Tõoma 17

1Paul la Silas daa keŋɛ doohe la Ampipolis la Apolonia teŋhe nya paɛ Tesalonika teŋa poan. Zamehegɔ yire la bo teŋa wa poan mɛ. 2Paul keŋɛ zamehegɔ yire la poan, wo n ne pon eta se'em la. Te Vo'ohogo Daarɛ sugumnɔɔren botan' te Paul la nɛreba la wa tara sɔnhega ge te Paul daa kaanla Yenɛ yɛla 3te ba bɔkɛ a yete Krista, Se'em Te Yenɛ Loe la, n namehɛ ge ihege a kum poan. A yele ba yeti, Yesu wa n de Krista, Se'em Yenɛ Loe la. 4Yudoma basɛba la daa tee ba potɛn'ɛra te ba pa' Paul la Silas poore. Greekdoma basɛba n po'ohere Yenɛ zo'e zo'e la pɔgɔsɛba n de zuodoma la me eŋɛ la bala mea. 5Ge Yudoma basɛba nyuune mɛ la Paul la Silas. Bala n sɔe te ba keŋɛ da'a ɛɛra nɛresɛba n wan eta be'em la ba lagahɛ ba mɛ te ba gbirige teŋa la poan. Ban eŋɛ bala la, Yudoma la nya keŋɛ la Yason yire ta ɛɛra Paul la Silas te ba tare ba keŋɛ ta bo nɛrekooŋɔ la te ba lagahɛ la. 6Yudoma n ka nyɛ' Paul la Silas bini, ba nyɔkɛ Yason la a tadaandoma data ba zuodoma la zen'en ge vɔɔla te, Boraa se'ehe n boe daana teŋhe woo ge nananawa ba wa'an la kalam na 7ge te Yasone to'e ba soŋa soŋa a yire poan. Ba zan'an ka na'ahere Kaesar yetɔgom ge te ba yete Naba ayema n boe te bama dɔla. A yu'urɛ dɛna la Yesu. 8Te nɛrekooŋɔ la la ba zuodoma la n wom wana wa la, la daam ba mɛ. 9Ge te zuodoma la yele Yasone la a tadaandoma la yete ba yɔ' ge bahɛ ba te ba kule. 10Ge te yene n ta lu' la, Yesu po'oheba la tom la Paul la Silas Berea teŋa poan. Ban paɛ teŋa la poan la, ba keŋɛ la zamehegɔ yire la poan. 11Berea teŋa nɛreba daa kelehere yɛla gana Tesalonika teŋa nɛreba la. Ban daa an la kɛle kelehera Yenɛ yetɔgom la. Ba me daa kan'anle Yenɛ gɔnɔ la daarɛ woo te ba behɛ nya Paul la Silas la n yele se'em la dela sera bii la dagɛ sera. 12Nɛreba zo'e zo'e nam Yesu yɛla mɛ. Greek pɔgɔsɛba n de zuodoma la zo'e zo'e la Greek boraahe zo'e zo'e me nam Yesu yɛla la mɛ. 13Ge Yudoma sɛba n boe Tesalonika teŋa poan n wom te Paul mɔɔlɛ Yenɛ yɛla Berea teŋa poan la, ba keŋɛ bini ta tɔgɛ lagahɛ nɛreba la te ba vɔɔla. 14Te Yesu po'oheba la kɔ'ɔn bahɛ te boraa se'ehe ba poan bele Paul keŋɛ mɔgɔrɛ zen'an la. Ge Silas la Timoti yee la Berea teŋa. 15Ge boraa se'ehe n bele Paul la kɔ'ɔn tare en paɛ la Atens teŋa poan ge ŋmɛrege lebe Berea teŋa na. Ban lebere na la, Paul yele ba te ba ta yele Silas la Timoti te ba da yuue ge paɛ en na. 16Paul n ta bɔna Atens teŋa poan ge gura Silas la Timoti la, a nyɛ' te baga kekeko n boe teŋa la poan ge te a suunre daa sagom. 17Ge bilam te Paul ŋmɛ' nɔkpe'ene la Yudoma la Greekdoma basɛba n po'ohere Yenɛ zamehegɔ yire la poan la. Daarɛ woo a ŋmɛ'ɛra la nɔkpe'ene la nɛresɛba n dole da'a bɔba tɔla la. 18En ta eŋɛ bala la, pa'aleba basɛba wa'an na ŋmɛ' nɔkpe'ene la en. Ba dela Epikurusdoma la Stoikdoma. Ge nɛreba basɛba me daa yeti, Bene te yirenmoa la bɔta te a pa'alɛ? Ge te sɛba me yeti, A an me wo a tɔgɔre la baga a se'a yɛla. Se'ere n sɔe te ba yele wana wa la daa dela Paul tɔgɔre la Yesu yele la a kum ihegere la poan. 19Bala te ba tare Paul keŋɛ Areopagus poan. Deo koŋɔ poan te ba tɔgɔra ba yetɔgom. Ban paɛ la, ba yele Paul yeti, To bote to baŋɛ la pa'ale pa'alegɔ wa te ho pa'ala wa. 20Ho yɛla la a se'a te to wona la dela yelepaala bo to. Bala te bote to baŋɛ a vɔnrɛ. 21Ge Atens teŋa nɛreba la nɛresɛba n wa'an na kɛn'ɛra bini la daa tare nɛŋa sɔnhera yelepaala bɔ'ɔra nɛreba ge kelehere yelepaala me nɛreba zen'en. 22Te Paul ihege tole ze'ele nɛreba la n tare yetɔgom la en Areopagus zen'an la nɛŋa yeti, Atens teŋa boraahe wa, mam mi' te ya na'ahe ya baga wa. 23Te mam n dole ya teŋa wa poan behɛ ya zen'se'ehe te ya kaanbera la, n daa wa le nyɛ' ya kaanbegɔ zen'an kayema te la golehɛ yeti, Yenɛ Se'em Te To Ka Mina. Ya ka mi' se'emdaana te ya po'oha la ge enŋa n de se'emdaana te n tɔgɔra bɔ'ɔra ya wa. 24Yenɛ se'em n naam teŋa wa zan'an la sɛla woo n boe bini la, n de saazuo la teŋa wa Daana. A me ka boe yire se'ere te asaala mɛ' po'oha Yenɛ poan. 25Bii a bɔta sɛla te saaleba wan bo en yɛhera la ban tone bɔ'ɔra en la. Bene zuo? Enŋa mea n de se'em ba bo'ore asaala vom la sɛla woo te a bɔta. 26Te boraa ayena poan te a naam buuri zo'e zo'e bahɛ ba te ba bɔna teŋa wa zuo. A mea daa le pon mina se'em ma'an la zen'sese te nɛreba wa wan bɔna. 27A daa naam ba te ba me wa ɛ la a zen'an. Te daanse'ere ba wan nyɛ' wo ban eere a na'ma la. Ge bala mea zan'an Yenɛ ka zaen la to wo nɛra ayema n yele se'em la te, 28Yenɛ n sɔe te to vɔ'ɔha ge ɛɛra ge bɔna. La ane me wo ya yamdoma basɛba n yele se'em te, Tomam dela a kɔma. 29Ton de Yenɛ kɔma la, da bahɛ ya te to tɛn'ɛhe te a naanɛ la dela sɛla dene n ane wo sanlema bii kugure te yagombahɛdoma tɛn'ɛhe yagom la. 30Asaala n daa nan ka mi' sɛla la Yenɛ eŋɛ a potɛn'ɛrɛ te a kan eŋɛ n sese'ere. Ge nananawa a bo a nɔɔrɛ te nɛra woo n bo zen'an bɔbɔre woo tee ba potɛn'ɛra ba yelebe'ero poan. 31Ge Yenɛ pon loe daanse'ere daarɛ te a wan gankɛ nɛra woo teŋa wa zuo ma'an ma'an. Se'emdaana te a pon loe la n yete a eŋɛ wana wa bo en. Yenɛ daa pa'alɛ nɛreba te a wan eŋɛ wana wa la n daa ihege nɛra la daana a kum poan la. 32Nɛreba la n ta wom Paul te a tɔgɛ porɛ a ihege a kum poan la, basɛba kɛɛte en mɛ. Ge te sɛba me yeti, To bote ho le maan tɔgɛ la dena wa te to kelehe. 33Bala te Paul bahɛ ba lagaŋɔ la poan ge yehe. 34Te boraa se'ehe nam Yesu yɛla ge yelege ba mɛhe pa' Paul poore. Dionisius se'em n lagom de'a Areopagusdoma nɛra la pɔka te a yu'urɛ yi'ira Damaris lagom bɔna sɛba n nam Yesu yɛla ge pa' Paul poore la mɛ.

will be added

X\