Tõoma 16

1Te Paul keŋɛ Derbe la Listra tenhen poan. Bilam te boraa kayema bɔna dɔla Yesu sore, ge te a yu'urɛ dɛna Timoti. A ma dela Yuda teŋa pɔka ge me dɔla Yesu sore, ge a sɔ dela Greek nɛra. 2Ge sɛba woo n dole Yesu sore bɔna Listra la Ikonium tenhen poan la kɔ'ɔn tɔgɔra la Timoti toonsoma. 3Paul me bote Timoti n lagom dɔla la ba tona. Dene poan te Paul bahɛ te ba ŋma' Timoti boraanɛ. Se'ere n sɔe la Yudoma sɛba woo n boe teŋse'ehe n boe bilam bɔba la daa mi' te Timoti sɔ dela Greek nɛra. 4Ge Timoti n dole Paul la Silas te ba kena tenhen la poan la, ba tɔgɔre mɛ bɔ'ɔra sɛba n dole Yesu sore la. Ba yele ba yelese'a te Yesu tontoneba la la zuodoma la zin'ire Yerusalem tɛn'ɛhɛ te ba dɔla la. Ba me le yele ba yɛ'ɛha te ba mɔ'ɛn nini la a. 5Dene poan te lagaŋɔ la malom sɛ' ze'ele la ban nam Yesu se'em. Daarɛ woo nɛrepaalehe pa'ahe ba lagaŋɔ la poan mɛ. 6Paul la a zɔdoma bayi' la keŋɛ ta yehe la Prigia la Galatia tenhen poan. Se'ere n sɔe la, Sea la ka bo ba sore te ba mɔɔlɛ Yelesoma la Asia tenhen poan. 7Ban paɛ Misia teŋa poan la, ba zegere te ba keŋɛ la Bitinia teŋa, ge Yesu Sea la ka bo ba sore te ba keŋɛ bini. 8Te ba nya kɔ'ɔn doohe la Misia teŋa poan keŋɛ Troas teŋa. 9Yuunkoŋɔ te Paul zaanhom nyɛ' te Makedonia teŋa boraa te a ze'a bɛlɛna en te, Wa'an Makedonia teŋa poan na la ho soŋɛ tɔ. 10Paul n ta nyɛ' a zaanheŋɔ ba'ahɛ la to ihege maahom te to keŋɛ Makedonia teŋa. Se'ere n sɔe la to tɛn'ɛhɛ to potɛnha poan te la de'a la Yenɛ n yi'ire to te to keŋɛ ta mɔɔlɛ Yesu Yɛla bini. 11Te to zom ɔɔnrɔŋɔ kantɛ Troas teŋa keŋɛ ta yehe Samotrake teŋa, te yiimbeere te to paɛ Neapolis teŋa poan. 12Ton ze'ele Neapolis teŋa poan la, to keŋɛ la Filipi teŋsɛka n de teŋkantɛ bɔna Makedonia teŋa poan la. Filipi le de'a la teŋsɛka te Aromdoma sɔna behera. To me bo bini te dabeha yoe. 13Te Vo'ohogo Daarɛ n paɛ la, to yehe teŋa la poan mɛ keŋɛ kolaa ta zin'an nɔgbenɛ. To tɛn'ɛhe te zen'an kayema wa bɔna te Yudoma la lagaha po'oha. Pɔgɔhe se'ehe n lagahɛ bini na te to tɔgɛ la ba. 14Te pɔka kayema bɔna bini. Te a yu'urɛ dena Lidia ge te a de'a fukɔɔha ge ze'ele la Tayatira teŋa. A me le de'a la se'em n po'ohere Yenɛ wo Yudoma la. Te to Daana soŋɛ en te a bɔkɛ ge nam Paul n tɔgɛ sɛla la. 15Te pɔka la la ka yiredoma la n ta to'e ko'om soa la, a yi' to mɛ yeti, Yamam diŋɛ dekɛ mam te n dɛna Yesu dɔla la, wa'an ya na bɔna n yire. Te a yele to te to keŋɛ. 16Daarɛ deyema te to le yɛ'ɛha zen'sɛka te ba lagaha po'oha Yenɛ la. Ton ye' la, to to'ohɛ la pugula n de yameŋa te bonbɛ'ɛhe tona la en te a yɛta sɛla n wan wa'an pooren na. A doma nyɛ' ligiri a zen'an. 17Te a doohe tomam la Paul vɔɔla te, Boraa sena wa dela Yenɛ Se'em N Gane Zan'an la yamehe. Ba mɔɔlɛ la nɛra wan ta'an eŋɛ se'em nyɛ' faanrɛ. 18Dabeha kekeko te pugula la wa dɔla tɔ eta bala. Te la nya ba daan Paul zo'e zo'e te a ŋmɛregɛ yele bonbɛ'ɛhe la n boe pugula la zen'en te, Yesu Krista yu'urɛ poan n yele ho te ho yehe pugula wa zen'en na. Te bilam bilam te soŋoreba la yehe a zen'en. 19Te pugula wa doma n ta baŋɛ te ba ka le malom nyɛ' ligiri a zen'en la, ba keŋɛ ta nyɔkɛ Paul la Silas tare ba keŋɛ kpɛ'ɛndoma la n tɔgɔre yetɔgom lɛm da'en la. 20Te ban tare ba keŋɛ kpɛ'ɛndoma la zen'en la, ba yeti, Boraahe wa dela Yudoma ge wa'an na daana teŋa wa. 21Ba pa'ala yelese'a n dagɛ ma'an la to yɛla. Tomam me yi' dela Aromdoma. To kan ta'an eta ban yele se'em la. 22Nɛreba la n yele wana wa ba'ahɛ la, nɛrekooŋɔ la naɛ la nɔɔrɛ la ba, ge te zuodoma la aanhom Paul la Silas lɔgɔrɔ ge bahɛ te ba ŋmɛ' ba. 23Ban ŋmɛ' ba ba'ahɛ la, ba nya tare ba ta eŋɛ paka deon ge yele se'em n behera ba la te a pagɛ ba soŋa soŋa. 24Se'em te ba yete a gura la n daa wom wana wa la, a tare Paul la Silas kɛn' la deseko n boe poan poan ha la. Ta dekɛ ba na'ma ba' lamenɛ la dɔɔ. 25La daa wa dela wo yu'uŋɔ sunsua ha la te Paul la Silas daa wa po'oha ge yoona yooma pɛngera Yenɛ pakadeen la poan. Ban ete wana wa la, sɛba n daa lagom bɔna pakadeen la daa kelehere ba mɛ. 26Bilam bilam te teŋa miim te pakadeen la ɛnberɛ ugɛhɛ. Lan daa eŋɛ bala la, kolehe la me yu'uhɛ mɛ ge te banhe la mea ba'ɛ sɛba n bo pakadeen la na'ma. 27Te gura la n ihege nyɛ' te pakadeen la kolehe la yu'uhɛ la, a tɛn'ɛhe te sɛba woo n bo pakadeen la zɔ' yehe mɛ. Bilam te a foe a so'a bɔna bini te a ko' a mea. 28Ge Paul vole kpe'eŋkpe'eŋo yele en yete a da ko' a mea te ba zan'an boe bini. 29Te gura la yele te ba bo en bugum ge gbelom kɛn' pakadeen la poan ha ta lu' teŋa Paul la Silas nɛŋa, 30ge ihege tare ba yehe ta soke ba yeti, Boraahe wa, n wan eŋɛ la wane ta'an nyɛ' faanrɛ? 31Te Paul la Silas lebehe yele en yeti, Nam to Daana Yesu. Ho han eŋɛ bala, hon la ho yiredoma wan nyɛ' faanrɛ. 32Ba nya tɔgɛ la to Daana Yesu yɛla bo enŋa la a yiredoma la zan'an. 33Yu'uŋkoŋɔ te gura la pee Paul la Sila nɔra la. Ge te Paul la Silas bo enŋa la a yiredoma la ko'om soa yu'uŋkoŋɔ. Se'ere n sɔe la, ban nam Yesu la zuo. 34Te a tare Paul la Silas keŋɛ a yire ta bo ba dia. Gura la la a yiredoma la tare sunpeelom. Se'ere n sɔe la ba nam Yenɛ yetɔgom la. 35Yiimbeere la, Aromdoma zuodoma la tom la pɛɛntɛɛnreba la. Ba tom ba te ba keŋɛ ta yele gura la te a yu'ɛ boraahe la bahɛ. 36Bala te gura la me yele Paul te, Zuodoma la bo nɔɔrɛ na te n bahɛ te hon la Silas keŋɛ. Dene poan ya ta'an keŋɛ. Yenɛ tara ya na'ma. 37Ge Paul yele zuodoma sɛba n de pɛɛntɛɛnreba yeti, Ba sine ge bahɛ te ba ŋmɛ' tɔ mɛ nɛrekooŋɔ poan, ge tara tɔ kɛn'ɛhɛ pakadeen. Ge tomam me de'a Arom buuri. Te nananawa zuodoma la nya bɔta te ba bahɛ tɔ te to keŋɛ baanlam. La kan ta'an eŋɛ bala! La dela sore te Arom zuodoma la ba mɛhe wa'an kalam na tare tɔ keŋɛ ta bahɛ. 38Te zuodoma sɛba n de pɛɛntɛɛnreba la keŋɛ ta yele Arom zuodoma la Paul la Silas la n yele se'em. Arom zuodoma la n wom te Paul la Silas dela Arom teŋa nɛreba la, dabeem n tare ba. 39Depooren, te ba nya keŋɛ ta ŋmɛ' nu'po'ɔ bo Paul la Silas ge bele ba yehe pakadeen la. Ban bele ba yehe na la, ba yele ba te ba bahɛ teŋa la poan. 40Paul la Silas la n bahɛ pakadeen la poan la, ba le lebe la Lidia yire. Bilam te ban paɛ nyɛ' Yesu po'oheba la ba tɔgɛ kpemehe ba ge bahɛ teŋa la poan.

will be added

X\