Tõoma 18

1Pooren, Paul daa bahɛ Atens teŋa ge keŋɛ la Korint teŋa poan. 2Bilam te a nyɛ' Yuda teŋa boraa te a yu'urɛ de'a Akuila. A dela Pontus teŋa nɛra ge nan ze'ele la Itali teŋa wa'an na la a pɔga. A pɔga la me yu'urɛ dela Prisila. Se'ere n sɔe te ba daa wa'an Korint teŋa la, dela Naba Klaudius n bo a nɔɔrɛ te Yudoma woo bahɛ Arom teŋa poan la. Dene poan te Paul keŋɛ te a behɛ ba. 3Paul n daa paɛ bini la, a boe la ba mɛ. Se'ere n sɔe la a daa wogore la tana behera a mea wo Akuila la a pɔga n ete se'em la. 4Ge Vo'ohogo Daarɛ woo Paul daa ŋmɛ'ɛre la nɔkpe'ene la Yudoma la Greekdoma zamehegɔ yire la poan. A ete lana wa zegera te a tee la ba potɛn'ɛra te ba sakɛ n yete se'em la. 5Silas la Timoti n daa ta ze'ele Makedonia teŋa wa'an na paɛ Paul Korint teŋa poan la, Paul nya kɔ'ɔn mɔɔla la Yenɛ yelesoma la ma'an. Ge a yete Yudoma la te la dela sesera te Yesu n de Se'em Te Yenɛ Loe La. 6Yudoma la n daa ka sakɛ bo en ge tɔgɔra yelese'a n ka ane soŋa bɔ'ɔra en, bilam te Paul me piihe a na'ma puuhugo pa'ala te bama n eŋɛ se'em la a ka bote de. Ge a yele ba yeti, Ho taala dɔla hɔ! La dagɛ mam yele. Bala nananawa, n wan bahɛ ya zen'en ge keŋɛ la sɛba n dagɛ Yudoma la zen'en ta mɔɔlɛ Yenɛ yɛla la bo ba. 7A nya bahɛ zamehegɔ yire ge keŋɛ ta kɛn'ɛra boraa ayema yire n kɔ'ɔn du' la zamehegɔ yire la. Boraa wa po'ohere Yenɛ mɛ wo Yudoma la a yu'urɛ dela Titius Yustus. 8Ge te zamehegɔ yire zuodaana Krispus la a yiredoma zan'an nam Yesu. Ge Korint teŋa nɛreba zo'e zo'e n wom Na'ayenɛ yɛla la daa nam de mɛ ge to'e ko'om soa. 9Te daarɛ deyema yu'uŋɔ te Paul wa liligere te to Daana Na'ayenɛ yele en yeti, Paul, da bahɛ te dabeem tara hɔ. Ge kelom kɔ'ɔn mɔɔla Yelesoma la la ho da go'e. 10Se'ere n sɔe la mam Na'ayenɛ boe la ho mɛ. Nɛra kan ta'an tom ho be'em. Se'ere n sɔe la nɛreba zo'e zo'e teŋa wa poan wa dela mam nɛreba. 11Bala te Paul yee teŋa la poan yuunɛ la ŋmarehe seyoobe pa'ala nɛreba la Yenɛ yɛla. 12Gallio n daa behera Akaia bo naba la, Yudoma la lagahɛ la taaba keŋɛ ta nyɔkɛ Paul tare en keŋɛ naba la zen'en te a gankɛ en. 13Ban paɛ la, ba yeti, Boraa kana wa zegere te a tɔgɛ tee la nɛreba potɛn'ɛra te ba po'oha Yenɛ. Ba po'ohegɔ la me dagɛ ma'an la to pa'alegɔ la. 14Te Paul n ta bɔna bini te a tɔgɛ la, Naba Gallio la yele Yudoma la te, Yɛla ana wa han dene la yelese'a n de be'em te Paul wa tone wa, n wan ma'ane n mea tɔgɛ ne ya yetɔgom soŋa soŋa ta ko' dɛ. 15Ge la yenzuo de'a la ya ŋmɛ'ɛre la nɔkpe'ene la yetɔgom la yu'ura la pa'alegɔ se'a te yamam ma'an dɔla. Bala, tare ya yetɔgom la la ya ta maalɛ dɛ ya mea. Mam ka gankere yele ana taaba. 16Ge te a bahɛ te ba dige ba a zen'en. 17Ge nɛreba la tuluge nyɔkɛ Sostenes se'em n daa de zamehegɔ yire zuodaana la ŋmɛ' en mɛ naba la nɛŋa. Ge wana wa pon ka daan Naba Gallio la fiin me. 18Te Paul daa bɔna Korint teŋa poan dabeha kekeko nya keehe Yesu nɛreba la. Te enŋa la Akuila la a pɔga Prisila zom la ɔɔnrɔŋɔ kantɛ Kenkrea teŋa poan te ba keŋɛ Siria teŋa poan. Ban yete ba eŋɛ wana la, Paul keŋɛ ta kɛ la a zuo. Se'ere n sɔe la, a daa pɔ' la nɔɔrɛ bo Yenɛ. 19Ban paɛ Epesus teŋa poan la, Paul bahɛ Prisila la Akuila la bini ge keŋɛ zamehegɔ yire ta ŋmɛ'ɛra nɔkpe'ene la Yudoma la. 20Ban yele Paul te a yee ba zen'en te dabeha yuue, Paul ka sakɛ 21ge ton yele ba n ye' la te, Yenɛ han bɔ'ɔ sore, n wan le lebe ya zen'an na. En yele wana wa la, a le zom la ɔɔnrɔŋɔ kantɛ Epesus teŋa keŋɛ Kaesarea teŋa poan. 22En paɛ Kaesarea teŋa poan la, a daa keŋɛ Yerusalem teŋa poan mɛ ta po'ohɛ Yesu nɛreba la ge keŋɛ la Antiok teŋa poan. 23Paul n yee Antiok mɛ dabeha fiin wa, a bahɛ bini ge doohe la Galatia la Prigia teŋhe poan kan'ana Yesu dɔlɔba la te ba maan nyɛ' paŋa pa'ahɛ Yesu sore poan. 24Saŋkaŋa la Yudoma ayema n kɛn'ɛra Alekzandria teŋa daa wa'an Epesus teŋa poan na. A dela nɛrese'em n mi' yetɔgom soŋa soŋa ge me zamehɛ Yenɛ gɔŋɔ mina a. A yu'urɛ daa dela Apolos 25ge a me ba' mina to Daana sore la mɛ. A tare sunpeelom la a tɔgɔra ge pa'ala nɛreba Yesu yɛla ge te tuure ka bɔna bini ge a kelom mina la Yon ko'om soa la ma'an. 26Te Apolos daa pin'ilom tɔgɛ bo nɛreba zamehegɔ yire la poan ge te dabeem ka tare en. Prisila la Akuila n ta wom a tɔgom la, ba tare en kule la ba yire ta pa'alɛ en Yenɛ yɛla la pa'ahɛ. 27Apolos n eŋɛ a potɛn'ɛrɛ te a keŋɛ Akaia teŋa poan, Yesu nɛreba n boe Epesus teŋa la kan'an golehɛ gɔŋɔ bo dɔlɔba n boe Akaia teŋa poan la, yele ba te ba to'e en soŋa soŋa. En paɛ Akaia teŋa la, a soŋɛ sɛba te Yenɛ soŋɛ te bama m daa sakɛ bo Yesu. 28Se'ere n sɔe la, Apolos daa ŋmɛ' nɔkpe'ene la Yudoma nɛrekooŋɔ nɛŋan dekɛ Yenɛ gɔŋɔ yɛla pa'alɛ te Yesu n de Krista.

will be added

X\