ba tɔgɔra te teŋhe yetɔgom? 9To teŋhe dela Partia la Media la Elam la Mesopotamia la Yudea la Kapadosia la Pontus la Asia la 10Prigia la Pampilia la Egipt, la teŋse'ehe n bo Libya lɛm Kirene la. Tosɛba me ze'ele la Arom teŋa na 11Bana wa basɛba seren dela Yudoma ge te basɛba te ba lebege la ba mɛhe dɛna Yudoma. Tosɛba me ze'ele la Krete la Arabia teŋhe na. Ge bala mea zan'an, te zan'an wom te ba tɔgɔra yelenyalema se'a te Yenɛ daa eŋɛ la, te teŋhe yetɔgom poan. 12La eŋɛ ba pakerɛ te ba sokera taaba te, Wana wa vɔnrɛ dela bem? 13Sɛba toore ba mɛ ge yeti, Ba nyu' la daam buge. 14Te Peter daa ihege saazuo tontoneba pia la ayema la poan yele nɛrekooŋɔ la n lagahɛ na la kpe'eŋkpe'eŋo te, N Yudoma taaba wa la sɛba woo n boe Yerusalem teŋa poan wa, kelehe ha mam soŋa soŋa te n tɔgɛ te ya bɔkɛ dena wa. 15Ya tɛn'ɛhɛ te boraa sena wa nyu' la daam buge, ge ba ka buge. La ba de'a la bolika te ba nyu' daam buge. 16Ya tue mɛ la ya tɛn'ɛhegɔ la poan. Ya nyɛ' la sɛla te nɔtɔgɔha Yoel daa tɔgɛ la. 17Yenɛ yeti, La kene na, te n wan ka'ɛ n Sea bahɛ asaala woo zuo. Ya dayɔɔhe la pɔyɔɔhe wan pota sɛla n wan eŋɛ, te ya bonbilipaalehe nyɛta liligere, ya bonkɛgehe zaanhena. 18Dabeha aŋa poan n wan ka'ɛ n sea bahɛ boraahe la pɔgɔse'ehe woo n de mam yamehe zuo, te ba puta mam yɛla. 19N wan pa'alɛ n nyalema saazuo ha, la teŋparɛ wa zuo. Ziim la bugum la zun'sɔbelegɔ. 20Wontɛɛŋa wan sobege, te ŋmarega lebege wo ziim, ge te Na'ayenɛ dabaherɛ la n de dabaherɛ kantɛ la soŋa la. 21Se'em woo n dole Na'ayenɛ yu'urɛ la wan nyɛ' faanrɛ. 22Israel teŋa nɛreba wa, kelehe ya yetɔgɔbɔna wa. Yesu daa dela Nazaret teŋa boraa. A daa eŋɛ yelenyalema zo'e zo'e yele ana poan te Yenɛ dekɛ a mea pa'alɛ ya te enŋa n tom yelese'a te Yesu tom la. Ya mɛhe mi' dena wa. Se'ere n sɔe la, a eŋɛ dena wa la ya zen'enhe. 23Se'ere n sɔe te Yesu daa lu' ya nu'uhen daa dela Yenɛ n daa pon tɛn'ɛhɛ dɛ ge bɔta dɛ te la eŋɛ bala. Ge te yamam me daa soŋɛ nɛrebɛ'ɛhe te ba kpa' en punpuuredɔɔ zuo te a ki'. 24Ge Yenɛ daa bahɛ en te a ihege a kum la poan. A daa le kelom soŋɛ fan' en bahɛ nameheseko te a daa nyɛta a kum poan la. Se'ere n sɔe la, kum daa kan ta'an nyaŋɛ en. 25David daa tɔgɛ Yesu yele: Na'ayenɛ te mam dekɛ tolehe n nɛŋa daarɛ woo. Se'ere n sɔe la, enŋa n boe n zuɔ nu'o bɔba. Sɛla ka boe wan bike mam. 26Bala zuo la, mam suunre poan ha pee mɛ, te mam nɔɔrɛ tara pɛnka. N iŋganɛ wa me boe la fai te sɛla kan ta'an daam dɛ. 27Se'ere n sɔe la ho kan bahɛ te n yee n ke'endoma teŋa bii ho bahɛ te ho Fa'adaana nyɛ sagaŋɔ. 28Ho pon te'ele pa'ale mam sɔrɔɔ seko n dole yɛ'a vom poan la. Ho wan perɛ mam mɛ la popeelom ho neŋan. 29N sɔɔnrɔ, n yete n yele ya mɛ te ya bɔkɛ dena wa soŋa. Te sɔyaaba David daa ki' ge te ba pin' en mɛ. Ge a yɔɔ boe kalam wa. 30David n daa boe la, a daa dela Yenɛ nɔtɔgɔha. Yenɛ daa pɔ' a nɔɔrɛ bo David te a wan bahɛ te David yaaŋa wa sɔe zin'an na'am gɔŋɔ la behera wo David n yuun boe behera se'em la. 31David yuun nyɛ' se'em te Yenɛ loe la, n wan ihege a kum poan, te a yuun yeti, Yenɛ kan bahɛ te n yee n yɔɔ poan bii n pɔn'ɛn n yɔɔ poan. 32Yenɛ n daa bahɛ te Yesu wa ihege a kum poan ge te tomam me daa nyɛ' la to nini wa, wana wa n daa eŋɛ la. 33Se'ere n sɔe te nananawa, yan nyɛ' ge wom yelenyalema la, dela Yesu n daa ta zin'an Yenɛ zuɔ nu'o bɔba la, a Sɔ' Yenɛ daa bo en paŋa la te a dekɛ a Sea la bo tomam wo n daa biŋe a nɔɔrɛ la se'em la. 34Ge David daa ka keŋɛ saazuo wo Yesu n keŋɛ se'em la ge a daa yeti, Te Na'ayenɛ yele mam Daana la yeti, zin'ire n zuɔ nu'o wa na, 35gura te n bahɛ te ho diŋdoma lebege ho tagatɛ. 36Yamam Israel teŋa nɛreba zan'an wa, mine ya dena wa: Te Yenɛ n sigɛ Yesu te a de'a to Daana la Se'em Te A Loe La. Enŋa n bala te ya daa kpa' punpuuredɔɔ zuo la. 37Nɛreba la daa n ta wom Peter n daa yele se'em la, la daan ba sunya mɛ te ba yele Peter la tontoneba basɛba la yeti, To sɔɔnrɔ, to nya wan eŋɛ la wane? 38Te Peter lebehe ba yeti, Ya zan'an teehe ya potɛn'ɛra ge to'e ko'om soa Yesu yu'urɛ poan. Ya han eŋɛ bala, Yenɛ wan bahɛ ya yelebe'ero bo ya ge bo ya a Sea la. 39Yenɛ dekɛ nɔbiŋdena wa bo la yamam la ya kɔma la sɛba woo n boe teŋse'ehe la zan'an la sɛba woo te to Daana Yenɛ yi' ba a zen'en na la. 40Wana wa daa dagɛ yele la zan'an te Peter yele nɛreba la. A le malom yele ba kpe'eŋkpe'eŋo te, Fan' ya, ya mɛhe bahɛ namehegɔ wa poan la ya da nyaŋɛ nyɛ' nameheseko te sɛba n daa ko' Yesu yete ba nyɛ' la. 41Daanden daarɛ la, nɛreba kekeko sakɛ ba sunya poan bo Peter yetɔgom la ge to'e ko'om soa. Ba zan'an paɛ wo nɛra tuha atan' lagom la sɛba n sakɛ bo Yesu la. 42Ba potɛn'ɛra zan'an kɔ'ɔn de'a la tontoneba la pa'ala ba ge la ba lagom bɔna bɔŋyeŋɔ ge lagom dita boyena wo ban de sɛba n sakɛ bo Yesu la, ge la ba lagom po'oha bɔ'ɔra Yenɛ boyena. 43Nɛreba la n nyɛ' Yenɛ n daa soŋɛ tontoneba la te ba eŋɛ yelenyalema zo'e zo'e la, la eŋɛ ba pakerɛ mɛ. 44Sɛba woo n sakɛ bo Yesu la, lagom bɔna mɛ ge tɔnta sɛla woo te ba tara boyena. 45Ba ne koohe la ba lɔgɔrɔ dekɛ ligiri la bo' se'em han ne ta bɔta soŋorɛ. 46Daarɛ woo sɛba n sakɛ bo Yesu la kelom lagom na la taaba Yenɛ Yire la poan. Ba me lagom dita taaba yiya la popeelom ge tare sunpeelom la taaba, 47ge pɛngera Yenɛ. Nɛra woo yete te ba tare toonsoma la ba tooma poan. Ge te daarɛ woo Na'ayenɛ tare nɛresɛba te a faanra baha ba yelebe'ero poan la pa'aha ba lagaŋɔ la poan.

will be added

X\