Tõoma 15

1Boraahe sese'ehe n ze'ele Yuda teŋa poan wa'an Antiok teŋa na wa pin'ilom pa'ala Yesu nɛreba la. Ba yele ba yeti, Yenɛ kan ta'an fan' ya bahɛ han dagana ya ŋma' la ba boraanɛ wo Moses n daa pa'alɛ se'em la. 2Paul la Barnabas n wom wana wa la, ba ŋmɛ' nɔkpe'ene la boraahe la yɛhera la ban tɔgɛ se'em la. Bilam te ba wa ko' nɔyenɛ te la de'a la Paul la Barnabas la Yesu nɛreba la basɛba keŋɛ Yerusalem teŋa poan. Ba han paɛ bini ba nyɛ' Yesu tontoneba la basɛba la Yesu po'oheba sɛba n de zuodoma la yɛhera la yele dena wa poan. 3La dela Yesu lagaŋɔ n tom te ba keŋɛ. Ban dole Poenisia la Samaria tenhen poan tɔla la, ba yele nɛreba yɛhera la sɛba n dagɛ Yudoma n nam Yenɛ se'em. Yesu po'oheba la n wom dena wa la, ba daa tare sunpeelom. 4Ge Paul doma la n paɛ Yerusalem teŋa poan la, Yesu lagaŋɔ la Yesu tontoneba la basɛba la zuodoma la to'e ba soŋa soŋa. Te Paul doma la yele ba sɛla woo te Yenɛ eŋɛ bo ba. 5Ge Yesu nɛreba la basɛba la n daa dole Pariseedoma n ete se'em la daa ihege saazuo yeti, La sontii te sɛba n dagɛ Yudoma la ŋmata ge nana Moses pa'alegɔ. 6Yesu tontoneba la la zuodoma la lagahɛ taaba te ba behɛ ban wan eŋɛ se'em. 7Ban gankere yuura ha la, Peter ihege saazuo yeti, N sɔɔnrɔ, ya mi' te yuuma yuuma n tole ha, Yenɛ daa loe la mam ya poan te n mɔɔlɛ a Yelesoma la la n bo sɛba n dagɛ Yudoma la te bama me ta'an wom ge nam dɛ. 8Te Yenɛ se'em n mi' asaala potɛn'ɛrɛ n ane se'em la, daa bahɛ te a Sea la wa'an sɛba n dagɛ Yudoma la me zen'an na wo n daa bahɛ en te a wa'an tomam me zen'an na se'em la. A daa eŋɛ wa'an wa te a pa'alɛ te a boe ba zen'an wo n boe la to se'em la. 9Yenɛ ka yelehere Yudoma la sɛba n dagɛ Yudoma la. A daa bahɛ ba yelebe'ero bo ba. Se'ere n sɔe la ba daa nam a Yelesoma la mɛ. 10Dene poan, wane te ya bɔta te ya bahɛ te sɛba n dole Yesu sore la eta yelese'a n kpe'em te to sɔyaabdoma bii tomam wa daa ka ta'an eŋɛ la? Wana wa dela ya bote ya makɛ la Yenɛ la ya behɛ n wan eŋɛ se'em. 11Bala la ka an soŋa. To nam Yenɛ Yelesoma la mɛ te a fan' to bahɛ la to Na'ayenɛ Yesu Krista zo'ohogɔ la zuo. Bala mea me n eŋɛ sɛba n dagɛ Yudoma la. 12Peter n ta tɔgɛ wana wa ba'ahɛ la Yesu nɛreba la ma'ɛn ba mɛhe kelehera Paul la te ba eŋɛ yelekerehe zo'e zo'e sɛba n dagɛ Yudoma la lagaŋɔ poan la se'em. 13Paul la Barnabas n ta tɔgɛ ba'ahɛ la, Yames me ihege saazuo yeti, N sɔɔnrɔ wa, kelehe ya mam soŋa soŋa. 14Peter se'em yu'urɛ deyema n de Simon la pon te'ele tɔgɛ bo ya. A yete yia Yenɛ daa pa'alɛ sɛba n dagɛ Yudoma la te enŋa pa' ba pore la enŋa n daa loe nɛreba ba poan te ba de'a a nɛreba la. 15Nɔtɔgɔheba la n daa yele se'em la la dena wa kɔ'ɔn de'a la boyena. La yeti, 16De daarɛ, n wan malom mɛ David sogorɛ la n lu la ze'ele. N wan malom maalɛ de zen'an n sagom la, malom mɛ dɛ wo denɛ n yuum pon ana se'em la, 17Bilam poan te nɛra woo wan ɛ to Daana Na'ayenɛ na'ma zen'an. Sɛba n dagɛ Yudoma woo sɛba te n dekɛ te ba de'a n denɛ. To Daana Na'ayenɛ n yele se'em n bala. 18A yele dena wa te la dabeha zaen mɛ. 19Te Yames la maan yeti, Dene poan la dela mam potɛn'ɛrɛ te ya da bahɛ te to daana sɛba n dagɛ Yudoma sɛba n ŋmɛregɛ dɔla Yesu sore wa. 20Ge bahɛ ya te to golehɛ ton yele ya ba te ba bahɛ toonyooro la ge da dita disɛka n kaanbɛ bo baga la ba da tona yalomtooma, ge da obe duŋsɛka te ba kɛngɛ ko' te ziim yea a pooren bii ba di' ziim. 21Se'ere n sɔe te to wan golehɛ ba wana wa la dela yuuma yuuma n tole ha ba tɔgɛ Moses yɛla la teŋa woo poan mɛ, ge me kaanla Pa'alegɔ la Vo'ohogo Daarɛ woo zamehegɔ yia poan. 22Yesu tontoneba la Yesu lagaŋɔ zuodoma la nya ko' nɔɔrɛ. Ba ko' ba nɔɔrɛ la te la de'a la ba loe boraa se'ehe ba poan la ba ton ba la gɔŋɔ la te ba doohe Paul la Barnabas keŋɛ Antiok teŋa poan. Bilam te ba nya loe Yudas se'em yu'urɛ n le de'a Barsabbas la Silas, sɛba woo n dole Yesu sore la daa bo'ore boraahe seyi' wa na'ahegɔ. 23Gɔŋɔ la te ba tom ba la daa yeti: Ya sɔɔnrɔ, Yesu pɔhega tontoneba la Yesu dɔlɔba la zuodoma la n po'ohere yamam Yesu dɔlɔba de'a sɛba n dagɛ Yudoma la woo ze'ele Antiok la Siria la Silisia tenhen poan la. 24To wom te boraa se'ehe to poan daa wa'an na daan ya ge bo ya sunsagaŋɔ la yetɔgom sebo te ba daa tɔgɛ bo ya la. Tomam daa ka bo ba nɔɔrɛ te ba wa'an na yele ya bala. 25Dene zuo, to zan'an nyɛ' taaba ko' nɔyenɛ te la de'a la to loe nɛreba te ba wa'an na tɔgɛ la ya. Ba yete ba doohe mɛ la Paul la Barnabas to sɔɔnrɔ, 26sɛba n ka gangɛ ba vom zuo ge tona la to Daana Yesu Krista tooma la wana. 27Bala la, to tom Yudas la Silas te ba wan yele sɛla woo te to golehɛ la ya nɛŋa poan. 28Yenɛ Sea la soŋɛ tɔ te to ko' nɔyenɛ te la de'a la to da dekɛ yelese'a n kpe'em din' ya han dagana la yelese'a n nare wa ma'an. 29Yelese'a n nare ma'an la dela ya da di' disɛka te ba kaanbɛ bo baga bii ya di' ziim. Le yɛ'ɛha ya da le obe duŋsɛka te ba kɛngɛ ko' te ziim yee a poan ge me da tona yalomtooma. Ya han sakɛ doohe yɛla la te to yele ya la, ya sɛla woo wan de'a ma'an bɔ'ɔra ya. Daanse'ere n bala. 30Borase'ehe te ba tom la keŋɛ Antiok teŋa poan. Ban paɛ la, ba lagahɛ Yesu dɔlɔba la zan'an nya dekɛ gɔŋɔ la bo ba. 31Nɛreba la n kaanlɛ gɔŋɔ la, la eŋɛ ba sunpeelom. Se'ere n sɔe la, yetɔgom la malom pa'ahɛ ba la paŋa ba tooma la poan. 32Yudas la Silas n de nɔtɔgɔheba me tɔgɛ yuue la ba. Ba yetɔgom la eŋɛ ba sunya nyɛlom te ba malom nyɛ' paŋa ba tooma la poan. 33Yudas la Silas n eŋɛ dabeha fiin Antiok teŋa poan la, nɛreba la kan' kan'somɔ bo ba ge bahɛ ba te ba lebe kule sɛbadoma n tom ba na la zen'en. 34Silas ka lagom doohe kule ge yee mɛ bini. 35Te Paul la Barnabas yee Antiok teŋa poan te dabeha ka pɔ'ɛ. Bama la Yesu po'oheba basɛba pa'alɛ nɛreba ge mɔɔlɛ Na'ayenɛ yɛla. 36Te daarɛ deyema te Paul yele Barnabas yete a bahɛ te ba ŋmɛregɛ lebe la ba po'ohɛ ba sɔɔnrɔ sɛba woo n bo teŋse'ehe poan te ba mɔɔlɛ Na'ayenɛ yɛla bo la ge la ba behɛ nya ba ane wane la dɛ. 37Paul n yele wana wa la, Barnabas bote te Yon Mark n doohe la ba. 38Ge Paul tɛn'ɛhɛ dɛ behɛ te la dagɛ ma'an te a lagom doohe la ba. Se'ere n sɔe la Yon Mark ka lagom bɔna la ba nyɛ' ba tooma la ba'ahegɔ. Ge a ŋmɛregɛ lebe mɛ ge bahɛ ba ba ma'an Pampilia teŋa poan. 39Bilam te Paul la Barnabas ŋmɛ' nɔkpe'ene la taaba yelehe yema yema. Te Barnabas bahɛ te Yon Mark la doohe en te ba zom ɔɔnrɔŋɔ kantɛ keŋɛ Kiprus teŋa poan. 40Ge te Paul me tare Silas te ba keŋɛ. Ge te Yesu nɛreba la dekɛ ba eŋɛ Na'ayenɛ nu'uhen. 41Paul nya doohe la Silas te ba keŋɛ Siria la Silisia tenhen poan behera te sɛba n dole Yesu sore la malom tara paŋa wo ban de Yesu po'oheba la.

will be added

X\