Tõoma 19

1Apolos n daa na ta bɔna Korint teŋa poan la, Paul keŋɛ doohe la tenhen la poan paɛ Epesus teŋa. Bilam te a wa nyɛ' Yesu dɔlɔba la basɛba 2ge soke ba yeti, Yan daa ta nam Yesu la, Yenɛ Sea la wa'an ya zen'en na? Te ba lebehe Paul yeti, Tomam nan pon ka tabelɛ wom te sɛla boe te a yu'urɛ de'a Yenɛ Sea. 3Bilam te Paul le soke ba te, Ko'om soa bona taaba te ba bo ya? Te ba le lebehe yele Paul yeti, Yon n daa bo'ore ko'om soa sebo la taaba. 4Paul yele ba yeti, Yon ko'om soa la dela ko'om soa te ba bo'ore la sɛba n tee ba potɛn'ɛra ba be'em la poan. Ge Yon me le yele Israeldoma te ba nam nɛrese'em daana n pa' enŋa poore ye'a na la. Nɛre'enŋa me n de Yesu la. 5Ban wom Paul n yele ba se'em wa la, ba to'e ko'om soa to Daana Yesu yu'urɛ poan. 6Te Paul n ta dekɛ a nu'o pagalɛ ba zuto, te Yenɛ Sea la daa wa'an ba zen'en na te ba pin'ilom tɔgɔra yetɔgom buuri buuri ge me sɔlena Yenɛ Yelesoma la bo nɛreba. 7Ba zan'an de wo nɛra pia la bayi'. 8Paul daa keŋɛ zamehegɔ yire la poan te ŋmarehe setan' poan, a tɔgɔra Yenɛ sɔ'ɔlom yɛla la nɛreba la n boe bini ge te dabeem ka tara en. 9Bama basɛba toba li' mɛ ge ka sakɛ bo Paul n yele se'em la. Ba tɔgɔre tɔgɔsebo n ka ane soŋa yɛhera la Yesu Sore poan. Bala te Paul bahɛ ba zen'en ge lagahɛ Yesu dɔlɔba la ma'an tare ba keŋɛ Tiranus zameha deo kantɛ la poan. Bilam te a tɔgɔra ganreha Yenɛ yɛla bɔ'ɔra nɛreba la daarɛ woo. 10Paul eŋɛ wana wa la yuuma ayi' te nɛreba la woo n boe Asia tenhen poan la, la Yudoma la sɛba n dagɛ Yudoma la, wom Na'ayenɛ yelehom la mɛ. 11Yenɛ daa bahɛ te Paul eŋɛ yelekerese'a 12ge ba han ne tare a nɛŋaduuhuga bii a tanɛ se'ere keŋɛ ta pagele ban'ahedoma zen'en ba ban'ahe la ne bahɛ ba mɛ ge te bonbɛ'ɛhe la me yehe ba zen'enhen. 13Yudoma basɛba n dole digera bonbɛ'ɛhe nɛreba zen'enhen nya bote te ba dekɛ la to Daana Yesu yu'urɛ digera soŋoreba la. Ba daa ne yeti, Yesu se'em te Paul mɔɔla wa yu'urɛ poan, to yele ya te ya yehe nɛra wa zen'en na. 14Te malema keema la ayema la yu'urɛ n de Skeva la kɔma bayopɔe lagom dɔla eta wana wa mɛ. 15Bonbɛ'ɛhe la yele ba yeti, Han de'a Yesu, tomam mi' en. La han de'a la Paul, tomam mi' en. Ge yamam wa, ane n de ya? 16Te boraa sɛka te bonbɛ'ɛhe tona la en la daa kɔ'ɔn nyabera tɔ'ɔra ba, aanhom ba lɔgɔrɔ bahɛ ge pɔgɔlom ba te ba zɔ' yehe a yire la poan. 17Yudoma la Greekdoma basɛba n boe Epesus teŋa poan la n wom dɛ la, dabeem kɛn' ba mɛ. Dene poan te ba bo to Daana Yesu yu'urɛ na'ahegɔ. 18Bama basɛba n nam Yesu la tole nɛrekooŋɔ la poan na te nɛra woo nini nyɛta ba ge te ba yɛta sɛla la sɛla te ba eta 19ge basɛba n daa tare gɔnɔ tona tiimtooma la me tare ba gɔnɔ la me na lagahɛ nyɔ' ba la bugum. Te gɔnɔ la woo te ba nyɔ' la ligiri daa de wo sanlenpɛɛle kpila tuha pihinuu la. 20Ge bala mea te nɛreba kekeko daa wona Na'ayenɛ yɛla ge lagom dɔla Yesu mɛ. 21Yele'ana wa n daa eŋɛ ba'ahɛ la, Paul eŋɛ a potɛn'ɛrɛ te a doohe la Makedonia la Akaia tenhen la nya keŋɛ Yerusalem teŋa poan. A yeti, N han keŋɛ Yerusalem teŋa wa poan la me sontii n paɛ Arom teŋa poan. 22Te a tom a soŋoreba Timoti la Erastus Makedonia teŋa ge enŋa ton mɔ'ɛn nini la Asia tenhen poan. 23La dela bala ma'an poan te daaŋɔ wa'an Epesus teŋa poan na yɛhera la Sore zuo. 24Ge te kuta ayema daa bɔna te a yu'urɛ de'a Demetrius. Demetrius wa maalɛ la sanlenpeela bagarɛ deo bo bagarɛ ma' te ba yi'ira dɛ Artemis. Te tom ana wa poan bahɛ te Demetrius tontoneba nyɛ' yɔɔrɔ. 25Te bala te Demetrius la nya daa yi' lagahɛ a tontoneba la zan'an la nɛresɛba me n kute wo bama la. N yi' ba zan'an lagahɛ la, a yele ba yeti, Boraahe wa. Ya mɛhe mi' te to yɔɔrɔ yehere la toondena wa poan na. 26Ge nananawa ya mɛhe nyɛte ge wona Paul n ete se'em wa. A yete te asaala mea n maalɛ bagase'a dagɛ baga sɛsɛla. A me nyaŋɛ tɔgɛ tee nɛreba zo'e zo'e potɛn'ɛra kalam Epesus teŋa wa poan wa ge me pon wona te a nyaŋɛ teŋse'ehe woo n boe Asia teŋa poan la. 27Dene poan, yele boe de'a la nɛreba wan tɔgɛ tɔgɔsebo n ka an soŋa yɛhera la to toonɛ wa poan. Ge dagɛ la dena wa ma'an, ge le yɛ'ɛha Artemis bagarɛ yire wa ka le maan nyɛ' na'ahegɔ nɛreba zen'en. Bagarɛ Artemis se'em n de bonkpe'eŋo daana te nɛresɛba n bo Asia woo la teŋa wa zuo woo po'oha wa wan bahɛ yoo. 28Te nɛrekooŋɔ wa n daa ta wom Demetrius n yele ba se'em wa ba'ahɛ la, la daan ba. Ge te ba pin'ilom mɔɔla yɛta te, Epesus teŋa bagarɛ Artemis wa n de bonkpe'eŋo gana zan'an! 29Te nɛreba kekeko lagom vɔɔla Epesus teŋa zan'an poan ge ba ta nyɔkɛ Makedonia teŋa boraahe n lagom dɔla Paul ɛɛra mɔɔla Yesu yɛla la Gaius la Aristarkus. Ba kɔ'ɔn tarɛ ba mɛ keŋɛ deo kantɛ la poan te nɛreba lagaha bini tara yetɔgom la. 30Paul mea me daa bote te a keŋɛ nɛrekooŋɔ la poan mɛ, ge Yesu dɔlɔba la ka sakɛ te a keŋɛ bini. 31Teŋa la poan zuodaana la basɛba n de Paul zɔdoma la me bo nɔɔrɛ na yɛta en te a da nɛɛ a mea nɛrekooŋɔ la poan na. 32Nɛrekooŋɔ la nya lagahɛ yetɔgom deo kantɛ la vɔɔla mɛ. Sɛba vole la ba me yelese'a ha ge te sɛba me vɔɔla yɛla a se'a me. Se'ere n sɔe la ba zo'e zo'e ka mi' se'ere zuo n sɔe te ba lagahɛ na la. 33Nɛreba la basɛba ko' nɔɔrɛ te Yudoma la n loe Alekzander te a de'a nɛŋadaana la, a ye kɔ'ɔn de'a se'em n wan maalɛ yetɔgom la. Bilam te Alekzander ihege saazuo yebehɛ a nu'o yɛta nɛreba la te ba go'e vole, ge nya zegera te a tɔgɛ bo nɛreba pa'alɛ ba te enŋa la nɛreba la ka tare tuure la se'ere n eŋɛ wa. 34Ge nɛrekooŋɔ la n ta baŋɛ te a dela Yudoma nɛra la, ba zan'an le vɔɔla mɛ wo ban pon pin'ilom vɔɔla se'em la te, Epesus teŋa bagarɛ Artemis n de bonkpe'eŋo gana zan'an! Ba eŋɛ wana wa te la yue mɛ. 35Depooren te teŋa la poan zuodaana la ayema nyaŋɛ tɔgɛ te nɛrekooŋɔ la go'e vole. Ge te a yeti, N taaba Epesus teŋa nɛreba wa, nɛra woo mi' soŋa soŋa teŋa wa poan te Epesus teŋa wa n de toŋsɛka n tare baga deo te Artemis se'em n de bonkpe'eŋo wa bɔna bini te ba kaanbera wa. Nɛra woo me le mina te Epesus teŋa wa n le kaanbera Artemis kuguse'ere n ze'ele yenɛ zuo na la. 36Bala nɛnɛra kan ta'an yete lana wa woo dela ponpɔrɔŋɔ. Dene poan yamam yenzuo ma'ɛn ya mɛhe la ya da gbita. 37Boraahe wa te ya tare ba wa'an kalam na wa ka kɛn' baga deto wa poan gbi baga. Ba me ka le tɔgɛ yetɔgom sebo n de be'em bo to bagarɛ ma' Artemis wa. 38Te Demetrius la a tontoneba wa han tara la yetɔgom la se'em, to tare zuodoma mɛ la dabahese'a te yetɔgom la wan maalɛ. 39Ya han nyɛ' la sɛla yɛhera la yelese'ere poan, to wan doohe la sore te teŋa wa nɛresɛba n mi' kiha la maalɛ dɛ. 40Ge sɛla n eŋɛ zina wa la, yele boe de poan de'a la Aromdoma wan yele to te sɛla n eŋɛ zina wa la pa'alɛ te to bote to gbirege la teŋa wa. Ban me han yele wana wa, se'em ka boe wan ta'an lebehe te yelese'ere n seren eŋɛ zina wa la, tare vɔnrɛ. 41Te zuodaana wa n daa ta tɔgɛ wana wa ba'ahɛ la, a daa yele nɛrekooŋɔ la te ba yeregɛ.

will be added

X\